Disaŋkindi 32

ISIRAYEEL YAB KPĪTÌ MPÈÉ ŊUN BÍ BI NÌ UNIMBƆTI KANSIKINEE 32–34

Bi dūntì sindaariya ki mɔ́ɔ́ dinabil

1 Samaa nín ká yii Mooyiisi yúntìń dijool pu kaa bíi bàńee ní bi cūtìi kpáfì Aarɔn cee ní ki bí-u yii: «Kpèè doo, mɔ́ɔ́-ti unimbɔti ubɔ ú nīn līī ti-nyɔkɔpu, di sá taa nyí tin di yaa bāań Mooyiisi un di nyántìń-ti Eejipiti tiŋkinee^a.» 2 Ní Aarɔn bí-bi yii: «Lēēmaan ni-nimpoobi nì ni-bisalib nì ni-jipɔmbi sindaariyabɔmbiliŋ bi-tafaliŋ pu kí cáaḿmaan-mi.»

3 Dicilpu niin ní Isirayeel yab gbákal̀ bi-bɔmbiliŋ bi-tafaliŋ pu ki cáań ki tīī-u. 4 Aarɔn fōō tiwan gbantee bi-ŋaanee ní ki dūntì ki dūu sītì tiwan tin bi ŋá ki nántiǹ dinabilee poon, ní an nyántì dinabil. Niinee ní samaa téeń yii: «Isirayeel yab, kpèèmaan ni-Nimbɔtiu un nyántìń-ni Eejipiti tiŋkinee!» 5 Aarɔn ká mimmee ní ki máń nsaraafan dinabilee nimbiin ní ki bí yii: «Foolee ti làá fu jī ti-Dindaan jiŋaaliu.» 6 Kutaa wúntì kutaafaau pɔ̀lpɔlee ní samaa ŋá bisaraawɔkaabi nì mpèé saraabi. Boonee ní bi kāl̀ ki jíń ki nyùn̄. Bi dóòyee ní ki dūu gùl̄ agbiil pu^b. 7 Niinee ti-Dindaan bí Mooyiisi yii: «Sìntī malaa, di sá a-nibul din a nyántìń Eejipiti tiŋkinee bíi ŋáań ikpitikpaan. 8 Bi pūtì kpáàa dū nsan ŋun m dàkā-bee ki fá. Bi dūntì tikúti ki mɔ́ɔ́ dinabil, ki gbāaǹ di-nimbiin, ki ŋá-dì saraabi ki lī yii: <Isirayeel yab, kpèèmaan ni-Nimbɔtiu un nyántìń-ni Eejipiti tiŋkinee!» 9 Ti-Dindaan gíti tùkū Mooyiisi yii: «M ká yii dinibul nee sá din gáatèe ní. 10 Kɔŋkɔnnee, yàntī ḿ fōō bi-pu mbiim kí kúntí-bi. Boonee m làá dī sii pu kí náań ditimbuŋkpaandi.» 11 Ama ní Mooyiisi gbāam̀ ti-Dindaan Unimbɔti ú jī kimɔtii ní ki bí yii: «Ti-Dindaan, ba pu ní a fōō dinibul din a nyántìń Eejipiti tiŋkin nì a-pɔŋkpaaŋŋu nì a-kpabilee pu mbiim míǹ? 12 A yaa ŋá mimmee Eejipiti yab làá lì yii: <Unimbɔti là kí cáá-bi kí tɔ̄ mbusu poonee pu ní u nyántì-bi ti-tiŋkin. U là kí cáá-bi kí cūnnì ntimu mun bí ajoon puee kí sàaǹ-bi kí kúntí-bi kitiŋ pu ní.> An puee m-Dindaan, sɔ̀ŋkì a-pɔbil, kí gíiǹ mbusu un a bàà làá dūú tɔ̄ a-nibul puee kí yà. 13 Téetí Abraam nì Isaaki nì Jaakɔb pu, a-tɔntɔnliibi bin a nìn pūtì ki pōoǹ-bi yii: <M làá bùtī ni-maaliŋun yab bí nīn wīikí kii iŋmalbijaa in bí kutagbɔŋu puee. M làá dū kitiŋ kin m pōoǹ-bee kí tīī-bi bí nīn kíǹ ki yì kí nīn pée cáa cá jaanjaan^c.>» 14 Niinee ti-Dindaan nín bàà bɔ́ntì kí dū mbusu un kí tɔ̄-bee ní u yāntì kaa ti ŋá míǹ^d.

15 Mooyiisi nìn yíkìń dijool pu ki nín kpákatiń ki ŋúbiń titaŋkpapilindi tili u-ŋaan ajan liitil pu bi ŋmàn̄ dipoondi marab. 16 Unimbɔti u-ba di nìn kpítì titaŋkpapilindi gbanti. Úǹ u-ba di nìn tí ŋmàn̄ ti-pu kii kigaai ní bi dūu cáká ki ŋmàn̄ee. 17 Joosuwa nín gbìl̄ samaa kuŋkuuntii puee ní u bí Mooyiisi yii: «Pīlifì, ijanjakuŋkuunti di tùm̀ ti-naapaal puee.» 18 Ní Mooyiisi bí-u yii: «Aayee, doo kaa sá dijajil kuŋkuuntii, kaa tí sá bin bi jáń ki pɔ́ɔkiǹee yaliŋkii. Ilan pu ní man gbìl̀ nee.»

