Disaŋkindi 27

Nsaraafan

1 «Á dū akasiya dɔŋu kí kpáá nsaraafan ŋun cáá ajannaatil ŋmèe. Dijandi diba ń nīn cáá meetab bili nì dijandi, ní ŋu-fɔkɔŋŋu ń nīn sá meeta ubɔ nì dijandi. 2 Ŋu-jaŋŋi naatil kpiŋŋi puee, á kpítí kí lēē iyin án jɔ̄m̀, i nì nsaraafan ń nīn sá mmɔm, ní á dū tasa kúti kí nyùntī. 3 Á dū tasa kúti kí mɔ́ɔ́ tin kɔkɔ bi làá nīn cáa tūǹ nsaraafan pu tundee. An dàkà yii asambil ŋin poon bi làá nīn fà ŋkpam min bi wùn̄ee fantam ki ŋáańee nì peelab nì asambil ŋin poon bi làá nīn ŋáań fatiku ki cáa yàantée, nì njiimu mun cáá anyinee nì nsambiyaamu mun poon bi tùutī talaaluee. 4 Á dū tasa kúti kí mɔ́ɔ́ kilàaŋ́ŋi ní kí ŋá ki-jaŋŋi naatil pu abɔmbil 5 kí dūú nákań nsaraafan taapu kí màntīí tū ní án jɔ̄mìń kí dāá ŋmàntī ŋu-kansikin. 6 Á dū akasiya dɔŋu kí kpítí ikpandɔ, kí dū tasa kúti kí nyùntī-mu. 7 Á dū ikpandɔee kí bɔ̄ abɔmbil ŋin bí nsaraafan jaŋŋi puee poon bí ŋmā kí nīn yòontí-ŋu. 8 Á dū ndɔ kí kpáá nsaraafan gbanti, ŋu-poon ń nīn dɔ̄ fám tiba ń taa nín kā. Á kpáá-ŋu kii m nín dàkā-si dijool nee pu á kpáá puee.

Circir kɔŋkooŋŋu cindi ŋaabui

9 «Á yàntī circir kɔŋkooŋŋu ń nīn cáá dicindi. Á dū gulfa un dàfèe kí lù satab kí dūú bàkā ŋgiil pú, ŋfɔkɔn ń nīn sá meetab imuŋku ili nì saalaa. 10 Á dū mbɔmbilɔ̀kɔkaamu nì tibakaal tin bi dū animbil kúti ki mɔ́ɔ́yee kí cúú satabee kí dūú sàkan̄ idɔjaa mmuŋku in bi dū tasa kúti ki mɔ́ɔ́yee pu. Idɔjaayee làá nīn cáá titílkaal mmuŋku tin bi dū tasa kúti ki mɔ́ɔ́yee. 11 Á ŋá míǹ mbaantiim ŋgan pú jandi mun. Niin mun ń nīn cáá satab meetab imuŋku ili nì saalaa ki sàkā idɔ mmuŋku in tílkaati sá tasa kútee, nì in pu animbil kúti bɔmbilɔkɔkaamu nì ti-bakaati bée. 12 Circir kɔŋkooŋŋu ŋwaan pu ŋwìiń jeetilaŋki watilee, satab fɔkɔŋŋu ń nīn sá meetab mmuŋku nì biŋmoo, kí nīn sàkā idɔjaa saalaa in tɔ́kɔ́ titílkaal saalaa mun puee. 13 Circir kɔŋkooŋŋu cindi ŋwaan pu dijandi din bí ŋwìiń nyalaŋki watilee mun ń nīn cáá meetab mmuŋku nì biŋmoo. 14 Dijandi diba pú satab fɔkɔŋŋu ń nīn sá meetab biluli nì dijandi, nì idɔjaa ita nì i-taapu tílkaati tita. 15 Dijandi din kíǹee pú satab fɔkɔŋŋu ń nīn sá meetab biluli nì dijandi, nì idɔjaa ita nì i-taapu tílkaati tita. 16 Circir kɔŋkooŋŋu mɔŋkiŋu punyɔkɔ ŋaasakaŋkaaŋu fɔkɔŋŋu ń nīn sá meetab saalaa. Á dū gulfa un dàfì kí máǹ gùŋgumee, nì un máǹ cínciŋee, nì un máǹ wèeeeyee kí nyāantì-i. Í nīn sàkā idɔjaa inaa in tɔ́kɔ́ titílkaal tinaa mun puee. 17 Á dū tibakaal tin bi dū animbil kúti ki mɔ́ɔ́yee kí cúú idɔjaa in bi cóoǹ ki māntìi tú circir kɔŋkooŋŋu cindee kí kpāfì. Á dū animbil kúti kí mɔ́ɔ́ mbɔmbilɔ̀kɔkaamuee, ní kí dū tasa kúti kí mɔ́ɔ́ idɔjaa tílkaati. 18 Circir kɔŋkooŋŋu cindi púuŋŋu fɔkɔŋŋu ń nīn sá meetab imuŋku ili nì saalaa, ŋu-waaŋŋu ń nīn sá mmuŋku nì biŋmoo, ní aŋaajan fɔkɔŋŋu ń nīn cáá meetab bili nì dijandi. Idɔjaa tílkaati ń nīn sá tasa kúti. 19 Á dū tasa kúti kí mɔ́ɔ́ tin kɔkɔ bi làá nīn cáa tūǹ circir kɔŋkooŋŋu poon tundee ki kpáaǹ circir kɔŋkooŋŋu kpakpaaŋi nì ŋu-cindi yaŋ.»

Circir kɔŋkooŋŋu fitilab kpam

20 «Á tùkù Isirayeel yab yii bí cáań-si ɔliifi kpam min ŋān̄ ki wāĺ kílkilee á nīn cáa sìtī fitilab poon, án nín làá ŋá pu fitilab ń nīn pée fòol̄ ŋyunti kamaayee. 21 Aarɔn nì u-jipɔmbi ń dāá dū fitilab tɔ́kɔŋkaati kí yóoń circir kɔŋkooŋŋu poon ŋŋaapìtikaa ŋun lìkī baa wāĺ Dipoondi dakaauee nimbiin. Aarɔn nì u-jipɔmbi ń bɔ́ntí fitilab gbanti tiŋan án nín làá ŋá pu bí nīn pée fòol̄ ŋyunti kamaa m-nimbiin kí yòon̄ kujoou kí cáá sāā kutaafaauee. An sá mara ní m yóoǹ Isirayeel yab bí nīn ŋáań míǹ kí nīn pée cáa cá jaanjaan.»