Diteetil Gbɔŋku 16

Dilákatil jiŋaaliu

1 Ní nīn nyí kí jī Abiibi ŋmaliu poon, Dilákatil jiŋaaliu kí tīī ti-Dindaan ni-Nimbɔtiu tinyool. Di sá yii uŋmal gbanti poon nyeeku kubɔ ní u nìn nyántìń-ni Eejipiti tiŋkin. 2 Ní dāá lēē ni-piii àá ni-ŋoobui àá ni-naai poon tiwaŋkuti tiba kí kpɔ̀ kí ŋá Dilákatil jiŋaaliu saraau kí tīī ti-Dindaan ni-Nimbɔtiu. Ní dāá ŋá saraa gbanti mpaan ŋun pu ti-Dindaan làá dāá lēē kí nīn bí ní nīn cá ki jáaḿ-uee. 3 Jiŋaal gbanti poonee, ní taa láa ŋmɔ́ kpɔnɔ un cáá ŋkpɔnɔnyɔkɔee. Ní dāá dū iwiin iluli gbanti kɔkɔ kí ŋmɔ́ kpɔnɔ un kaa cáá ŋkpɔnɔnyɔkɔee. Ni yaa láa bíi ŋmóò dinimbinaamandi kpɔnɔu gbantee, ní dāá téetí ni nín nìn jìkī kpàti kpati ki yíkì Eejipiti tiŋkin puee. Ní dāá ŋá míǹ kí nīn téetí ŋwiin ŋun ní ni nìn nyáń Eejipiti tiŋkinee, iwiin in kɔkɔ ni cáá kí kàl̄ kitiŋ pu dooyee. 4 Iwiin iluli gbanti kɔkɔee, bí taa láa ká ŋkpɔnɔnyɔkɔ báà fiii pu gba ni-cee, kitiŋ kɔkɔ poon. Ŋwimpeekaa dal jooku, ni yaa láa kūū kuwaŋkuluu ki ŋá saraayee, ní taa láa yàntī kutaa ń wúntí saraa gbanti nanti pu. 5 Naa dāa máaǹ kí ŋá Dilákatil jiŋaaliu saraau ntimu mun ti-Dindaan ni-Nimbɔtiu làá tīī-nee kansikin kiban kii ni nín là puee. 6 Asee mpaan ŋun ti-Dindaan làá dāá lēē kí nīn bí ní nīn jáaḿ-uee baba pu ní ni dāa máaǹ kí ŋá saraa gbanti. Ní dāá ŋá saraayee kujoopɔŋ kii ŋyunti ŋun ni nìn nyáń Eejipiti tiŋkinee. 7 Ní dāá tɔ́kɔń tinan gbanti kí ŋmɔ́-tì mpaan ŋun pu ti-Dindaan ni-Nimbɔtiu làá dāá lēēyee. Kutaa yaa láa wúntì kutaafaauee, ni dāa ŋūǹ kí fàtīí gítí ni-tantibin. 8 Ní dāá dū iwiin iluu kí ŋmɔ́ kpɔnɔb bin kaa cáá ŋkpɔnɔnyɔkɔee, ní ŋwinluluútee ní kpāfì kí jāam̀ ti-Dindaan ni-Nimbɔtiu kí púntí jiŋaal. Ŋwiin gbantee, naa dāa máaǹ kí tɔ̄ báà diba^a.

Pantikooti jiŋaaliu

9 Ni yaa láa kíĺ ki bíi cēē ni-kpaajintee, ní dāá kàaǹ nnyɔmu mululi, 10 ní kí jī Pantikooti jiŋaaliu kí jāam̀ ti-Dindaan ni-Nimbɔtiu. Ní dāá ŋá nlammɔntiim saraau kí nóó nì ti-Dindaan ni-Nimbɔtiu nín bīiǹ ni-pu puee. 11 Ní dāá cù ti-Dindaan ni-Nimbɔtiu nimbiin laakin u làá dāá lēē kí nīn bí ní nīn jáaḿ-uee, nimbi nì ni-jipɔmbi nì ni-bisalib nì ni-tɔntɔnliibi nì Leefii yab bin kóò ni-timmunee nì binicambi bin kóò ni-puee nì ataŋkpiibil nì bikpiipoobi bin mun kóò ni-timmunee, ní ni-kɔkɔ ń fàal̀. 12 Ní téetí yii ni nìn sá iyumbu ní Eejipiti tiŋkin. Ní ŋúb́ abɔkpaa nee tiŋan kí ŋá ŋi nín bí yii ní ŋá puee^b.

