Diteetil Gbɔŋku 15

Abin aluli pɔndi pɔ̄tam bɔti

1 Ubɔ yaa cáá-si dipɔndee, abin aluli boonee, á dūú pɔ̄-u. 2 Ni nín máaǹ kí nīn ŋáań puee sɔ̀. Dibindi din ti-Dindaan síiǹ yii báà ŋma ń dū u-nabiki nín cáá-u dipɔndi diŋyee kí pɔ̄-uee yaa bāańee, bin kɔkɔ nìn pīnnì bi-jutiibi animbilee ń taa páb́ bidambi yii bí téeǹ-bi, bí dūú pɔ̄-bi. 3 Ni ŋūǹ kí bàlifì binicambi bin kóò ni-pu ki cáá-ni dipɔndee bí téeǹ-ni. Ama an yaa sá ni-nabiyaamu pɔɔŋŋee, ní dūú pɔ̄-bi.

4 Nì míǹ kɔkɔee, usoodaan kaa làá nīn bí ni-kansikin, di sá yii ti-Dindaan làá bìin̄ ni-boon tikpil kitiŋ kin ní u làá dūú tīī-ni difakal ní nīn kíǹ ki yèe poon. 5 Tin bée di sá yii ní nīn tɔ́ ti-Dindaan ni-Nimbɔtiu kí nīn ŋúb́ marab bin kɔkɔ m tīī-ni díǹ nee, kí ŋá bi nín bí yii ní ŋá puee. 6 Di sá ti-Dindaan ni-Nimbɔtiu làá dāá bìin̄ ni-boon kii u nín pōoǹ-ni puee. Atimbun tikpil nib làá dāá dāan̄ ní pìnnì-bi animbil, ama nimbi dāa kpá kí cù báà diba nib cee bí pìnnì-ni animbil. Atimbun tikpil làá dāá nīn bí ni-taapu, ama nimbi dāa kpá kí nīn bí diba taapu.

7 Ama an yaa láa ŋá yii ni-nabiki kiba kpántì usoodaan ntimu mun ti-Dindaan làá tīī-nee kiba poonee, ní taa ŋá inimbinaakulim ni-nabiki usoodaan pu kí tīī-kì kun kì nyàab̀ee. 8 Ni máaǹ kí dàkà udaan tiniti kí pìnnì-u tin kamaa u nyàab̀ee^a. 9 Ama ní nīn nyíǹ ni-ba kí taa yàntī kulandɔkɔkpiiu nee ń jī ni-pɔbiliŋin mpaan ní lì yii: «Dibinluluútiil din poon ti cáá apɔɔn ki pūǹee tóobiń,» ní kí dàkafì mimmee kí ŋá ni-nabiki usoodaan pu inimbinaakulim kí taa tīī-u kun ní u nyàab̀ee. Ni yaa ŋá mimmee, u làá tīminsì kí yíiń ti-Dindaan, ní kí sòoǹ kí tɔ̄ ni-pu, ní an kpántí ikpiti kí tīī-ni. 10 Tīīmaan-u kun ní u nyàab̀ee nì dipɔbil diba kí taa nín̄ gbùkum̄. Ŋámaan míǹ, ní ti-Dindaan ni-Nimbɔtiu ń bìin̄ ni-boon, ní kí bìin̄ ni-tuuŋŋi kɔkɔ pu. 11 Kii bisoodambi nín làá nīn pée bí ni-tiŋki pu puee^b, an pu ní m kpáafí-ni yii ní nīn cáá tiniti kí nīn tútúǹ ni-nabiyaamu bisoodambi nì bifalaadambi.

Ní líí iyumbu í tɔ̄ i-ba

12 Ni-nabiyaamu Eebru yab kansikin uninja àá unimpu yaa dū u-ba ki nyáfiǹ-ni ni dá-u ní u kpántì ni-yumbuuyee, u làá tɔ̄ ditundi abin aluu ní kí tīī-ni. Dibinluluútiil poonee, ní líí-u ú tɔ̄ u-ba. 13 Ni yaa làá tīī-u dibatɔlee, ní taa yàntī ú búntí iŋaŋkulim. 14 Ní dāá lēē ni-piii nì ni-ŋoobui nì ni-kpaajinti nì ni-daam kí pɔ̄-u nì tiniti poon. Ní dāá lēē ti-Dindaan ni-Nimbɔtiu nín bīiǹ ni-boon ni ká tiŋyee poon kí tīī-u. 15 Ní téetí yii ni nìn sá iyumbu ní Eejipiti tiŋkin ní ti-Dindaan ni-Nimbɔtiu dá-ni ki líì. An pu ní m bíi tìì-ni mara nee díǹ.

16 Ama ubɔ yumbuu yaa bí-u yii: «Maa là kí nyā a-cee», di sá yii u néeń u-dindaan nì u-dicaŋku ní an mɔ̄ǹ-u ú gbíntí kí nīn bí u-ceeyee, 17 udaan ń yòon̄ mpiin ní kí dū uyumbuee tafal kí nákań ni-punyɔkɔki kí sāā kí cíĺ, ní ú kpántí u-yumbuu kí nīn cáa cá jaanjaan. Báà an yaa sá unimpu, ní ŋá-u míǹ mbaantiim.

18 Ni yaa làá líí ni-yumbuu ú tɔ̄ u-bee, ni taa yàntī án nīn wù-ni, di sá yii u nín túń ditundi din ki tīī-ni abin aluuyee cáá ipaati ŋfunyɔm mili pu kí jítiǹ an yaa bàà sá upaadaan tundi. Míǹ puee, tīīmaan iyumbu dibatɔl ní ti-Dindaan ni-Nimbɔtiu ń bìin̄ ni-boon nì ni-tuuŋŋi kɔkɔ pu.

Tiwaŋkuti tin bi péé péé ki màl̄ee

19 Ní dū ni-naai nì ni-piii nì ni-ŋoobui biseemaliŋ kí sú ti-Dindaan ni-Nimbɔtiu. Ní taa dū ni-naai in sá abiseemalee kí kpàl̄ í kpɔ̀ tikpaal, kí taa tí cā ni-piii in sá abiseemalee kuti^c. 20 Dibindi sá kamaayee, nimbi nì ni-dicaŋŋi ń cù ti-Dindaan ni-Nimbɔtiu nimbiin laakin u lēē kí nīn bí ní nīn jáaḿ-uee kí kpɔ̀ tiwaŋkuti gbanti niin kí ŋmɔ́^d. 21 Ama tiwaŋkuti gbanti kansikin kubɔ yaa wɔ̀b̄, ku-taal diba wù àá ku jɔ̀b̄ àá ku pée wɔ̀b̄ mbaminee, ní taa dū-ku kí ŋá saraa kí tīī ti-Dindaan ni-Nimbɔtiu. 22 Kpɔ̀maan-ku laakin ni kóòyee kí ŋmɔ́. Ni-kansikin bin bí circiree nì bin kaa bí circiree kɔkɔ ŋūǹ kí ŋmɔ́ kii bi nín pée ŋmóò upeeman àá ucaŋkpalim puee. 23 Ama naa nín máaǹ kí ŋmɔ́ fatiku ní^e. Ní kpáatí-u kí fá kitiŋ kii nnyimee.