Diteetil Gbɔŋku 17

1 Ní taa dū unaa àá upii un laaba wɔ̀b̄ee àá un pu tiba pée bí kaa ŋān̄ee kí ŋá saraa kí tīī ti-Dindaan ni-Nimbɔtiu, di sá yii an sá ntimbiil ní ti-Dindaan ni-Nimbɔtiu nimbiin.

2 Ntimu mun ti-Dindaan làá dūú tīī-ni ní nīn kóò nee kansikin kiba poon, uninja àá unimpu ubɔ yaa bíi ŋáań min kaa kítì ti-Dindaan ni-Nimbɔtiu ceeyee, u kōotì mpèé koobil dee. 3 Tí lì yii udaan cūtìi bíi tòotī awaa ki gbàantí ŋi-taapu àá ki gbàantí ŋwìiń àá uŋmal àá iŋmalbijaa in bí kutaa puee taapu. Man ni-Dindaan mun kpáafì-ni yii ní taa ŋá míǹ jaanjaan. 4 Ni yaa gbìl̄ bi máafì-ni tiba mimmee, ní mɔ̀tīí cɔ̄ŋkì tiŋan kí kpèè yii an sá ibaamɔnaaa, an kaa sá. An yaa lafun sá ibaamɔn yii ubɔ ŋá ntimbiil tuuŋŋi gbanti Isirayeel tiŋki puee, 5 ní nyāntí uninja àá unimpu un ŋá atuŋkpiti gbantee ni-tiŋki punyɔkɔki^a ní kí yāŋkì-u ataŋkpee ú kpú.

6 Binib bili àá bita yaa lēē ubɔ pu seera yii udaan máaǹ ŋkúmee, bí kpɔ̀ udaan. Unibambaanti seerau kaa ŋūǹ kí yàntī bí kpɔ̀ udaan^b. 7 Biseeradambi di máaǹ kí péé kí yā udaan ataŋkpee kí kpɔ̀, ní samaa un kɔkɔ kíǹee ń nín páań. Ní ŋá míǹ kí nyāntí ikpiti ni-kansikin^c.

Ibɔsoon

8 Bi yaa cáań nnikpaakoon bɔti àá kujaau bɔti àá ubɔ ŋá u-juti tiweendi tiba ki bíl̀ ni-nimbiin ni-bɔsoondiikun ní ni ká yii tibɔtee pɔ̄ɔ̄ ní ŋmā kí sòoǹ-tèe, ní cù mpaan ŋun ti-Dindaan ni-Nimbɔtiu làá dāá lēēyee pu. 9 Ní ká Leefii yab bin sá bisaraaŋaliibee nì un sá ubɔsoonli ŋyunti gbantee, ní bíǹ ń sòoǹ tibɔtee kí tīī-ni. 10 Tibɔtee nín sá pu bi dūu tùkū-ni mpaan ŋun ti-Dindaan lēēyee puee, ní ŋá míǹ deedee. Ní pɔ́ɔǹ kí ŋá kii bi nín kpáafì-ni ní ŋá puee deedee. 11 Bi nín sòon̄ tibɔti gbanti ki síiǹ puee nì tin bi tùkū-ni yii ní ŋée, ŋámaan míǹ nyíki nyiki. 12 Ama ubɔ yaa ŋá dilambil ki kpákáǹ usaraaŋakpil un yú ki bíi tūǹ ti-Dindaan Unimbɔti tundee àá ubɔsoonli nín lī puee, ní kpɔ̀ udaan. Ní ŋá míǹ kí nyāntí ikpiti gbanti Isirayeel yab kansikin. 13 Samaa kɔkɔ làá dāá gbìl̄, ní kí fàŋkì kí taa ti ŋá dilambil míǹ dalba dalba.

Dibeel bɔti

14 Ni yaa láa kɔ́ kitiŋ kin ti-Dindaan ni-Nimbɔtiu làá dūú tīī-nee poon ní ki ká ŋkakaa ki kāl̀ ní ki yaa láa lī dalba yii: «Yàntīmaan tí kàan̄ ubɔti ú nīn kpòotī-ti kii anibul ŋin māntìi tú-tee nín cáá pueeyee^d», 15 ní dāá dū unil un ti-Dindaan ni-Nimbɔtiu u-ba làá lēēyee kí kàan̄ dibeel. Udaan dāa máaǹ kí nīn sá ni-nabiyaamu Isirayeel nib kansikin ubɔ ní. Ní taa dū unicaan un kaa sá Isirayeel niliuee kí kàan̄ dibeel. 16 Ama udaan kaa dāa máaǹ kí nīn cáá itaamu tikpil, àá kí tɔ̄ binib bí cù Eejipiti tiŋkin kí dāń-i^e, di sá yii ti-Dindaan nìn tùkū-ni yii: «Ní taa pée fàtīí gítí niin». 17 Waa dāa máaǹ kí nīn cáá kunimpupaau, án làá dāá yàntī ú fá Unimbɔti. Waa dāa tí máaǹ kí nīn cáá animbil nì sindaariya tikpil^f.

18 Bi yaa láa kāaǹ-u dibeelee, ú dāá ŋmà marab bin Leefii yab bin sá bisaraaŋaliibee kpáafèe kí ŋá kugbɔŋun kí tīī u-ba. 19 Marab gbanti ń nīn bí ki kɔ́ĺ-u ú nīn kàaǹ-bi baabadal kí cáá sāā u-kúm dal. Mimmee u làá bīfì kí nīn fàŋkí ti-Dindaan u-Nimbɔtiu, ní kí nīn ŋúb́ abɔkpaa nì akoobil ŋin kɔkɔ kā marab gbɔŋku gbanti poonee. 20 U yaa kàaǹ marab gbanti mimmee, án làá yàntī ú taa nín̄ yòontí u-ba yilpu kí dàkà yii u jítiǹ u-nabiyaamu mun kíǹee, ní kí taa kpèè marab biba fám kí taa nín̄ tɔ́-bi. U yaa ŋá míǹ, u nì u-naantiibi làá jī dibeel Isirayeel tiŋki pu kí yúntí.