Tantib jiŋaaliu

13 Ni yaa láa gbáń ni-kpaajinti ní ki yaa láa ŋmáaḿ ni-damam subiliŋ ki dóòyee, ní dāá jī tantib jiŋaaliu iwiin iluli. 14 Ní dāá jī jiŋaal gbanti nì ifaal poon, nimbi nì ni-jipɔmbi nì ni-bisalib nì ni-tɔntɔnliibi bininjab nì binimpoobi nì Leefii yab nì binicambi bin kóò ni-puee nì ataŋkpiibil nì bikpiipoobi bin kóò ni-timmunee. 15 Ní dāá dū iwiin iluli kí jī jiŋaal kí tīī ti-Dindaan ni-Nimbɔtiu tinyool laakin u làá dāá lēēyee. Di sá yii ti-Dindaan ni-Nimbɔtiu làá dāá bìin̄ ni-boon ni-kpaajinti ń lòoǹ ní kí dāá bìin̄ ni-tuuŋŋi kɔkɔ pu. An puee ní dāá nīn bí mmɔŋkpaanni^c.

16 Ŋfunyɔm mita dibindi kamaa poonee, ni-kansikin bin sá bininjabee kɔkɔ máaǹ kí dāá cù ti-Dindaan ni-Nimbɔtiu nimbiin laakin ní u làá dāá lēēyee kí jī jiŋaal un bi ŋmóò kpɔnɔ un kaa cáá ŋkpɔnɔnyɔkɔee nì Pantikooti jiŋaaliu nì tantib jiŋaaliu. Ní taa láa cù ti-Dindaan nimbiin iŋaŋkulim. 17 Ama báà ŋma ń dāá kpèè ti-Dindaan ni-Nimbɔtiu nín bīiǹ u-boon miŋyee ní kí bɔ́ntí saraabi míǹ kí cáá cùnnì.

Bibɔsoonliibi marab

18 Ní dāá kàan̄ ntimu mun ti-Dindaan ni-Nimbɔtiu làá dāá tīī-nee kɔkɔ poon bibɔsoonliibi nì bin nyí kitiŋ pu marabee. Bí dāá nīn sòoǹ binib bɔti nì ibaamɔn. 19 Ní nīn kpèé nsan nín dɔ̄ puee ki sòoǹ tibɔti kí taa nín̄ cáá digàntil ni-bɔsooŋyi poon. Ní taa yàntī ubɔ ń pɔ̄-ni tiba kí ŋéeb́ ni-nyɔkɔ, di sá yii tiwampɔkaal yàntī biciŋfitiibi kpántí bijɔfub ní ki kù deedeedambi bɔti. 20 Ní nīn sòoǹ tibɔti tí nīn tɔ́kɔ́ ibaamɔn pu, án nín làá ŋá pu ní nīn bí dimaŋfalin, kí ŋmā kí kɔ́ kitiŋ kin ní ti-Dindaan ni-Nimbɔtiu làá tīī-ni ní nīn kíǹ ki yèe poonee.

Ti-Dindaan ná iwaatooti

21 Ní taa cóoń ŋwindɔ ŋubɔ kí kɔ́ĺ nsaraafan ŋun ní ni làá mā kí tīī ti-Dindaan ni-Nimbɔtiuee. 22 Ní taa tí cóoń diwaataŋkpal niin, di sá yii ti-Dindaan ni-Nimbɔtiu ná tiwan gbanti^d.