Disaŋkindi 30

Talaalutuukaa saraafaŋŋu

1 «Boonee á dū akasiya dɔŋu kí kpáá nsaraafan ŋun pu bi làá nīn tùutī talaalubee. 2 Á kpáá-ŋu ŋu-jaŋŋi naatil ń nīn ŋmà, dijandi kamaa ń nīn cáá dimeetajandi ní ŋfɔkɔn ń nīn sá meeta ubɔ. Nsaraafan nì ŋu-yiŋyi ń nīn sá mmɔm. 3 Á dāá dū sindaariyamɔnti kí nyùntī ŋu-yilpu nì ŋu-boon kí màntīí tū nì ŋu-yiŋyi, ní kí dū sindaariya kí kpākam̀-ŋu kí màntīí tū. 4 Á mɔ́ɔ́ sindaariya bɔmbiliŋ ali kí bā bi nín kpákám̀ nsaraafan taapu puee ajan liitil pu, bí nīn cáá ikpandɔ ki bōotí ki yòontí-ŋu. 5 Á dū akasiya dɔŋu kí kpítí ikpandɔee ní kí dū sindaariya kí nyùntī-i. 6 Á dū nsaraafan gbanti kí yóoń ŋŋaasakaŋkaa ŋun lìkī Dipoondi dakaau nì u-bìilee nimbiin, laakin man nì si làá nīn kpáfée. 7 Kutaafaau kamaa Aarɔn yaa kɔ́ kí ŋāŋkì fitilabee, ú péé péé kí tūū talaalub nsaraafan gbanti pu kí wàatī. 8 Kujoou kamaa u yaa làá tí tūū fitilabee ú tí ŋá míǹ. Ní nīn pée tùutī talaalub man ni-Dindaan nimbiin míǹ kí nīn pée cáa cá jaanjaan. 9 Ní taa tūū talaalu ubɔ fám nsaraafan gbanti pu. Ní taa ŋá saraawɔkaa ŋu-puɔɔɔ, kí taa ŋá tijimpin saraau ŋu-puɔɔɔ, kí taa fá ndamam ŋu-pu. 10 Dibindi kamaayee, Aarɔn ń dū kuwaŋkuluu kun u dūu ŋá ikpiti pɔ̄tam wiŋkpaaŋŋu saraauee fatikuu kí fá nsaraafan yiŋyi pu kí ŋá-i circir. Kí nīn pée cáa cá jaanjaanee, ní nīn ŋáań ikpiti pɔ̄tam saraau ki ŋáań nsaraafan circir diba dibindi kamaa poon. Nsaraafan gbanti máaǹ kí nīn sá circir páaa wanti tin ni dūu sú man ni-Dindaanee ní.»

Circir kɔŋkooŋŋu lampoou

11 Ti-Dindaan gíti bí Mooyiisi yii: 12 «A yaa làá dāá kàaǹ Isirayeel yabee, báà ŋma ń dāá pà kunimbiŋmiiu kubɔ kí dā u-maŋfal, mimmee dikàandi kaa làá dāá cáań-ni mbusu ubɔ. 13 Unil un kamaa bi yaa kàan̄ee ń dāá pà bi nín ŋmàntī animbil circir kɔŋkooŋŋun^a puee dijandi. An nimbiliŋee dāa sá bí dūú ŋá man ní saraa. 14 Bininjab bin kɔkɔ bi yaa láa kàan̄ kí yòon̄ abin mmuŋku kí nīn cée ń dāá pà animbil gbanti kí tīī man ni-Dindaan. 15 Bigaajab ń taa tīī án páań, bisoodambi mun ń taa tīī ŋgim, ubɔ ń taa nín̄ cáá dipɔndi. Báà ŋma ń pà ti-Dindaan saraau pɔndi kí fīī u-maŋfal. 16 A yaa láa fōō Isirayeel yab ŋaan animbil gbantee, á nīn cáa kpèé circir kɔŋkooŋŋu. Án di làá yàntī ḿ nīn téetí Isirayeel yab pu ki bìintí bi-pu.»

Kusampeeu kun poon bi ŋáań nnyim ki fíntée

17 Boonee ní ti-Dindaan gíti tí bí Mooyiisi yii: 18 «Á dāá dū tasa kúti kí mɔ́ɔ́ kusampeeu kun poon bi làá nīn ŋáań nnyim bisaraaŋaliibi fíntí bi-bee, nì kun pu ku tɔ́kɔ́ee. Á dāá dū-ku kí yóoń circir kɔŋkooŋŋu nì nsaraafan kansikin, kí lúń nnyim kí gbéeǹ. 19 Nnyim gbanti ní Aarɔn nì u-jipɔmbi làá dāá nīn jòotī ki fíntí bi-ŋalii nì bi-taaŋi. 20 Kí wàatī bí kɔ́ dikpafindi tantiu poonee, bí fíntí bi-ba ní kí taa kpú. Ŋyunti ŋun bi yaa làá sútí kí pìl̄ nsaraafan kí ŋá saraawɔkaa kí tīī-mee, 21 bí fíntí bi-ŋalii nì bi-taaŋi ní kí taa kpú. An sá mara ní m yóoǹ Aarɔn nì u-maaliŋun yab kí nīn pée cáa cá jaanjaan.»

