Disaŋkindi 34

Marab taŋkpapilinti tipɔn bɔti

1 Ti-Dindaan bí Mooyiisi yii: «Kpítí titaŋkpapilindi tili kii tipeepeekaalee, ní man ń ŋmà tipilindi gbanti pu anyɔɔbun ŋin nìn kā tipilimpeepeekaal pu a dūu lúkú ki wīīyee. 2 Á bɔ́ntí kí cīití fool ntaafaabɔmbɔmee. Á fu jɔ̄m̀ Siinaayi jool yilpu kúnti kunti kí yūĺ niin kí cīití-mi. 3 Báà ubɔ ń taa fu nóó-si kí jɔ̄m̀. Bí taa ká uniseen dijool gbanti pu laaba. Báà uŋoobu àá upii àá unaa ń taa fu ŋmɔ́ timool di-caŋin!»

4 Ní Mooyiisi kpítì titaŋkpapilindi tili kii tipeepeekaalee. Kutaa wúntì ntaafaabɔmbɔmee ní u nín jɔ́ḿ Siinaayi jool pu, ki ŋúb́ titaŋkpapilindi tilee kii ti-Dindaan nín bí yii ú ŋá puee. 5 Ti-Dindaan kpákatìń dijool pu ditagbancancaalin ki dɔ́miń ki yúl̀ ki kɔ́ĺ Mooyiisi, ní Mooyiisi yíiń u-yindi yii: «Ti-Dindaan». 6 Ní ti-Dindaan dɔ́miń ki jítì Mooyiisi nimbiin ki yíiń úǹ u-ba yindi yii: «Man di sá ni-Dindaan, Unimbɔti un sá ulaŋŋaŋfiti nì tiŋandaan kaa gífí diŋuul malaa, ki cáá dineendi tikpil tikpil ki bí deedeeyee. 7 M dàkà binib m-poon nín mɔ̄ puee kí tin cáá sāā anaantitɔntɔkɔ kutuku pu, ki pūǹ ikpiti nì diyìntil nì mpɔɔpɔn, ama maa tàantí unikpiti kii waa ŋá tibee. M dátí bibaatiibi tafal, ní kí dáaĺ bi-biyaamu nì bi-naantiibi tafal kí tin cáá sāā anaantitɔntɔkɔ ata kii anaa pu^a.»

8 Dicilpu niin ní Mooyiisi gbāaǹ ki jáam̀ ti-Dindaan, 9 ní ki bí yii: «M yaa lafun ká diyimɔɔl a-cee, ti-Dindaan, m gbāam̀-si, á nīn bí ti-kansikin ti-saŋkindi poon. Dinibul nee sá din gáatèe ní, ama á dū ti-yìntitam nì ti-kpitii kí pɔ̄-ti, ní kí fōō-ti kí ŋá a-nibul.»

Unimbɔti fātìi pōoǹ Isirayeel yab dipoondi

10 Ti-Dindaan bí Mooyiisi yii: «M làá pùtī kí pòon̄ Isirayeel yab dipoondi. A-nibul kɔkɔ nimbiinee, m làá ŋá maamaacib bin juti kaa láá pée jítì kitiŋ pu laaba nì ditimbundi diba poonee. Dinibul din māntìi tú-si nee làá ká maamaacib bin man ni-Dindaan làá dī a-pu ki ŋée nín kaa cáá juti puee.

