Disaŋkindi 31

Circir kɔŋkooŋŋu tɔntɔnliibi

1 Ti-Dindaan bí Mooyiisi yii: 2 «Kpèè, m lēē Uurii jipɔɔn Beesaleel, Uur un sá Juuda naakookunee naantiiu. 3 M dū m-Fam ki ŋá u-ni tikpil ki yāntì ú nīn cáá iciin, ki yáb̀ ditundi poon, kí nīn cáá dinyil ní kí nīn cáá ilandɔkɔ kí ŋmā kí tɔ̄ atuun nín bí pu aba abee kɔkɔ. 4 Ú nīn cáá ilandɔkɔ kí ŋmā kí dū sindaariya nì animbil kúti nì tasa kúti kí tɔ̄ atuun. 5 Ú ŋmā kí kpítí ataŋkpanyaan bí nīn cáa nākantí tiwan pu, ní kí kpítí idɔ. U làá nīn sá unil un ŋūǹ ki ŋáań tikɔkɔ mmɔntiiminee ní. 6 M dū Ayiisamaaki un sá Daani naakookunee jipɔɔn Ooliyaab ki ŋàl̄-u ú nīn tútúǹ-u. Míǹ mbaantiim ní m tīī bitɔntɔnliibi biba mun ŋŋmam bí ŋmā kí ŋá tin kɔkɔ m làá tùkù-ni ní ŋée, an dàkà yii: 7 Dikpafindi tantiu nì Dipoondi dakaau nì u-bìil nì circir kɔŋkooŋŋu wanti kɔkɔ, 8 nì teebil nì u-wanti nì fitilab tɔ́kɔŋkaati tin sá sindaariyamɔntee nì ti-wanti kɔkɔ, nì nsaraafan ŋun pu bi tùutī talaaluee, 9 nì nsaraafan ŋun pu bi ŋáań saraawɔkaayee nì ŋu-tɔntɔŋwanti kɔkɔ, nì kusampeeu nì tin pu ku tɔ́kɔ́ee, 10 nì bisaraaŋaliibi wampeeŋkaati nì usaraaŋakpil Aarɔn circir wampeeŋkaati nì u-jipɔmbi mun yati tin bi làá nīn pèentí ki ŋáań disaraaŋal tundee, 11 nì ŋkpam min bi cáa sìtī binib yiliŋ pu kí dū-bi kí sú Unimbɔtee, nì talaalutuukaa un bi tùutī circir kɔŋkooŋŋunee. Bitɔntɔnliibi ń ŋá kii m nín tīī-si mara yii bí ŋá puee ní deedee.»

Ŋwiŋŋuŋfikaa bɔti

12 Ti-Dindaan bí Mooyiisi 13 ń tùkù Isirayeel yab yii: «Ní nīn tɔ́ ŋwiŋŋuŋfikaa tiŋan. Di sá yii ŋwiŋŋuŋfikaa sá kudaaŋŋu kubɔ ní man nì ni kansikin kí nīn pée cáa cá jaanjaan. Ŋu dàkà yii man ni-Dindaan di yāntì ni bí circir. 14 An puee ní nīn tɔ́ ŋwiŋŋuŋfikaa, ŋú nīn sá circir wiiŋŋu ki tīī-ni. Un di yaa kpēē-ŋu fám ki túń ditundi ŋwiin gbantee, bí kpɔ̀-u. Tiŋman un di yaa túń ditundi ŋwiin gbantee, bí nyāntí-u m-nibul kansikin. 15 Ní dū iwiin iluu kí tɔ̄ atuun, winluli dalee, ní dūú ŋùŋfì. Ŋúǹ sá ŋwiin ŋun ni dūu sú man ni-Dindaanee ní. Un kamaa di yaa túń ditundi ŋwiŋŋuŋfikaa dalee, bí kpɔ̀-u. 16 Isirayeel yab ń nīn ŋúb́ ŋwiin gbanti kí nīn pée cáa cá jaanjaan. Di sá yii an sá tibɔti tin bóob́ ki yóoǹ án nīn bí ki cá jaanjaanee ní. 17 Ŋwiŋŋuŋfikaa làá nīn sá kudaaŋŋu ní man nì Isirayeel yab kansikin kí nīn pée cáa cá jaanjaan. Di sá yii m dū iwiin iluu ní ki náań yilpu nì taapu, ní ŋwinluluútee, m kāl̀ ki ŋūŋfì^a.»

18 Unimbɔti sòon̄ nì Mooyiisi míǹ Siinaayi jool pu ki dóòyee, ní ki dū titaŋkpapilindi tili tin pu u dū u-ŋambiki ki ŋmàn̄ dipoondi marab ki nákáǹee ki tīī-u.