Ŋkpam min bi sìtī unil yil puee

22 Ti-Dindaan tí bí Mooyiisi yii: 23 «Á nyàab̀ bitalaalumɔntiibi nee: miiri un bí cúlculee kiiloobi biŋmoo, nì siinamoom un sɔ́fèe kiiloobi bili nì dijandi, nì kanneel un sɔ́fèe kiiloobi bili nì dijandi, 24 nì kaasi kiiloobi biŋmoo kí nóó nì circir kɔŋkooŋŋu ŋmàntitam. Nyàab̀ ɔliifi kpam liitirib biluu. 25 Á dūú ŋmàlim̀ kí ŋá ŋkpam min sɔ́fèe kii utalaaluŋal nín ŋáań puee ní bí nīn cáa sìtī binib yiliŋ pu kí dū-bi kí sú man Unimbɔti. 26 Á bàtī ŋkpam gbanti kí sìtī dikpafindi tantiu nì dipoondi dakaau pu. 27 Á bàtī kí sìtī teebil nì u-wanti kɔkɔ, nì fitila tɔ́kɔŋkaati nì ti-wanti kɔkɔ, nì nsaraafan ŋun pu bi tùutī talaalubee pu. 28 Á tí bàtī kí sìtī nsaraafan ŋun pu bi ŋáań bisaraawɔkaabee nì tin kɔkɔ bi cáa tūǹ ŋu-pu ditundee, nì kusampeeu nì kun pu ku tɔ́kɔ́ee pu. 29 Á dū tiwan gbanti kɔkɔ kí sú-mi ní tí kpántí circir páaa wanti, ní tin kamaa yaa pée gbēē-tèe ń kpántí circir wanti. 30 Á dāá bàtī ŋkpam gbanti kí sìtī Aarɔn nì u-jipɔmbi yil pu kí dū-bi kí sú-mi bí nīn bí m-tundin.

31 «Á dāá tùkù Isirayeel yab yii: <Ŋkpam nee di sá min bi làá nīn cáa sìtī binib yiliŋ pu kí dū-bi kí sú-mee. Man baba tundi ní ni làá nīn cáá-mì ki ŋáań kí nīn pée cáa cá jaanjaan. 32 Ubɔ ń taa dū ŋkpam gbanti kí ŋmìtī u-wunti. Míǹ ní ubɔ ń taa dū talaalub kí ŋmàlim̀ kí ŋá ŋkpam gbanti juti. Mi sá circir kpam ní, ni mun ń béé yii mi lafun sá circir kpam. 33 Un kamaa di yaa ŋá ŋkpam gbanti juti, ní ki dū-mì ki sītì unifantanti ubɔ puee, bí nyāntí-u m-nibul kansikin.>»

Bi nín máaǹ kí bɔ́ntí talaalutuukaa puee

34 Ti-Dindaan bí Mooyiisi yii: «Nyàab̀ tin kɔkɔ pée sɔ́fèe, an dàkà yii siitakiti nì ooniikisi nì galbanum nì talaalutuukaa umɔnti, an nì tin béeyee ń nīn ŋmà, á dūú kūtì. 35 Á dū ŋyaam kí ŋmàlim̀ kí ŋá talaalumɔnti kii utalaaluŋal nín ŋáań puee, án nīn bí circir. 36 Á lēē dijandi diba kí ŋá talaalu un sá ŋyimee kí dūú yóoń circir kɔŋkooŋŋun, dipoondi dakaau nimbiin, laakin man nì si làá nīn kpáfée. Talaalu gbanti ń nīn sá ni-cee circir wanti. 37 Ubɔ ń taa dū tin bi dūu ŋmālim̀ ki ŋá talaalu nee ki mun ń ŋmàlim̀ míǹ kí ŋá talaalu ubɔ kí nīn cáa ŋáań tin úǹ u-ba lèe. Ama án nīn sá circir wanti tin sá ti-Dindaan baba wantee. 38 Un di yaa ŋá talaalu gbanti kí nīn tíkì u-sɔnsɔfiŋuee, bí nyāntí udaan m-nibul kansikin.»