Circir kɔŋkooŋŋu
26
1 «Á dū gulfab bin dàfì ki máǹ gùŋgumee nì bin máǹ cínciŋee nì bin máǹ wèeeeyee kí lù aŋaajan saalaa, kí lù keerubimbi kí nákań ŋi-pu. 2 Aŋaajanee fɔkɔŋŋu ń nīn sá meetab ubɔ kpá saalku, ŋi-waaŋŋu ń nīn sá meetab bili. Ŋi-kɔkɔ ń nīn ŋmà. 3 Á dá láá dū aŋaajan aŋmoo kí ŋáĺ kí kpāfì, ní boonee kí dū aŋmoo ŋin kíǹee mun kí ŋáĺ kí kpāfì. 4 Á dū ŋŋaacalimu mun máǹ gùŋgumee kí kpākam̀ aŋaajan aŋmoo ŋin bi ŋáĺ ki kpáfì mpeekaamee diŋaajandi din lúŋkèe nyɔɔgbandi, nì ŋin bi ŋáĺ ki kpáfì nliliitiimee din pééyee nyɔɔgbandi. 5 A nín ŋáĺ aŋaajan aŋmoo aŋmoo ki kpáfì puee kamaa nyɔɔgbandi ń nīn cáá ŋŋaacalimuee imuŋku ili nì saalaa, ní ajanliitilee ŋaacalimmu ń nīn ŋmà. 6 Á dū sindaariya kí mɔ́ɔ́ titábikaal imuŋku ili nì saalaa kí cúú ajanliitil kí kpāfì, án nín làá ŋá pu tanti kɔkɔ ń dūú ŋá tiwambaantiilee.7 «Boonee á dū tiŋɔkuti kí lù aŋaajan saalaa nì diba kí dūú ŋá tanti liliiti un làá nīn bìintí circir kɔŋkooŋŋu puee. 8 Diŋaajandi kamaa fɔkɔŋŋu ń nīn sá meetab saalku, ŋwaan ń nīn sá meetab bili. Ŋi-kɔkɔ fɔkɔŋŋu nì ŋi-waaŋŋu ń nīn ŋmà. 9 Á dū ajan aŋmoo kí ŋáĺ kí kpāfì ubaanti, ní kí dū aluu mun kí ŋáĺ kí kpāfì ubaanti. Á dū diŋaajandi diluluutiilee kí kpáb́ nnimbiin pú. 10 Á dū ŋŋaacalimu imuŋku ili nì saalaa kí kpākam̀ aŋaajan aŋmoo ŋin bi ŋáĺ ki kpáfèe diŋaajandi din lúŋkèe nyɔɔgbandi, nì aluu ŋin bi ŋáĺ ki kpáfèe din pééyee nyɔɔgbandi. 11 Á dū tasa kúti kí mɔ́ɔ́ titábikaal kí dūú nákań ŋŋaacalimu pu kí dūú cúú diŋaajandi din kíǹee kí táb́, ní án dūú ŋá tiwambaantiil. 12 Ŋwaan puee, aŋaajan ŋin a làá dūú kpāfì kí bìin̄ circir kɔŋkooŋŋu puee, dijandi diba làá kíǹ kí nīn jòon̄ boon pú fám. 13 Míǹ ní ŋŋaabu meeta dijandi làá kíń ŋfɔkɔn pu kí nīn jòon̄ ajanliitil pu kí bìin̄ circir kɔŋkooŋŋu kɔkɔ pu. 14 Á dāá mántí tipigban kí dūú bìin̄ tanti un bīī circir kɔŋkooŋŋu puee, ní kí dū ŋgban ŋun dàfèe kí páań.
