Disaŋkindi 29

Bi dū bisaraaŋaliibi ki sú ti-Dindaan

1 «A nín làá dī pu ní kí dū Aarɔn nì u-jipɔmbi kí sú-mi bí kpántí man saraaŋaliibee sèé.

«Á yòon̄ dinajapɔmbil nì ipijaa ili in laaba kaa wɔ̀b̄ee, 2 nì kpɔnɔ un kaa cáá ŋkpɔnɔnyɔkɔee, nì kalaabi bin bi dū ŋkpam ki ŋmālim̀ ki búuń ŋkpɔnɔnyɔkɔ kpá poonee, nì ŋkpɔnɔwaamu mun pu bi yɔ́kɔfì ŋkpam ki púĺ ŋkpɔnɔnyɔkɔ kpá poonee. Bilee yim ní bí dūú ŋá an kɔkɔ. 3 Á dū kɔkɔ kí ŋá kukabiku kubɔn kí cáań circir kɔŋkooŋŋun, kí kpáaǹ dinajapɔmbil nì ipijaa ilee.

4 «Á cáań Aarɔn nì u-jipɔmbi circir kɔŋkooŋŋu punyɔkɔki nyɔkɔpu kí fàl̀-bi nnyim bí nyā kí nīn bí circir. 5 Á dū abɔkuti ŋin bi ŋáĺ ki dūu sú-mee kí pèen̄ Aarɔn, an dàkà yii poon bɔkutil nì dibɔkutifɔkɔl nì eefoodi nì kilɔbiki, ní kí dū eefoodi dambalau kí cúú. 6 Á dū ŋŋaabu kí fìn̄ u-yil ní kí dū tikpáakaal tin dàkà yii bi dū-u ki sú-mee kí cúú ŋŋaabuee. 7 Míǹ boonee ní á yòon̄ ŋkpam min bi cáa sìtī unil yilpu kí dū-u kí sú-mee kí sìtī u-yil pu. 8 A yaa ŋá míǹ ki dóòyee ní á yàntī u-jipɔmbi ń sútiń kí pìl̄-si, ní á dū bi-bɔkutiŋ poon yaŋ kí pèen̄-bi. 9 Á dū bi-dambalab kí gbìn̄-bi, ní kí dū bi-fuulimmu kí cíkiń-bi. Míǹ boonee á dū Aarɔn nì u-jipɔmbi kí kàan̄ bí nīn bí m-tundin.

Kí yòon̄ ŋyunti gbantee, bi kpántì m-saraaŋaliibi dee kí nīn cá jaanjaan.

10 «Á cáań dinajapɔmbilee dikpafindi tantiu nyɔkɔpu, ní Aarɔn nì u-jipɔmbi ń dū bi-ŋalii kí páań di-yil pu. 11 Á làntì dinajapɔmbilee man nimbiin niin circir kɔŋkooŋŋu punyɔkɔki nyɔkɔpu. 12 Á lēē fatiku kí dū a-ŋambiki kí sēē kí jòotì nsaraafan yiŋyi naatil pu. Boonee ní á kpáatí fatiku un kíǹee kí pɔ̀l̄ nsaraafan taapu. 13 Á yòon̄ ŋkpam min kɔkɔ bīī ina puee nì mpɔɔlam nì aceebil liitil nì ŋkpam min bīī ŋi-puee kí cáá wà ŋŋmi nsaraafan pu. 14 An di làá nīn sá bisaraaŋaliibi kpitii pɔ̄tam saraau. Ama á yòon̄ dinajapɔmbilee nanti nì di-gbaŋŋu nì di-binti kɔkɔ kí cáá wà ŋŋmi dinaapaal kpaanceetiŋu.

15 «Boonee ní á cáań upijapeekaa ní Aarɔn nì u-jipɔmbi ń dū bi-ŋalii kí páań di-yil pu. 16 Á làntì-dì, ní kí dū fatiku kí yàaǹ nsaraafan kɔkɔ pu kí màntīí tū. 17 Á càkà di-nanti anaŋkún anaŋkún, kí fíntí di-nai nì di-yakaŋ kí dūú páań anaŋkúnee nì diyil pu. 18 Á dū upijamɔnee kí wà ŋŋmi nsaraafan pu. An di sá saraawɔkaa un ni ŋá ki tīī-mee, saraa un sɔnsɔfiŋu sɔ̀ŋkī man ni-Dindaan pɔbilee^a.

