Disaŋkindi 25

BI NÍN LÀÁ CÓOŃ CIRCIR KƆŊKOOŊŊU PUEE 25–31

Isirayeel yab saraabi bin bi cáańee

1 Ti-Dindaan bí Mooyiisi yii: 2 «Tùkù Isirayeel yab yii bí lēē bi-gaajati tin bi cááyee poon kí ŋá-mi saraa. Bin kɔkɔ làá tīī nì dipɔbil dibee cee ní ní fōō. 3 Tin m là bí cáań kí ŋá saraayee di sá sindaariya nì animbil kúti nì tasa kúti, 4 nì bigulifamambi nì gulfab bin bí gùŋgumee nì bigulifamambi cínciŋ nì iŋaapiin in bí fálfalee nì tiŋɔkuti, 5 nì ipigban in bi mántèe, nì igban in dàfì tikpilee, nì akasiya dɔi, 6 nì ŋkpam min bi làá nīn cáa ŋáań fitilabinee, nì talaalu kpam min bi làá nīn cáa sìtī binib pu kí dū-bi kí sú man ni-Dindaanee, nì talaalub bin bi làá nīn tùutēe, 7 nì ataŋkpanyaan ŋin bi yíì ooniikisee nì ataŋkpanyaan aba mun bí dūú nákań eefoodi^a nì kilɔbiki kin pāantí usaraaŋakpil bindi puee. 8 Isirayeel yab ń gāā-mi circir kɔŋkooŋŋu, ní ḿ nīn kóò bi-kansikin. 9 M làá dàkà-si ni nín làá gāā ŋkɔŋkoon gbanti ń nīn bí puee, nì tin kɔkɔ làá nīn bí ŋu-poonee. Ní dāá ŋá m nín dàkā-ni puee deedee.»

Dipoondi dakaau

10 «Ní dāá dū akasiya dɔŋu kí kpáá dakaa. U-púuŋŋu ń nīn cáá meeta ubɔ nì santimeetab mmuŋku nì biŋmoo, u-waaŋŋu ń nīn cáá santimeetab biŋmoo kpá imuŋku inaa ní u-fɔkɔŋŋu ń nīn cáá santimeetab biŋmoo kpá imuŋku inaa. 11 Ní dū sindaariyamɔnti kí nyùntī poon nì boon, ní kí dū sindaariya kí kpākam̀ anyɔɔgbán. 12 Ní dū sindaariya kí mɔ́ɔ́ abɔmbil anaa kí báań dakaayee kpiŋŋi naatil dijandi diba abɔmbil ali, diba mun abɔmbil ali. 13 Ní kpítí akasiya kpandɔi kí dū sindaariya kí nyùntī-i. 14 Ní dū ikpandɔee kí bɔ̄ abɔmbil ŋin bá dakaayee kpiŋŋi an càatī bí ŋmā kí nīn yòontí ki bùkuntí. 15 Ikpandɔee ń nīn pée fúuń abɔmbilee poon bí taa fúutí. 16 Ní dū titaŋkpapilindi tin pu m ŋmàn̄ dipoondi marab ki làá dūú tīī-nee kí tàkan̄ dakaayee poon.

17 «Ní dū sindaariya kí mɔ́ɔ́ dakaayee bìil, di-púuŋŋu ń nīn cáá meeta ubɔ nì santimeetab mmuŋku nì biŋmoo ní di-waaŋŋu ń nīn cáá santimeetab biŋmoo kpá imuŋku inaa. 18 Ní dū sindaariya kí mɔ́ɔ́ keerubimbi bili kí tɔ́kɔń didakaabiilee nyɔɔgbaŋŋi liitil pu. 19 Ní mɔ́ɔ́ Keerubim ubɔ kí tɔ́kɔń didakaabiil nyɔɔgbandi diba nín kúntí puee, ní kí mɔ́ɔ́ Keerubim ubɔ mun kí tɔ́kɔń didakaabiil nyɔɔgbandi din kíǹee nín kúntí puee. Keerubimbi bin tɔ́kɔ́ anyɔɔgbán kúntilaŋki puee nì dakaayee bìil ń kpāfì kí nīn sá tiwambaantiil. 20 Bí kpátí bi-feeŋyi yilpu kí bìin̄ didakaabiil pu. Bí nīn tɔ́kɔ́ ki túĺ tɔb bi-nimbiiŋyi tīī didakaabiil pu. 21 Ni yaa dū dipoondi taŋkpapilinti tin pu m ŋmàn̄ dipoondi marab bin m làá tīī-see ki ŋá dakaayee poonee, ní dū dibìil kí púkuń. 22 Keerubimbi bili bin tɔ́kɔ́ didakaabiil puee kansikin ní m làá lēē m-ba kí dàkà-si, ní kí tīī-si marab á dūú nàatī Isirayeel yab.»