15 «Á dū akasiya dɔŋu kí kpáá idɔjaati kí cóoń án nīn ŋúb́ circir kɔŋkooŋŋu. 16 Idɔjaatee fɔkɔŋŋu làá nīn sá meetab biŋmoo, ní i-waaŋŋu ń nīn sá santimeetab biŋmoo kpá imuŋku inaa. 17 Á cáká idɔ ili in làá càatēe taapui í nīn kɔ́ĺ tɔb ili ili. Á ŋá idɔjaatee kɔkɔ pu míǹ. 18 Á kpáá idɔjaati mmuŋku circir kɔŋkooŋŋu ŋgiil pú. 19 Á dū animbil kúti kí mɔ́ɔ́ titílkaal imuŋku ili. Tíǹ pu ní a nín kpáá idɔjaati puee làá nīn tɔ́kɔ́. A nín kpáá idɔjaati puee kamaa làá nīn cáá titílkaal tili tin poon ní laakin a cákée làá kɔ́ee. 20 Á gíti kpáá idɔjaati mmuŋku circir kɔŋkooŋŋu ŋgan pú. 21 Á dū animbil kúti kí mɔ́ɔ́ titílkaal imuŋku ili, ndɔjaati kamaa titílkaal tili. 22 Circir kɔŋkooŋŋu boon pú jandi din bí ŋwìiń jeetilaŋki púee, á dāá kpáá idɔjaati iluu kí cóoń. 23 Á dāá kpáá idɔjaati ili kí cóoń akpin pu poon pú án nīn tíkí circir kɔŋkooŋŋu. 24 Idɔjaati gbanti taapui làá nīn dátiǹ tɔb, ama ní kí tin dūú kpāfì yilpu dibɔmbibaantiilin. Míǹ ní idɔjaati liitilee làá nīn sá tiwambaantiil ní kí nīn sá titíkiŋkaal. 25 Mimmee idɔjaatee làá nīn sá inii dee, ní i-taapu tílkaati ń nīn sá saalku nì ubɔ, an dàkà yii ndɔjaati ŋubɔ titílkaal tili.
26 «Á dū akasiya dɔŋu kí kpítí ikalim iŋmoo kí cúú idɔjaati in a kpááyee circir kɔŋkooŋŋu jandi diba. 27 Á kpítí ikalim iŋmoo mun kí cúú dijandi din kíǹee, ní kí kpítí iŋmoo mun kí cúú boon ŋwìiń jeetilaŋki pú. 28 Ŋkalim ŋun bí kansikinee làá jītí idɔjaati in bi kpááyee kansikin nì kansikin ní, kí yòon̄ circir kɔŋkooŋŋu kílilaŋki kí tin cáá kátí. 29 Á dū sindaariya kí nyùntī idɔjaati in bi kpááyee nì ikalimee pu, ní kí dū sindaariya kí mɔ́ɔ́ mbɔmbiyaamu mun poon ní bi làá dū ikalimee kí bɔ̄ee. 30 Á gāā circir kɔŋkooŋŋu kii m nín dàkā-si min dijool pu nee deedee.
31 «Á dū gulfaman gùŋgum nì uman wèeee nì uman cínciŋ nì gulfa un bí fálfal ki dàfèe kí lù ŋŋaasakaŋkaa, kí lù keerubimbi kí nákań ŋŋaabuee pu. 32 Á dū-ŋu kí sàkan̄ akasiya dɔjaai inaa in bi dū sindaariya ki nyūntì ní sindaariya babikaati túuń animbil kúti tinaa tíĺ taapuee pu. 33 Á dū ŋŋaasakaŋkaayee kí lúntí tibábikaalee taapu.
«Ŋŋaasakaŋkaayee boon ní a làá dū Dipoondi dakaau kí yóoń. Ŋúǹ di làá yàkatī <circir laŋki> nì <circir páaa laŋkia.> 34 Á dū dibìil kí púkuń dipoondi dakaau pu <circir páaa laŋki>. 35 Á kɔ́ǹ teebil kí yóoń poon ŋŋaasakaŋkaa nimbiin circir kɔŋkooŋŋu ŋgan pú, ní ŋgiil púee, fitilab tɔ́kɔŋkaati ń nīn yú ki túĺ teebil.
36 «Á dū gulfa un bí fálfal ki dàfèe, nì un máǹ gùŋgumee nì un máǹ cínciŋee nì un máǹ wèeeeyee kí lù ŋŋaasakaŋkaa ŋubɔ mun, usatalul ń nyāantì-ŋu bí dūú sàkan̄ circir kɔŋkooŋŋu punyɔkɔki pu. 37 Á kpítí akasiya dɔjaai iŋmoo, kí dū sindaariya kí nyùntī-i kí dūú cóoń, ní kí dū titábikaal tin bi dū sindaariya ki mɔ́ɔ́yee kí bā, ní kí dū tasa kúti kí nyùntī titílkaal tiŋmoo kí tíĺ idɔjaatee taapu.»