Diteetil Gbɔŋku 18

Leefii yab fakal

1 Bi yaa láa bíi yàkatī tikpaatan ki tìì Isirayeel yabee, bí taa kpáaǹ Leefii yab bisaraaŋaliibi nì bin kɔkɔ pée sá Leefii naakookunee. Saraabi bin bi ŋáań ki tìì ti-Dindaanee di dāa sá bi-jinti nì bi-fakal. 2 Leefii yab kaa cáá tikpaatan bi-nabiyaamu kansikin, di sá yii diyimɔɔl din bi cáá kí nīn bí ti-Dindaan tundin kii u nín pōoǹ-bi puee di sá bi-fakal^a.

3 Samaa yaa cáań unaa àá upii ki ŋá saraayee, bisaraaŋaliibi jandi di sá kuboou nì nnyɔɔkpaween nì dipool. 4 Ní dāá dū tijimpeepeekaal tin ni lēēyee, an dàkà yii ni-bileeu nì ni-damam nì ni-kpam ki kpáaǹ ni-pikuti tin ni péé ki cáńee kí tīī-bi. 5 Di sá yii ni-naakɔti kɔkɔ poonee, Leefii yab ní ti-Dindaan ni-Nimbɔtiu lēē yii bí nīn bí u-tundin kí nīn cáa cá jaanjaan.

6 Leefii yab ubɔ yaa nìn kóò Isirayeel timmu kiban, ní ki yaa là kí dāan̄ mpaan ŋun ti-Dindaan lēēyee puee, 7 u cáá nsan kí tɔ̄ ditundi kí tīī ti-Dindaan u-Nimbɔtiu kii u-nabiyaamu, Leefii yab bin kíǹee nín bí niin ki tūǹ ti-Dindaan tundi puee. 8 Báà u yaa nyáfì u-baa fakal ki cáá animbil, bi nín tìì u-nabiyaamu mun bí niinee pu bi jīǹee, míǹ mbaantiim ní bi máaǹ kí tīī udaan mun.

Inyimɔn bɔnaatiliibi nì ibaamɔn bɔnaatiliibi

9 Ni yaa láa kɔ́ kitiŋ kin ti-Dindaan ni-Nimbɔtiu làá dūú tīī-nee poonee, ní taa bīfì kí nīn ŋáań ntimbiil tuuŋŋi ŋin anibul ŋin bí niin díǹ pu nee ŋáańee. 10 Bí taa ká ni-kansikin ubɔ dū u-jipɔɔn àá u-bisal kí tɔ̄ ŋŋmin kí ŋá saraa, àá ki būū tibɔɔl, àá ki màkà dimàkal, àá ki ŋáań kukpaŋkpantiiu tuuŋŋi, àá ki ŋáań kusoou tuuŋŋi, 11 àá ki tòó binib inyɔkɔfi, àá ki kàal̀ abɔɔjal, àá ki sòoǹ tin dòońee, àá ki yíì bitaŋkpiibi ki sòoǹ nì bi^b. 12 Unil un yaa ŋáań atuun gbantee sá utiŋwiil ní ti-Dindaan nimbiin. Ntimbiil tuuŋŋi gbanti pu ní ti-Dindaan ni-Nimbɔtiu làá jà anibul nee kɔkɔ kí fōō bi-tiŋki kí tīī-ni. 13 Ní dū ni-ba kɔkɔ kí sú ti-Dindaan ni-Nimbɔtiu^c.

14 Di sá yii anibul ŋin timmu ni làá fōō nee sá binib bin cá biwaadambi nì bibɔɔbi ceeyee ní. Ama nimbee, ti-Dindaan ni-Nimbɔtiu kaa pú-ni nsan ní ŋá míǹ.

15 Ti-Dindaan ni-Nimbɔtiu làá dāá lēē ni-nabiyaamu kansikin ubɔ ú nīn sá Unimbɔti bɔnaatiliu kii mamee, ní dāá pīlifiǹ-u^d. 16 Di sá yii tin ni nìn bālifì ti-Dindaan ni-Nimbɔtiu ŋwiin ŋun ni nìn kóoǹ ki kpáfì ki sí Ooreeb jool taapuee dee. Ni nìn lī yii: «Taa ti là kí gbìl̄ ti-Dindaan ti-Nimbɔtiu neen pu, kaa ti là kí wāl̀ u-ŋmikpaaŋŋu nee mun. Di sá yii taa là kí kpú^e.» 17 Ti-Dindaan nìn tùkū-mi yii: «Tiŋman bi cáá mbaamɔn kí sòoǹ míǹ. 18 M làá lēē bi-nabiyaamu kansikin ubɔnaatil un bí kii siiyee kí tīī-bi. M làá dāá dū m-nyɔɔbuŋŋi kí ŋá u-nyɔkɔn ní ú dāá tùkù-bi tin kɔkɔ m kpáafì-uee. 19 Un sá kamaa yaa kaa dāa pílifiǹ m-nyɔɔbuŋŋi ŋin ubɔnaatilee làá dāá sòoǹ m-yindi puee, mama m-ba di làá dāá dáaĺ u-tafal^f. 20 Ama m yaa kaa tùkū ubɔnaatil ubɔ tiba yii ú lì ní udaan yaa gāā u-bindi ki yíkìi sòon̄ tiba m-yindi pu, àá ki sòon̄ tiba awaa aba puee, an sá ní kpɔ̀-u ní.»

21 An yaa yíì ni làá bàlifì ni-ba yii: «Kin mana ní ti làá ŋmā kí béé yii tin u sòon̄ee kaa nyánní ti-Dindaan cee?» 22 Tiŋman, ubɔnaatilee yaa yíkìi sòon̄ tiba ti-Dindaan yindi pu ní an kaa ŋá kii u nín lī pueeyee, ní béé yii tin u sòon̄ee kaa sá ti-Dindaan nyɔɔbundi. Ubɔnaatil gbanti gāā u-bindi ní ki sòon̄. Ní taa fàŋkì-u.