Disaŋkindi 28

Bisaraaŋaliibi wampeeŋkaati

1 «Á yàntī a-nabiki Aarɔn nì u-jipɔmbi, Nadaab nì Abiyuu nì Eeleeyasaar nì Itamaar ń dāan̄ a-cee. Á gàntī-bi Isirayeel yab kansikin bí nīn tūǹ man saraaŋatundi. 2 Á ŋáĺ a-nabiki Aarɔn circir wampeeŋkaati án nīn cáá kunyaaŋŋu ki dàkà usaraaŋakpil nyooti. 3 Á sòoǹ nì bitɔntɔnliibi bin kɔkɔ m gbéeǹ iciin famee, kí yàntī bí ŋáĺ Aarɔn tiwampeeŋkaal. Ú dāá nīn pēē-tì ní á dū-u kí sú-mi ú nīn bí man saraaŋatundin. 4 Tiwampeeŋkaal tin a làá yàntī bí ŋáĺ-uee di sá kilɔbiki kin làá nīn pá u-bindi puee nì eefoodi nì dibɔkutifɔkɔl nì poon bɔkutil nì ŋŋaabu ŋun u làá nīn cáa fìǹ u-yilee nì ŋŋaabu dambalau. Á yàntī bí ŋáĺ tiwan gbanti kí tīī Aarɔn nì u-jipɔmbi bí nīn tūǹ man saraaŋatundi. 5 Bí dū gulfab bin cáá sindaariya nyimee nì bin máǹ gùŋgumee, nì bin máǹ cínciŋee nì bin máǹ wèeeeyee nì bigulifapimbi bin dàfèe, kí lù tiwampeeŋkaal gbanti.»

Eefoodi

6 «Bitɔntɔnliibi ń dū gulfab bin cáá sindaariya nyimee nì bin máǹ gùŋgumee nì bin máǹ cínciŋee nì bin máǹ wèeeeyee nì bigulifapimbi bin dàfèe kí lù eefoodi. 7 Bí ŋáĺ ŋŋaacalimu muli kí bā ajan liitil nyɔɔgbaŋŋi bí nīn cáa cútí. 8 Bí ŋáĺ eefoodi nì dambala un u làá nīn cáa cútée ń nīn sá tiwambaantiil. Bí dū gulfab bin cáá sindaariya nyimee nì bin máǹ gùŋgumee nì bin máǹ cínciŋee nì bin máǹ wèeeeyee nì bigulifapimbi bin dàfèe kí ŋáĺ dambala mun. 9 Á dū ataŋkpanyaan ŋin bi yíì soowamee ali, kí dū kigaai kí ŋmà Jaakɔb jipɔmbi yiŋŋi ataŋkpeeyee pu. 10 Á ŋmà ditaŋkpapeekaal pu ayin aluu, ní kí ŋmà dililiitiil mun pu ayin aluu, án nīn nóó Jaakɔb jipɔmbi nín kpíǹ kpíǹ tɔb puee. 11 Á dū kigaai kí cáká Jaakɔb jipɔmbi yiŋŋi ataŋkpeeyee pu kii bi nín cákà kijalii puee, ní kí mɔ́ɔ́ sindaariya sɔnti kí dūú fúuń. 12 Á dūú bā ŋŋaacalimu mun bi ŋáĺ ki tábíǹ eefoodee. Ataŋkpeeyee di làá nīn sá kii kudaaŋŋu ki téetí Jaakɔb jipɔmbi pu. Mimmee bi-yiŋŋi làá nīn náká Aarɔn gbigbipati liitil pu man ni-Dindaan nimbiin, ní ḿ nīn pée téetí bi-pu. 13 Á dū sindaariya kí mɔ́ɔ́ tisɔnee liitil, 14 ní kí dū sindaariyamɔnti kí mɔ́ɔ́ ikusaka ili mpalimu yam kí dūú cúú tisɔn tin poon ataŋkpeeyee fúuńee.»

