Disaŋkindi 33

Ti-Dindaan tīī Mooyiisi mara bí nìkī nsan

1 Ti-Dindaan bí Mooyiisi yii: «Yīkì doo, sii nì dinibul din a nyántìń Eejipiti tiŋkinee, kí nīn cá kitiŋ kin m pūtì ki pōoǹ Abraam nì Isaaki nì Jaakɔb yii m làá dūú tīī bi-maaliŋun yabee^a. 2 M làá tɔ̄ń m-tuuŋŋu ŋú lìntī ni-nyɔkɔpu kí jà Kanaan yab nì Amɔɔr yab nì Eeti yab nì Peeriisi yab nì Eefi yab nì Jeebusi yab. 3 Ní cùú kɔ́ kitiŋ kin poon nnaabiim nì tisiil còol̀ee. Ama man kaa làá nóó-ni kí cù, kun puee ni sá dinibul din pɔbil gbìfèe ní. Án làá yàntī ḿ kpɔ̀ kí céetí-ni nsanni.»

4 Samaa nín gbìl̄ mbusu bɔti gbantee ní bi kāl̀ kii bi ká dikpoolee, ní báà ubɔ kaa dū tiwannyaandi ki ŋá u-ba pu. 5 Di sá ti-Dindaan bí Mooyiisi ń tùkù Isirayeel yab yii: «Ni sá dinibul din pɔbil gbìfèe ní. M yaa bí yii m làá nīn còom̄ ni-kansikin, án kaa làá gāā dikàakil ní ḿ kpɔ̀ kí céetí-ni. Míǹ puee lēēmaan tiwannyaandi ni-wunti pu ḿ kpèè min ní m làá ŋá-nee.» 6 Kí yòon̄ Ooreeb jool caŋin niin ní Isirayeel yab kíĺ kaa ti dū tiwannyaandi ki ŋá bi-wunti pu.

Dikpafindi tantiu

7 Isirayeel yab yaa nìn bàn̄ laakin ki gāā dinaapaalee, Mooyiisi nìn yòontí tanti ní kí cùnnì kí cóoń dinaapaal boon ndandati. Bi nìn yíì-u yii <circir kɔŋkooŋŋu>. Un yaa nìn là kí bàlifì ti-Dindaan cee tibee nìn nyēē dinaapaalin ní kí cù circir kɔŋkooŋŋun. 8 Ŋyunti kamaa Mooyiisi yaa nìn yíkìi cá circir kɔŋkooŋŋunee, samaa nìn yíkí ní báà ŋma yú u-tantiu nyɔkɔpu, ní bi-nimbiliŋ cɔ́ u-pu áli ú tin kɔ́ circir kɔŋkooŋŋun. 9 Ŋyunti ŋun u yaa kɔ́ee ní ditagbancancaal ń sìntīń kí dāá yūĺ circir kɔŋkooŋŋu punyɔkɔki nyɔkɔpu, ní ti-Dindaan ń nīn bíi sòoǹ nì Mooyiisi. 10 Isirayeel yab yaa nìn ká ditagbancancaalee sīntìń ki yúl̀ circir kɔŋkooŋŋu punyɔkɔki nyɔkɔpuee, ní bi-kɔkɔ ń tàtīí dòon̄ dicincibil bi-tantib nyɔkɔpui. 11 Ti-Dindaan nìn sòoǹ nì Mooyiisi bi-nimbiiŋyi túĺ tɔb kii unil nì u-juti nín sòoǹ nì tɔb puee ní. Boonee ní Mooyiisi ń fàtīí nīn gítí dinaapaal pu, ní Nuuni jipɔɔn Joosuwa un nìn bí ki tútúǹ-uee ń gbíntí circir kɔŋkooŋŋun.

Ti-Dindaan nì Mooyiisi bíi sòoǹ

12 Mooyiisi bí ti-Dindaan yii: «Kpèè, sii di bí-mi yii ḿ kpòotī dinibul nee, ama ní kaa yāntì m béè un ní a làá tɔ̄ń ú céeǹ-mee. Ama si mun di bí-mi yii: <M nyí-si tiŋan>, ní ki gíti lī yii: <A ká diyimɔɔl m-cee.> 13 Míǹ puee m yaa lafun ká diyimɔɔl a-cee, á yàntī ḿ béé a-landɔkɔi nín sá puee. Mimmee m làá béé-si tiŋan ní kí páatí diyimɔɔl gbanti pu. Á nīn nyí yii ditimbundi nee sá a-nibul ní.» 14 Ní Unimbɔti kíí Mooyiisi yii: «Mama m-ba di làá céeǹ-ni ní kí tīī-si diŋuŋfil.»

15 Ní Mooyiisi bí-u yii: «Sii a-ba yaa kaa bí ti-cee kí céeǹ-ti, á taa lì yii tí yīkì doo kí nīn cá. 16 Ba di làá dàkà yii man nì a-nibul ká diyimɔɔl a-cee? See a yaa céeǹ-ti baba di làá gàntì man nì a-nibul nì anibul ŋin kɔkɔ bí kitiŋ puee nib kansikin.» 17 Ní ti-Dindaan kíí Mooyiisi yii: «M làá ŋá min a dáá bālifì-mi nee kí tīī-si, di sá a ká m-cee diyimɔɔl, ní man di baasii lēē-si.»

18 Ní Mooyiisi bí yii: «M gbàam̄-si, yàntī ḿ ká a-nyooti.» 19 Ní Unimbɔti bí-u yii: «M làá yàntī m-ŋanti nín sá puee kɔkɔ ń jītí a-nimbiin á ká, ní kí yíiń man ni-Dindaan yindi a-nimbiin. M sūǹ un saai m là kí sɔ̄ee saai, ní ki ŋáań tiŋan un m là kí ŋá tiŋanee^b. 20 Ama aa ŋūǹ kí wāl̀-mi nì a-nimbiliŋ yéè kpìrrr, di sá unil kaa ŋūǹ kí wāl̀-mi ki gbíntìi bí dimaŋfalin.» 21 Ti-Dindaan gíti bí yii: «Kpèè mpaan ŋubɔ bí doo ki pìl̄-mi. Tɔ́kɔń ditaŋkpakpaandi nee pu kí nīn yú. 22 Ŋyunti ŋun m-nyooti yaa láa bíi jītée, ḿ dāá dū-si kí báĺ ntaŋkpalɔkɔn ní kí dū m-ŋal kí bìin̄ a-nimbiin ní kí jītí. 23 Boonee ní ḿ dāá cúú m-ŋal kí bìitī ní á wāl̀ m-boon, an yaa kíǹ m-nimbiinee, ubɔ kpá kí ká-ŋu.»