19 «Boonee ní á cáań upìjaliliiti, ní Aarɔn nì u-jipɔmbi ń dū bi-ŋalii kí páań upìjee yil pu. 20 Á làntì-u kí lēē fatiku kí jōō Aarɔn nì u-jipɔmbi tafalam ŋŋaŋgiil yaŋ pu, nì bi-ŋambijaliŋ ŋŋaŋgiil yaŋ pu nì bi-taŋambijaliŋ ŋŋaŋgiil yaŋ pu, ní kí dū fatiku kí yàaǹ nsaraafan kɔkɔ pu kí màntīí tū. 21 Á dāá lēē fatiku un bí nsaraafan puee nì ŋkpam min bi cáa sìtī binib yiliŋ pu kí dū-bi kí sú-mee, kí yàaǹ Aarɔn nì u-bɔkutiŋ pu, ní kí yàaǹ u-jipɔmbi nì bi-bɔkutiŋ pu. Mimmee a dū Aarɔn nì u-jipɔmbi nì bi-wampeeŋkaati ki sú-mi dee. 22 Á dāá lēē upìjee kpam nì dijugbindi nì ŋkpam min bīī ina puee, nì mpɔɔlam nì aceebil nì ŋkpam min bīī ŋi-puee, nì diŋaŋgiitaal, kun puee an sá upìja un bi dūu ŋá saraa kí kàan̄ bisaraaŋaliibi bí nīn bí m-tundinee ní. 23 Á lēē kpɔnɔb bin bi púĺ kaa ŋá ŋkpɔnɔnyɔkɔ poon an kā kukabikun ki yú m-nimbiinee ubɔ, nì ŋkpɔnɔwaamu mun pu bi yɔ́kɔfì ŋkpam ki púĺ ŋkpɔnɔnyɔkɔ kpá poonee ubɔ, nì kalaabi bin bi dū ŋkpam ki ŋmālim̀ ki búuńee ubɔ. 24 Á dū tiwan gbanti kɔkɔ kí ŋúbiǹ Aarɔn nì u-jipɔmbi ní kí yàntī bí dúkutí yilpu kí fíiǹ fíiǹ man ni-Dindaan nimbiin. 25 Boonee, á fàtīí fōō bi-ŋaan kí dūú kūtì saraawɔkaa un pá nsaraafan puee kí wà ŋŋmi. An saraau sɔnsɔfiŋu sɔ̀ŋkī man ni-Dindaan pɔbil ní. 26 Á yòon̄ upìjaliliiti un a dūu ŋá Aarɔn yil pu saraa ki dū-u ki sú-mee bindi kí dúkutí kí fíiǹ fíiǹ man ni-Dindaan nimbiin. Dijandi gbantee, á yòon̄, a-yati dee.

27 «Á dū upìja un a dūu ŋá saraa ki kāaǹ Aarɔn nì u-jipɔmbi disaraaŋal tundinee bindi din a fíiǹ fíiǹee nì u-ŋaŋgiitaal din a lēēyee kí sú man ni-Dindaan. 28 Án sá mara ní m yóoǹ ki tīī Isirayeel yab kí nīn pée cáa cá jaanjaan, yii mpèé saraabi bin bi làá nīn ŋáań ki tìì-mee, bí nīn lèekī tinan gbanti míǹ ki tìì Aarɔn nì u-jipɔmbi.

29 «Aarɔn kúm boonee, u-saraaŋabɔkutiŋ làá nīn sá ki tīī u-jipɔmbi ní. Bí dāá pèen̄-ŋi ŋwiin ŋun bi làá sìtī bi-yil pu ŋkpam kí dū-bi kí sú-mi bí kíĺ disaraaŋal tundee. 30 U-jipɔmbi kansikin un làá fōō u-yil kí kpántí usaraaŋakpil kí kɔ́ dikpafindi tantiun kí lēē saraa <circir laŋkee> ń dāá pèen̄ asaraaŋabɔkuti gbanti iwiin iluli.