Kilɔbiki kin pāantí usaraaŋakpil bindi puee

15 «Á yàntī bitɔntɔnliibi ń dū gulfab bin cáá sindaariya nyimee, nì bin máǹ gùŋgumee nì bin máǹ cínciŋee nì bin máǹ wèeeeyee nì bigulifapimbi bin dàfèe kí lù kilɔbiki kin pāantí usaraaŋakpil bindi puee kí nákań eefoodi pu. 16 Kilɔbiki gbanti jaŋŋi naatil ń nīn ŋmà ní dijandi kamaa ń nīn cáá santimeetab mmuŋku nì biŋmoo. 17 Á dū ataŋkpanyaan kí nákań ikuul inaa ki-pu kí nyāantì-kì. Ŋkuupeepeekaa ń nīn sá ataŋkpanyaan ŋin bi yíì oodeemee, nì ŋin bi yíì piitidaayee nì ŋin bi yíì bareekeetee. 18 Ŋkuuliliiti ń nīn sá ataŋkpanyaan ŋin bi yíì noofeekee, nì ŋin bi yíì safiiree nì ŋin bi yíì yaaliimee. 19 Ŋkuutataatee ń nīn sá ataŋkpanyaan ŋin bi yíì leeseemee nì ŋin bi yíì seebooyee nì ŋin bi yíì alamaayee. 20 Á dū ataŋkpanyaan ŋin bi yíì taarsiisee nì ŋin bi yíì soowamee, nì ŋin bi yíì yaasipee kí nákań ŋkuunanaati pu. Á dū sindaariya kí mɔ́ɔ́ tisɔn tin poon a làá dū ataŋkpanyaanee kí fúuńee. 21 Á dū kigaai kí cáká Jaakɔb jipɔmbi saalaa nì bilee yiŋŋi ataŋkpanyaanee pu kii bi nín cákà kijalii pu puee. Ditaŋkpanyaandi kamaa puee, á ŋmà kunaakoou kubɔ yindi, di sá tinaakɔti sá saalaa nì tili ní.

22 «Á dū sindaariyamɔnti kí mɔ́ɔ́ ikusaka ili mpalimu yam kí dūú cúú kilɔbikee. 23 Á dū sindaariya kí mɔ́ɔ́ mbɔmbiyaamu muli kí túuń kilɔbikee nyɔɔgbaŋŋi liitil. 24 Á dū sindaariya kusakayee kí bɔ̄ mbɔmbiyaamu muli mun túuń kilɔbikee nyɔɔgbaŋŋi buŋyin, 25 ní kí dū anyɔɔgbán ali ŋin kíǹee kí bā sindaariya sɔnti tili tin poon ní ataŋkpanyaan fúuń eefoodi ŋaacalimmu puee, ní an nīn bí kilɔbikee nyɔkɔpu. 26 Á dū sindaariya kí gíti mɔ́ɔ́ mbɔmbiyaamu muli kí dūú bā kilɔbikee nyɔɔgbaŋŋi taapu jandi án nīn nákáǹ eefoodi. 27 Á dū sindaariya kí mɔ́ɔ́ mbɔmbiyaamu muli mun kí dūú bā iŋmii in bí eefoodi ŋaacalimmu puee taapu nnimbiin pú, laakin bi ŋáĺ ki táb́ee caŋin. Mbɔmbiyaamu gbanti làá nīn bí eefoodi dambalau yilpu pu ní. 28 Á dū gulfaman gùŋgum ŋmiiŋu kí bɔ̄ kilɔbiki bɔmbiliŋ nì eefoodi bɔmbiliŋin kí kúĺ, ní kilɔbikee ń nīn pá eefoodi dambalau pu ki pɔ̄ɔ̄ kaa cìŋkī.

29 «Ŋyunti kamaa Aarɔn yaa kɔ́ circir kɔŋkooŋŋunee, Jaakɔb jipɔmbi yiŋŋi làá nīn náká kilɔbiki kin pá u-bindi puee. Mimmee man ni-Dindaan làá nīn pée téetí ni-pu. 30 Á dū Uriim nì Tumiim^a kí ŋá kilɔbiki kin pá usaraaŋakpil bindi puee poon. Mimmee án làá nīn pá u-bindi pu ŋyunti ŋun u yaa làá kɔ́nní m-nimbiinee. Di sá yii u yaa bí m-nimbiinee, an máaǹ kí nīn pée pá u-bindi pu ní ú ŋmā kí béé min ní m là Isirayeel yab ń ŋée.»

