Disaŋkindi 24

Unimbɔti pōoǹ Isirayeel yab dipoondi

1 Unimbɔti bí Mooyiisi yii: «Jɔ̄mìń m-cee, sii nì Aarɔn nì Nadaab nì Abiyuu nì Isirayeel yab kpilib imuŋku ita nì saalaayee. Ni yaa dòoń ki dáá bíń ndanee, ní gbàan̄. 2 Ama sii Mooyiisi baba ń sútiń kí pìl̄-mi. Bin kíǹee ń taa sútiń, ní samaa mun ń taa nóó-si kí jɔ̄mìń.» 3 Mooyiisi nìn cáá tibɔti nì marab bin kɔkɔ ti-Dindaan dàkā-uee ki máafì samaa. Ní samaa kíí nì kinyɔɔbaantii yii: «Tibɔti tin kɔkɔ ti-Dindaan sòon̄ee, ti làá ŋá míǹ.»

4 Mooyiisi nìn ŋmàn̄ tibɔti tin ti-Dindaan tùkū-uee. Kutaa wúntì kutaafaau pɔ̀lpɔlee, ní Mooyiisi máń nsaraafan dijoolee taapu. U nìn dū ataŋkpee saalaa nì ali, Isirayeel naakɔti nín sá puee, ní ki máń. 5 U nìn dū Isirayeel naacimpɔmbi biba ki tú bi cūtìi ŋá bisaraawɔkaabi. Bi nìn kūū inajaa mun ki ŋá mpèé saraabi. 6 Mooyiisi nìn dū tiwaŋkutee fatikuu dijandi ki ŋá disambilin, ní ki dū dijandi din kíǹee ki kpáatìi pɔ̀l̄ nsaraafan pu. 7 Boonee ní u yōoǹ dipoondi taŋkpapilinti ki kàan̄ mpɔn ki tīī samaa. Ní samaa kɔkɔ bí yii: «Tin kɔkɔ ti-Dindaan lēe, ti làá gbìl̄ kí tīiǹ-u kí ŋá míǹ.» 8 Niinee Mooyiisi dū fatiku ki yāaǹ samaa pu ki bí yii: «Kpèèmaan, fatiku nee di sá dipoondi din ti-Dindaan pūtì ki pōoǹ-ni ki tīī-ni marabee daaŋku^a.»

9 Mooyiisi ŋá míǹ ki dóòyee ní Aarɔn nì Nadaab nì Abiyuu nì Isirayeel yab kpilib binib imuŋku ita nì saalaayee nín jɔ́ḿ dijool yilpu. 10 Bi nìn ká Isirayeel yab Nimbɔtiu. U-taaŋi taapuee, an nìn bí kii dikɔl din bi dū ataŋkpamɔnti ŋin bi yíì safiir ŋi wāĺ kílkil ki bɔ̀ǹ kii kutagbɔŋuee ki nákáǹee ní. 11 Ti-Dindaan kaa nìn yāntì Isirayeel yab kpilibee kpíì. U nìn yāntì bi kpēē úǹ Unimbɔti, boonee ní bi jíń ki nyùn̄.

Mooyiisi bí ti-Dindaan cee dijool pu

12 Ti-Dindaan bí Mooyiisi yii: «Jɔ̄mìń m-cee dijool pu kí dāá yūĺ niin. M làá dū marab bin m ŋmàn̄ ataŋkpee pilinti puee kí tīī-si, á cáá dàkà Isirayeel yab.» 13 Niinee ní Mooyiisi yíkì kutaafaau u nì Joosuwa un u dūu ŋàl̄ u-bee, ní bi nín jɔ́ḿ Unimbɔti jool pu. 14 U tùkū Isirayeel kpilib yii: «Ní cīití-ti doo, timbi ń cù kí gítiń. Aarɔn nì Uur làá nīn bí ni-cee. Ubɔ yaa cáá tibee, udaan ń ká-bi.» 15 Ní Mooyiisi nín jɔ́ḿ, ní ditagbandi dɔ́miń ki bīiǹ dijool pu. 16 Ti-Dindaan nyooti nìn bí Siinaayi jool pu ní ditagbandi nìn bīī di-pu míǹ ki tin cáa sāā iwiin iluu. Ŋwinluluúti dalee ní ti-Dindaan yíiń Mooyiisi ditagbandee poon. 17 Ti-Dindaan nyooti tin nìn dɔ́miń Isirayeel yab ceeyee nìn bí kii ŋŋmi ŋun pɔ̄ɔ̄ kpaŋkpamee ní dijoolee yil pu. 18 Mooyiisi nìn kɔ́ ditagbandee poon ki nín jɔ́ḿ dijool pu. U nìn gbíntì dijool pu niin ki ŋá iwiin imuŋku ili, ŋwiimpu nì kunyeeu^b.