31 «Á dū upìjaliliiti un bi dūu ŋá saraa ki kāaǹ usaraaŋakpil ú nīn bí m-tundinee nanti kí tɔ́kɔń mpaan ŋun bi lēē ŋu sá circiree. 32 Ní Aarɔn nì u-jipɔmbi ń ŋmɔ́ tinan gbanti nì kpɔnɔb bin kā kukabikunee dikpafindi tantiu punyɔkɔki nyɔkɔpu. 33 Bí ŋmɔ́ tin ní bi dūu ŋá saraa bí ká bi-kpitii pɔ̄tam kí dū-bi kí sú-mi bí kíĺ disaraaŋal tundee. Unifantanti ń taa jī saraabi jinti gbanti, di sá yii tì sá circir ní. 34 Saraa un bi ŋá ki kāaǹ-bi bisaraaŋaliibee nanti nì kpɔnɔb yaa kíǹ ní kutaa wúntèe, bí dūú wà ŋŋmi. Bí taa jī tijin gbanti, di sá yii tì sá circir ní.

35 «Á ŋá Aarɔn nì u-jipɔmbi kí nóó nì m nín tīī-si mara puee deedee. Á dū iwiin iluli kí ŋá akoobil ŋin sá á ŋá-bi ní bí nín kpántí bisaraaŋakpilibee.

36 «Ŋwiin kamaayee, á dū unaja kí ŋá ikpiti pɔ̄tam saraau, ní kí ŋá saraa nsaraafan pu kí ŋá-ŋu circir. Boonee á dū ŋkpam kí sìtī ŋu-pu kí dū-ŋu kí sú-mi. 37 Á dū iwiin iluli ní kí ŋá akoobil gbanti mun. Míǹ boonee nsaraafan kpántì circir páaa dee ní tin kamaa yaa pée gbēē-ŋuee kpántì circir wanti.»

Ŋwiin kamaa saraawɔkaabi

38 «Saraabi bin a làá bɔ́ntí kí páań nsaraafan puee sèé. Ŋwiin kamaayee, á dū apibil ali ŋin cáá dibindi dibee kí ŋá saraa nsaraafan pu. 39 Á dū diba kí ŋá saraa kutaafaau, ní kí dū din kíǹee kí ŋá saraa kujoou. 40 Á dū ŋyim kiiloobi bita kí dū ɔliifi kpam min wāĺ kílkilee liitiri ubɔ nì dijandi kí búuń ŋyimee kí dūú kūtì dipibipeepeekaalee pu kí ŋá saraa. Á dū ndamam liitiri ubɔ nì dijandi mun kí fá saraapeekaayee ŋátam poon. 41 Saraaliliitee, kujoou ní a làá ŋá úǹ kí tīī-mi. Tiwan tin kɔkɔ a kútì ki ŋá saraapeepeekaayee, tíǹ tibaantiil ní a làá tí dūú kūtì kí ŋá saraaliliiti mun. An di sá saraawɔkaa un sɔnsɔfiŋu sɔ̀ŋkī m-pɔbilee. 42 Saraawɔkaa gbanti ní ni làá nīn pée ŋáań kí nīn cáa cá jaanjaan circir kɔŋkooŋŋu punyɔkɔki nyɔkɔpu man ni-Dindaan nimbiin. Niin ní man nì ni làá nīn kpáfí ní ḿ nīn sòoǹ nì si.

43 «Man nì Isirayeel yab làá kpāfì mpaan gbanti pu, ní m-nyooti ń dāá ŋá mpaan gbanti circir. 44 M làá dāá ŋá dikpafindi tantiu nì nsaraafan circir, ní kí ŋá Aarɔn nì u-jipɔmbi circir bí nīn bí m-saraaŋatundin. 45 M làá dāá nīn kóò Isirayeel yab kansikin, ní kí nīn sá bi-Nimbɔtiu. 46 Bi làá dāá béé yii man bi-Dindaan di sá bi-Nimbɔtiu un di nyántìń-bi Eejipiti tiŋkin kí nīn kóò bi-kansikinee.

«Man di sá bi-Dindaan bi-Nimbɔtiu.»