Disaŋkindi 23

Ibaamɔn ń nīn bí ibɔsoon poon

1 «Ní taa nóó tibɔti boon ni yaa kaa cúú ti-baamɔŋyi. Ní taa yūĺ unikpiti boon kí lēē inyimɔn seerau kí bìin̄ u-pu^a. 2 Ní taa fàŋkì kunipaau wíiŋŋu pu kí nóó ku-boon kí ŋá ikpiti. Ibɔsoon laŋki bi yaa yíiń-ni ní lēē seeree, ní taa kpèè kunipaau nín pá un boonee wíiŋŋu pu kí tɔ́kɔtí ibaamɔn saŋŋu pu. 3 Ní taa pɔ̀ usoodaan digàndi yii u nín sá usoodaanee pu^b.

4 «A-nannanliu naau àá u-maŋki yaa wáŋkì ní a kée, á péetiń kuwaŋkuluuee kí cáań kí tīī-u. 5 A yaa ká a-nannanliu maŋki lítì ní diwaŋgul nyīkiǹ ki-puee, taa jītí. Tūtuǹ-u ú yòon̄-kì kí síiń ki-taaŋi pu^c.

6 «Ní taa kpɔ̀ uwɔfi bɔti ibɔsoon poon. 7 Ní taa cèeǹ tinyimɔmbɔti poon. Ní taa kpɔ̀ maanyiiba nì deedeedaan, di sá yii maa càntī dibɔkpil daan kii waa ŋá tibee. 8 Ní taa yàntī ubɔ ń pɔ̄-ni tiba kí ŋéeb́ ni-nyɔkɔ, di sá yii tiwampɔkaal gbanti jɔ̀b̀ bin wāĺee nimbiliŋ ní ki kù deedeedambi bɔti^d.

9 «Ní taa sàaǹ binicambi bin kɔ́-ni ki kóò ni-tiŋki puee. Nimbi ni-ba nyí unicaan gìńdi, di sá ni kāl̀ kunicaŋu Eejipiti tiŋkin ki ká^e.»

Dibiŋŋuŋfikaal nì ŋwiŋŋuŋfikaa bɔti

10 «Ní kpɔ̀ ni-kpaajinti ni-kpaatanti pu, kí bɔ̄l̀ kí cā áli abin aluu. 11 Ama dibinluluútiilee, ní yàntī tikpaatan ń dòon̄ kí ŋùŋfì. Ni-yab bin sá biwɔfibee ń dāá ká tijin poon kí jī, ipeel ń dāá jī tin yaa kíǹee. Míǹ mbaantiim ní ní dāá ŋá ni-fiinyib nì ni-ɔliifi sufii^f.

12 «Ní dū iwiin iluu kí tɔ̄ ni-tuuŋŋi, ama ŋwinluluúti dalee, ní taa tɔ̄ báà ditundi diba. Niinee ni-naai nì ni-mammu ń ŋùŋfì, ní ni-jipɔmbi nì ni-tɔntɔnliibi mun ń ŋùŋfì bi-fam ń nàb̄^g.

13 «Ní nīn nyíǹ ni-ba kí ŋá tin kɔkɔ m bí yii ní ŋée. Ní taa pée tòotī awaa aba. Diwaal diba yindi ń taa pée nyā ni-nyɔkɔn gba.»

Jiŋaalib bin sá mara bí nīn jīǹee

(Dūú ŋmàntī nì 34.18-26, Ditee 16.1-17)

14 «Dibindi poonee ní jī jiŋaalib bita kí tīī-mi tinyool. 15 Ní dāá jī jiŋaal un bi ŋmóò kpɔnɔb bin poon baa ŋá ŋkpɔnɔnyɔkɔee. Iwiin in m yóoǹ-ni Abiibi ŋmaliu poonee, ní dāá dū iwiin iluli kí ŋmɔ́ kpɔnɔb bin kaa cáá ŋkpɔnɔnyɔkɔee, kii m nín tīī-ni mara puee. Di sá yii uŋmal gbanti poon ní ni nyáń Eejipiti tiŋkin. Ní taa dāan̄ m-nimbiin iŋaŋkulim. 16 Ni yaa láa bíi cēē ni-kpaajinti tin ni kùn̄ tipeepeekaalee, ní dāá jī kuceeu jiŋaaliu. Míǹ boon dibindi yaa láa kúntì ní ni yaa láa kóoǹ ni-kpaajinti kusaaun ki dóòyee, ní dāá jī tantib jiŋaaliu^h. 17 Dibindi kamaa poonee, ni-ninjab kɔkɔ ń dāá dāan̄ ŋfunyɔm mita man ni-Dindaan Unimbɔti nimbiin.

