Diteetil Gbɔŋku 19

Ntimu mun poon bi sáń ki kóòyee

1 Ti-Dindaan ni-Nimbɔtiu làá dāá kpɔ̀ kí céetí anibul ŋin tiŋki u làá dūú tīī-ni nee, ní ní jà-bi kí nyāntí ní kí fōō bi-timmu kí nīn kíǹ ki yì, kí jī bi-diiŋŋi kí nīn kóò. 2 Ní dāá lēē kitiŋ kin ti-Dindaan ni-Nimbɔtiu làá dāá tīī-nee poon ntimu muta kí yóoń. 3 Ní dāá cúú kitiŋ kin kɔkɔ ti-Dindaan ni-Nimbɔtiu làá dūú tīī-nee gbanti kí yàkatī ajan ata, kí dāá tɔ̄ adan kí cùnnì ntimu mun ni lēēyee poon, án nín làá ŋá pu un yaa láa kūū unilee ń ŋmā kí sāǹ kí kɔ́ mu-nee^a.

4 Un yaa kaa ná u-juti ní kaa nyí ki kūū-uee baba di ŋūǹ kí sāǹ kí kɔ́ ntimu gbanti kiban kí fīī u-ba. 5 Tí dūú ŋmàntī kii unil ubɔ nì u-bɔɔ cūtì kubambaŋŋun kí gāā idɔ ní ŋyunti ŋun u dúkutì ceeku kí bàà gāā busubuee, nceekubiim cúu fúkutì ki nyáń ki yá u-bɔɔyee ki kūū-u. An niliuee ŋūǹ kí sāǹ kí kɔ́ ntimu gbanti kiba poon kí fīī u-ba. 6 Nsan ń taa nín̄ dátì, an yaa kaa sá míǹ, un un bi kūūyee nabiki^b làá jà unikpɔlee diŋuul poon kí cúú-u kí kpɔ̀-u kí téeǹ. U mun kaa bàà máaǹ ŋkúm, di sá yii waa ná-u ní ki kūū-u. 7 An pu ní m bíi kpáafí-ni yii ní dāá lēē ntimu muta kí cīití ni-ba.

8 Ti-Dindaan ni-Nimbɔtiu yaa láa wāaǹ ni-tiŋki kii u nín nìn pōoǹ ni-naanjab puee, ní ki yaa láa dū kitiŋ kin kɔkɔ u nìn pōoǹ-bee ki tīī-nee, 9 ní dāá lēē ntimu muta mubɔ mun kí kūtì. Di sá yii u làá dāá wàan̄ ni-tiŋki míǹ kí tīī-ni. Ama see ní nīn ŋúb́ marab bin kɔkɔ m tīī-ni díǹ nee, kí nīn néeń ti-Dindaan ni-Nimbɔtiu, kí nīn ŋáań baabadal kii u nín bí yii ní nīn ŋáań puee. Ŋyunti gbanti baba ní u làá ŋá míǹ kí tīī-ni. 10 Ní dāá ŋámaan míǹ án nín làá ŋá pu kitiŋ kin ti-Dindaan ni-Nimbɔtiu làá dūú tīī-nee poonee, bí taa kpɔ̀ unil un kaa bàà máaǹ ŋkúmee fám, ní naa nín túǹ ubɔ kúm kpuulool.

11 Ama tí lì yii ubɔ ná u-juti, ní ki píĺ ki cí-u ní ki yíkìi cìb̄ ki cúú-u ki gbáń ki kūū-u ní ki sáǹ ki tin kɔ́ ntimu gbanti kiba poon. 12 Unikpɔlee dumpu tindaŋkpilib ń dāá tɔ̄ binib bí cù kí gíiǹní-u u-tiŋkin ní kí dū-u kí ŋá un u kūūyee nabiki ŋaan, ní úǹ ń kpɔ̀-u kí tɔ̀ ipɔntoon. 13 Taa sɔ̄maan unikpɔl gbanti saai. Ní ŋá míǹ ní kí nyāntí maanyiiba nikpaakooŋŋu kpitii Isirayeel tiŋkin ní án nīn ŋān̄ ki tīī-ni.

14 Ni yaa láa bàn̄ kitiŋ kin ti-Dindaan ni-Nimbɔtiu làá yàkatī kí tīī-nee poon ki kāl̀ee, ní taa láa cóotí ni-timmu kpaanyɔmmu taŋkpeeŋi kí nìkī. Ní yàntī án nīn pée bí kii bin péeǹ-ni ki bàn̄ee nín ŋmāntì pu ki cóoǹee.

Biseeradambi tundi

15 Unibambaanti seerau kaa ŋūǹ kí yàntī bí kpɔ̀ ubɔ bɔti yii u kūū unil àá u ŋá ikpiti iba. Asee binib bili àá bita di yaa lēē udaan pu seera ní bi ŋūǹ kí kpɔ̀ u-bɔti^c.

16 Ama ubɔ yaa yíkì ki bíi tūntí u-juti pu ikpiti ibee, 17 bí cáá binib gbanti liitil kí cùnnì ti-Dindaan kɔŋkooŋŋun, báà ŋma ń kàaǹ u-bɔti bisaraaŋaliibi nì bibɔsoonliibi bin bí ditundin ŋyunti gbantee nimbiin. 18 Bibɔsoonliibee ń fíkití tibɔtee tiŋan kí kpèè. Bi yaa dáań ki ká yii useeradaanee sá unyimɔndaan ní ki bíi lèekī u-juti pu nnyimɔn seerauee, 19 ní dáaĺ u-tafal kii u nín bàà là bí dáaĺ u-nabiki tafal puee. Ní ŋá míǹ kí nyāntí ikpiti ni-kansikin. 20 Binib bin kíǹee yaa gbìl̄ tin jítèe, bi làá fàŋkì ní kí taa ti ŋá ikpiti gbanti juti ni-kansikin. 21 Ní taa sɔ̄ dibɔkpil daan saai. Un yaa kūū unilee, bí kpɔ̀ u mun. Un yaa lēē u-juti nimbilee, bí lēē u mun yal. Un yaa lēē u-juti nyindee, bí lēē u mun nyindi. Un yaa gūutì u-juti ŋalee, bí gùutī u mun ŋal. Un yaa gūutì u-juti taalee, bí gùutī u mun taal^d.