Kpɔnɔb bin bi ŋáań ti-Dindaan saraayee teebiliu

23 Ní dū akasiya dɔŋu kí kpáá teebil, u-púuŋŋu ń nīn cáá meeta ubɔ, u-waaŋŋu ń nīn cáá meeta dijandi, ní u-fɔkɔŋŋu ń nīn cáá santimeetab biŋmoo kpá imuŋku inaa. 24 Ní dū sindaariyamɔnti kí nyùntī-u, ní kí dū sindaariya kí nyùntī ikpaanceeti kɔkɔ kí tū. 25 Ní kí kpítí kidɔpampaŋ, kí nīn wāā kii santimeetab binii kí kpākam̀ anyɔɔgbán, kí dū sindaariya kí nyùntīí tū. 26 Ní mɔ́ɔ́ sindaariya bɔmbiliŋ anaa kí dūú bā kí nákáǹ teebilee kpiŋŋi naatil pu, ataa cee. 27 Abɔmbilee làá nīn nákáǹ teebilee kpaanceetii, ní bí dū ikpandɔ kí bɔ̄ abɔmbilee poon kí ŋmā kí nīn yòontí. 28 Ní dū akasiya dɔŋu kí kpítí ikpandɔ, kí dū sindaariya kí nyùntī-i. Íǹ ní ni làá nīn cáa yòontí teebilee. 29 Ní mɔ́ɔ́ palantab nì kɔɔpub nì asambil nì itúun bí nīn cáa ŋáań ndaam ki féeń ti-Dindaan. Ní dū sindaariyamɔnti kí mɔ́ɔ́ an wanti gbanti. 30 Teebil gbanti pu ní ni làá nīn cáá kpɔnɔb bin ni cáa ŋáań saraayee ki pāantí m-nimbiin baabadal^b.

Fitilab tɔ́kɔŋkaati tin cáá ikpiin ilulee

31 «Ní gbá sindaariyamɔnti kí dūú mɔ́ɔ́ fitila tɔ́kɔŋkaati. U-taapu nì u-kpinjaatiŋu nì u-kpiiŋyi nì u-gbiŋŋi nì u-pumpukum kɔkɔ ń nīn sá mmɔm. 32 Ikpiin iluu ń nyānní ŋkpinjaatee pu, dijandi kamaa ń nīn cáá ikpiin ita ita. 33 Fitilab tɔ́kɔŋkaati gbanti kpiiŋyi luutil kamaa ń nīn cáá ŋkɔŋkɔŋkuŋkumu muta mun náań nì asubil ŋin bi yíì amandee nì agbin nì mpumpukum. 34 Ŋkpinjaatee ń nīn cáá ŋkɔŋkɔŋkuŋkumu munaa mun náań nì asubil ŋin bi yíì amandee nì agbin nì mpumpukum. 35 Fitila tɔ́kɔŋkaati kpinjaatiŋu laakin ikpiin iluuyee dòoń ki kpáfí ili ilee ń nīn cáá digbindi diba. Ikpin ili ipeekaa nín kpáfí laakiŋyee digbindi diba, ililiiti nín kpáfí laakiŋyee digbindi diba, itataati nín kpáfí laakiŋyee digbindi diba. 36 Agbin nì ikpiinee nì fitilab tɔ́kɔŋkaati jaŋŋi ŋin kíǹee ń nīn sá mmɔm. Bí gbá sindaariyamɔnti kí dūú mɔ́ɔ́ tikɔkɔ. 37 Ní mɔ́ɔ́ fitilab biluli^c kí dūu tɔ́kɔń fitilab tɔ́kɔŋkaati pu, án nīn wāĺ nnimbiin pú. 38 Ní dū sindaariyamɔnti kí mɔ́ɔ́ tibabiti nì nsambiyaamu mun poon bi ŋáań ŋfantamee. 39 Ní dū sindaariyamɔnti kiiloobi mmuŋku nì saalaa kí mɔ́ɔ́ fitilab tɔ́kɔŋkaati nì ti-wanti kɔkɔ. 40 Á kpèè tiŋan kí ŋá tin bí nee kɔkɔ tí nīn bí kii min m dàkā-si dijool nee puee^d.»