18 «Ní taa dū kpɔnɔ un poon ŋkpɔnɔnyɔkɔ kēe kí kūtì kuwaŋkuluu kun ni kūū ki ŋá-mi saraayee fatikuu pu. Ní taa dū kuwaŋkuluu kun ni dūu ŋá-mi saraayee kpam kí yóoń áli kutaa ń wúntí. 19 Ní cáań ni-Dindaan ni-Nimbɔtiu diikun ni-kpaatanti nín lòon̄ tiŋyee jincɔ̀fikaati. Ní taa dū uŋoobu biim kí ŋàan̄ u-biki nantiⁱ.»

Ipoon nì tibɔkpaafikaal

20 «Kpèè, m làá tɔ̄ń m-tuuŋŋu ŋú lìntī ni-nyɔkɔpu kí nīn cí-ni kí cáá-ni kí cùnnì kitiŋ kin m bɔ́ntì ki yóoǹ-nee. 21 Ní kpèè tiŋan kí pīlifiǹ-ŋu, kí taa yìntīǹ-ŋu. Waa làá tàan̄-ni ni-pɔɔgbifiŋŋu pu. Di sá yii man yindi ní ŋu ŋúb́ ki tūǹ atuun. 22 Ama ni yaa tɔ́-ŋu mmɔntiimin, ki ŋáań tin kɔkɔ m bí yii ní ŋée, m làá nīn sá ni-nannanliibi nannanliu, ní kí nīn sá ni-pulincɔntiibi pulincɔnti.

23 «M-tuuŋŋu yaa láa līntì ni-nyɔkɔpu ki cáá-ni ki kɔ́ǹ Amɔɔr yab nì Eeti yab nì Peeriisi yab nì Kanaan yab nì Eefi yab nì Jeebusi yab timmunee, m làá dāá kúntí-bi. 24 Ní taa láa pée gbàan̄ bi-waaŋi nimbiin kí jāam̀-ŋi. Ní taa láa fōō bi-bimbim, ama ní dāá gbá kí wīī bi-waaŋi nì bi-taŋkpeeŋi ŋin bi cóoǹ ki jáaḿee. 25 Man ni-Dindaan ni-Nimbɔtiu baba ní ní dāá nīn jáaḿ. Niinee ní ḿ dāá bìin̄ ni-boon kí tīī-ni tijin nì tinyɔkaal, ní kí wúń ni-pu iween ń taa cúú-ni. 26 Ni-tiŋki poonee, naa làá dāá ká unimpu cáá dipool an nyáń àá unimpuŋmaŋŋmanti. M làá dāá tīī-ni mmaŋfafɔkɔn.

27 «M làá dāá dū dinyoondi kí lìntī ni-nyɔkɔpu, ntimu mun poon ni làá dāá kɔ́ee nib kɔkɔ ń fàŋkì, ní ni-nannanliibi bin dòoń kí jáǹ-nee ń dāá lábití kí sāǹ-ni. 28 M làá dāá dū abaakati kí tɔ̄ Eefi yab nì Kanaan yab nì Eeti yab pu. 29 Nì míǹ kɔkɔee, maa làá dāá jà bi-kɔkɔ dibimbaantiil poon. An yaa kaa sá míǹ, kitiŋ làá dāá kpántí kupɔɔu ní kumooun peelii ń dāá bùtī kí jà-ni. 30 M làá nīn pée jì-bi fiii fiii ní kí cáá sāā ŋyunti ŋun ni làá dāá bùtī tikpil kí fōō kitiŋee. 31 M làá yóoń ni-tiŋki kpaanyɔkɔ, kí yòon̄ Tikati mɔɔl kí cáá sāā Meediiteeranee tiŋkuu, kí fàtīí yòon̄ Siinaayi teeku kí cáá sāā Eefiraata. M làá dū ntimu gbanti kɔkɔ nib kí ŋá ni-ŋaan ní ní jà-bi ni-nimbiin. 32 Ni nì bi nì bi-waaŋi ń taa pée ŋá mpèé ŋubɔ. 33 Bí taa nín̄ kóò ni-tiŋkin, án nín làá ŋá pu bí taa yàntī ní yìntīǹ-mi kí jāam̀ bi-waaŋee. Di sá yii ni yaa jáam̀-ŋee, án làá kpántí kutaliŋŋu kí sàl̄-ni.»