Diteetil Gbɔŋku 14

Unil yaa kpíì tin baa máaǹ kí ŋée

1 Ni sá ti-Dindaan ni-Nimbɔtiu biyaamu ní. Ni-niliu yaa kpíìyee, ní taa cāfì ni-wunti, kí taa kòol̀ tiyikpiti ni-yigbeeŋi pu^a. 2 Di sá yii ni sá circir nibul ní ki tīī ti-Dindaan ni-Nimbɔtiu. Ti-Dindaan ni-Nimbɔtiu lēē-ni ki nyántì anibul ŋin kɔkɔ bí kitiŋ puee kansikin ní nīn sá u-gaajawammɔntiiti ní^b.

Tijin tin bi kòóyee nì tin baa kòóyee

3 Ní taa jī tin kaa bí circiree. 4 Tiwaŋkuti tin naa kòóyee sɔ̀. Unaa nì upii nì uŋoobu 5 nì ukpiil nì ucaŋkpalim nì ubulum nì kijooŋɔjakai nì upeeman nì kipeewuŋ nì ukɔnii. 6 Naa kòó tiwaŋkuti tin tafuŋfukuti látì ní ti yaa ŋmɔ́ timool tì kpìkitī ki fàtīi ŋmóòyee. 7 Ama ni kòó tiwaŋkuti tin tafuŋfukuti látì ama ní kaa kpìkitī ki fàtīi ŋmóòyee, àá tin kpìkitī ki fàtīi ŋmóò ama ní ti-tafuŋfukuti kaa látèe. An puee ni kòó ugutaamu nì kiwuŋ nì ujaŋgbeenapul. Di sá yii tiwaŋkuti gbanti kpìkitī tin tì ŋmɔ́ ki náĺee ki fàtīi ŋmóò-tì, ama ti-tafuŋfukuti kaa látì. 8 Naa jīǹ ugbeeti mun, di sá yii u-tafuŋfukuti látì ama waa kpìkitī ki fàtīi ŋmóò. Ní taa ŋmɔ́ tiwaŋkuti gbanti nanti. Tì yaa kpíì, ní taa gbēē-tì.

9 Tiwaŋkuti tin kɔkɔ bí nnyiminee kansikinee, naa kòó tin cáá ijɔŋfeen nì ipɔkɔee. 10 Ama ni kòó tin kɔkɔ kaa pée cáá ijɔŋfeen nì ipɔkɔee. Tíǹ kaa ŋān̄ ní jī.

11 Naa kòó inoon in bí circiree. 12 Ama in ni kòóyee sɔ̀. Ukaabu nì ukaalun nì nnyimin kaaluŋwu 13 nì dikaaliŋgbindi nì kaajiiku nì kikaaliŋkpaŋ nì ki-buluku, 14 agaliŋgaa nì ŋi-buluku, 15 taataa nì ditulinjool nì ŋkpinni kpɔkpɔfiiu nì kaasaabi nì bi-buluku, 16 unanjikaabu nì kitulinjakpatibooi nì kpɔkpɔfii un sil fɔ̀kɔ̀ee, 17 nì kpɔkpɔfii un cáá nnyɔlee nì ukpiŋkaabu nì jɔmbaaŋki, 18 nì naakpaapiin nì ŋkpinni kaabiyaamu nì mu-buluku nì yikpitikooja nì kunanjiŋu.

19 Ni kòó inaaki in cáá ifeenee, iaa bí circir. 20 Ama naa kòó in bí circiree^c.

21 Ni kòó diwaŋkpil. Ni ŋūǹ kí dūú tīī binicambi bin kóò ni-puee bí ŋmɔ́. Ni tí ŋūǹ kí dūú nyāfiǹ-bi. Di sá yii nimbee, ni sá circir nibul ní ki tīī ti-Dindaan ni-Nimbɔtiu. Ní taa dū uŋoobu biim kí ŋàan̄ u-biki nanti^d.

Dibintil kamaa saalaatiiti marab

22 Ní nīn lèekī ni-kpaajinti pu tisaalaatiil dibindi kamaa. 23 Ti-Dindaan ni-Nimbɔtiu nimbiin, laakin u làá dāá lēē ní nīn jáaḿ-uee ní ni làá nīn jīǹ ni-kpaajinti nì ni-dapɔm nì ni-kpam saalaatiiti. Ki kpáaǹ ni-naai nì ni-piii nì ni-ŋoobui biseemaliŋ^e, án nín làá ŋá pu ní bīfì kí nīn fàŋkí ti-Dindaan ni-Nimbɔtiu kí nīn cáa cá jaanjaanee. 24 Ama, ti-Dindaan ni-Nimbɔtiu yaa láa bīiǹ ni-boon ni-kpaajinti lòon̄ tikpil ní ni yaa láa dáań ki ká yii ti-Dindaan nín lēē mpaan ŋun pu ní nīn jáaḿ-uee dátì, naa làá ŋmā kí túń ni-saalaatiiti kí cùnnì niinee, 25 ní dāá dū ni-saalaatiitee kí nyāfì ní kí dū animbil ŋin ni kée kí cùnnì laakin ti-Dindaan ni-Nimbɔtiu lēē kí nīn bí ní nīn jáaḿ-uee. 26 Niinee ní ní dāá dū animbilee kí dā kun ní ni yaa pée lèe. Ni dāa ŋūǹ kí dūú dā unaa àá upii àá uŋoobu àá ndamam àá ndaam min pɔ̄ɔ̄yee àá tin ní ni yaa láa pée lèe. Ní ni nì ni-dicaŋŋi kɔkɔ ń jī bɔ̀b ti-Dindaan ni-Nimbɔtiu nimbiin kí fàal̀. 27 Ama ní nīn nyí kí taa súntí Leefii yab bin kóò ni-timmunee pu, di sá yii bíǹ kaa fōō difakal kii nimbi nín fōō tikpaatan puee.

28 Abin ata kamaayee ní kóoǹ dibintataatiil kpaajinti saalaatiiti kí bíĺ ni-timmu poon. 29 Niinee Leefii yab bin kaa cáá tikpaatan bi-ba puee nì binicambi bin kóò ni-puee nì ataŋkpiibil nì bi-kpiipoobi bin kóò ni-timmu poonee ń dāan̄ kí yòon̄ ní kí ká kí jī kí díkí. Ni yaa ŋá mimmee, ti-Dindaan ni-Nimbɔtiu làá bìin̄ ni-tuuŋŋi kɔkɔ pu.