19 Bi tóob́ dinaapaalee ní Mooyiisi ká dinabil yú ní samaa bí ki ŋōō ní u fōō diŋuul ŋkpitim pu. U nìn dū titaŋkpapilindi tin u ŋúb́ u-ŋaanee ki lúkú, ní ki gbáń ki wīī-tì dijool taapu niin. 20 Ní u cūtìi yōoǹ dinabil din samaa mɔ́ɔ́yee ki tɔ́ ŋŋmin ní an wùn̄. U nìn nàn̄-dì dúsi dusi, ki dūu sītì nnyimin ní ki yāntì Isirayeel yab nyùn̄. 21 Ní Mooyiisi bālifì Aarɔn yii: «Ba ní dinibul nee ŋá-si ní a téé-dì ki tɔ́ ikpitikpaan in bí nee poon míǹ?» 22 Ní Aarɔn kíí Mooyiisi yii: «M-dindaan, taa fōō m-pu diŋuul. Sii a-ba nyí yii dinibul nee kaa pée pɔ̄ɔ̄ tin kaa ŋān̄ee diŋál. 23 Bi bí-mi yii: <Mɔ́ɔ́-ti unimbɔti ubɔ ú lìntī ti-nyɔkɔpu, di sá yii Mooyiisi uninja un di nyántìń-ti Eejipiti tiŋkinee, taa nyí tin di yaa bāań-uee.> 24 Niinee ní m bālifì-bi yii: <Ŋma di cáá sindaariya?> Dicilpu niin ní bi túutì abɔmbil bi-tafaliŋ pu ki cáań ki tīī-mi, ní m dūu tɔ́ ŋŋmin ní dinabil nee nyánní.»

Ditafadaaldi

25 Mooyiisi ká yii fìkil fikil kɔ́ samaa ní Aarɔn yāntì bi ŋá bi nín là puee, ki dū bi-ba ki tīī binannanliibi ń bèel̀. 26 Niinee ní Mooyiisi cūtìi yúl̀ dinaapaal punyɔkɔki nyɔkɔpu ní ki téeń yii: «Bin kɔkɔ bí ti-Dindaan jandee ń dāan̄ man cee!» Ní Leefii naakookun yab kɔkɔ dɔ́miń ki yúl̀ u-cee ki māntìi tú-u. 27 Ní u bí-bi yii: «Kpèèmaan, ti-Dindaan Isirayeel Nimbɔtiu nín lī puee sèé yii: <Báà ŋma ń dū u-tàataajiki kí gbìn̄, kí yìiǹ dinaapaal jaŋŋi kɔkɔ poon kí kpɔ̀ u-nabiki nì u-bɔɔ nì u-kɔŋkɔnnaatɔ.>»

28 Leefii yab nìn ŋá kii Mooyiisi nín nìn lī puee, di sá yaadal wiiŋŋuee, bi nìn kūū binib kutukub bita. 29 Niinee ní Mooyiisi bí Leefii yab yii: «Díǹ nee ni dū ni-ba ki sú ki túń ni-Dindaan tundi, kun puee naa yíì ki ŋúń ki kūū ni-jipɔmbi nì ni-nabiyaamu. An puee ti-Dindaan ń bìin̄ ni-pu díǹ.»

Mooyiisi gbāam̀ Unimbɔti Isirayeel yab pu

30 Kutaa wúntèe ní Mooyiisi bí samaa yii: «Ikpitikpaan ní ni baasii ŋá. Kɔŋkɔnnee m làá fàtīí jɔ̄m̀ dijool pu ti-Dindaan cee, an yaa yíì u làá fōō-mi kí dū ni-kpitii kí pɔ̄-ni.»

31 Niinee Mooyiisi fātìi nín gítí ti-Dindaan cee, ní ki bí-u yii: «Àaa ti-Dindaan, a-nibul ŋá ikpitikpaŋkpaan ní, bi dū sindaariya ki mɔ́ɔ́ unimbɔti. 32 Ama m gbāam̀-si, dū bi-kpitii kí pɔ̄-bi. An yaa kaa ŋá mimmee, á kpìtī man yindi dimaŋfal gbɔŋku kun a ŋmàn̄ee poon.» 33 Ní ti-Dindaan bí Mooyiisi yii: «Un yīntiǹ-mee yindi ní m làá kpìtī m-gbɔŋku poon. 34 Too kɔŋkɔnnee, nín̄ cá kí yòon̄ dinibul kí cùnnì laakin m bí á cáá-bi kí cùnnèe. M làá yàntī m-tuuŋŋu ń nīn līī a-nyɔkɔpu. Ama dalba m làá dāá dáaĺ bi-tafal bi-kpitii gbanti pu.» 35 Ti-Dindaan dáaĺ dinibul tafal Aarɔn nín nìn mɔ́ɔ́-bi dinabil diŋyee pu.