Asaraaŋabɔkuti ŋin kíǹee

31 «Boonee á dū gulfab bin máǹ gùŋgumee kí lù dibɔkutifɔkɔl din pu eefoodi làá nīn pée. 32 Á lēē di-kansikin kinyɔkɔ, u yaa làá pèen̄ee ú dū u-yil kí bɔ̄ niin. Á lù kinyɔkɔee nyɔɔgbaŋŋi ń nīn gbìfì ki dàfì kí taa ŋmā kí cátí. 33 Á dū gulfab bin máǹ gùŋgumee nì bin máǹ wèeeeyee nì bin máǹ cínciŋee kí lù asubil ŋin bi yíì greenaadee kí lúntí dibɔkutilee júti taapu kí màntīí tū, ní kí dū sindaariya waŋkilimmu mun kí lúntí dibɔkutilee júti taapu kí màntīí tū. 34 Á dū sindaariya waŋkilimmu nì greenaadi subiliŋ ŋin ni lùn̄ee kí lúntí dibɔkutil júti taapu kí nīn sākantí kí màntīí tū. 35 Aarɔn yaa làá kɔ́ circir kɔŋkooŋŋun kí ŋá saraabi kí tīī-mee, ú nīn pēē dibɔkutil gbanti ní bí nīn gbìl̀ ŋwaŋkilimu siim pu, ní u yaa làá tí nyēē bí nīn gbìl̀ mu-pu. Mimmee waa làá kpú.

36 «Á dū sindaariyamɔnti kí nyùntī kí nántiǹ mpumpukum, ní kí ŋmà an pu kii bi nín ŋmà kijalii pu puee yii: <Bi dū-u ki sú ti-Dindaan>. 37 Á dū gulfa un máǹ gùŋgumee kí lù kiŋaacaliŋ kí dūú cúú kí nákań ŋŋaabu ŋun u cáa fìǹ u-yilee nyɔkɔpu pú. 38 Sindaariya pumpukumee làá nīn pée bí Aarɔn yigbeel pu, án nín làá ŋá pu ú fōō Isirayeel yab nín yīntiǹ circir wanti tin kɔkɔ bi cáań ki ŋá saraayee kpitii kí túńee. Sindaariya pumpukumee làá nīn pée bí u-yigbeel pu ní man ni-Dindaan ń nín fōō saraabi gbanti.

39 «Boonee á dū ŋŋaapiin ŋun bí fálfalee kí ŋáĺ Aarɔn bɔkutifɔkɔl poon yal, ní kí dū ŋŋaapiin ŋun bí fálfalee kí lù ŋŋaabu ú nīn cáa fìǹ u-yil ní kí ŋáĺ ŋŋaabu dambalau kí gbá-u.

40 «Ní ŋáĺ tiwan gbanti tibaantiil, an dàkà yii dibɔkutifɔkɔl poon yal nì dambala nì ŋŋaabu ŋun bi cáa fìǹ diyilee kí tīī Aarɔn jipɔmbi, án nīn cáá kunyaaŋŋu kí dàkà usaraaŋal nyooti.

41 «Á dū asaraaŋabɔkuti gbanti kí pèen̄ a-maan Aarɔn nì u-jipɔmbi. Á sìtī bi-yiliŋ ŋkpam kí dū-bi kí sú-mi bí nīn bí m-tundin. Mimmee a dū-bi ki sú-mi bi kpántì m-saraaŋaliibi dee. 42 Á dū ŋŋaapiin ŋun bí fálfalee kí ŋáĺ-bi ncukutigimu kí bìin̄ bi-cancaŋgbeel pu, kí yòon̄ bi-caŋ kí cáá sāā bi-tapaŋŋi. 43 Aarɔn nì u-jipɔmbi yaa làá kɔ́ circir kɔŋkooŋŋun àá bi yaa làá sútí kí pìl̄ nsaraafan kí tɔ̄ circir laŋki ditundee, bí dū ncukutigimuee kí lòon̄. Mimmee baa làá ŋá ikpiti in làá cáań-bi ŋkúmee. Án nīn sá mara un kaa kpántée ki tīī Aarɔn nì u-naantiibi bin làá dāá páań u-boonee.»