11 «Á ŋúb́ mara un m làá yóoń-si díǹ nee tiŋan. M làá jà Amɔɔr yab nì Kanaan yab nì Eeti yab nì Peeriisi yab nì Eefi yab nì Jeebusi yab a-nimbiin. 12 Á nīn nyíǹ a-ba kí taa ŋá mpèé nì kitiŋ kin poon a cá kí kɔ́ nee yab. A yaa ŋá míǹ, án làá nīn sá kutaliŋŋu ní ki tīī-si. 13 Ama ní gbá kí wīī bi-saraafaŋyi, kí kpìtī bi-kumpooŋi kí gàatì bi-windɔi kí lúkú^b. 14 Ní taa gbàan̄ diwaal báà diba nì diba nimbiin, kun puee man ni-Dindaan yindi di sá <Ipoompoon>. M sá Unimbɔti un cáá ipoompoonee ní. 15 Si nì kitiŋ kin a làá kɔ́ee yab ń taa pòon̄ tɔb kí ŋá mpèé. Bi yaa láa bíi tòotī bi-waaŋi ki ŋáań saraabi ki tìì-ŋee, bi làá dāá yíiń-ni ní ní jī bi-saraabi jinti. 16 A yaa láa cáá bi-bisalib ki tīī a-jipɔmbee, bi-bisalib gbanti làá dāá nīn tòotī bi-waaŋi ní kí yàntī a-jipɔmbi mun ń nīn tòotī bi-waaŋi.

17 «Á taa dū tikúti kí dùntī kí mɔ́ɔ́ diwaal^c.

18 «Á dāá jī jiŋaal un bi ŋmóò kpɔnɔb bin kaa cáá ŋkpɔnɔnyɔkɔee. Á ŋmɔ́ kpɔnɔb bin kaa cáá ŋkpɔnɔnyɔkɔee iwiin iluli kii m nín yóoǹ-ni mara puee, Abiibi ŋmaliu un poon bi yóoǹ kí nīn jīǹ-uee^d. Di sá uŋmal gbanti poon ní bi nyántìń-ni Eejipiti tiŋkin.

19 «Kibiseebiki kininjabiki kamaayee, man di yì. Míǹ ní unaa àá upii àá uŋoobu yaa péé péé ki màl̄ kijakee, bí dū-kì kí ŋá-mi saraa^e. 20 Á dū kimaŋ biseemal kijaka kí kpántí dipibil àá diŋɔbil. A yaa kaa làá dūú kpántée, á nyīī kí gíí ki-sil. Ama a-jipɔmbi kansikin un sá kibiseebikee, á pà ki-pu^f.

«Á taa dāan̄ m-nimbiin nì iŋaŋkulim.

21 «Á dū iwiin iluu kí tɔ̄ a-tuuŋŋi, ŋwinluluúti dalee, á kàl̄ kí ŋùŋfì. Báà an yaa sá tikpaal yuntiŋu àá tijin dical yuntiŋu, á kàl̄ ŋwiin gbanti kí ŋùŋfì^g.

22 «Á dū bileepeepeekaa un a cáńee kí jī nnyɔmu jiŋaaliu, ní dibindi yaa bíi kúntée, á jī tantib jiŋaaliu^h.

23 «A-ninjab kɔkɔ ń dāá dāan̄ man ni-Dindaan Isirayeel yab Nimbɔtiu nimbiin dibindi kamaa poon mita. 24 Di sá m làá dāá jà atimbun kí pɔ̄-si mpaan ní kí wàan̄ a-tiŋki, ní ŋyunti ŋun a làá dāá dāan̄ man ni-Dindaan a-Nimbɔtiu nimbiin dibindi kamaa poon mitee, ubɔ dāa kpá kí màkan̄ yii u làá jáǹ-si kí fōō a-tiŋki.

25 «A yaa làá dāá làntì kuwaŋkuluu kí ŋá-mi saraayee, á taa láa dū kpɔnɔb bin poon bi ŋá ŋkpɔnɔnyɔkɔee kí kūtì saraayee pu. Á taa láa dū saraabi bin a ŋá Dilákatil jiŋaaliuee nanti kí yóoń kutaa ń wúntí. 26 Á dāá cáań tijimpeekaal tin a-sati lòon̄ee circir kɔŋkooŋŋun, ti-Dindaan ni-Nimbɔtiu nimbiin. Á taa dū uŋoobu biim kí ŋàan̄ u-biki nanti.»

27 Ti-Dindaan bí Mooyiisi yii: «Á ŋmà tibɔti nee, kun puee tíǹ pu ní m tɔ́kɔǹ ki pūtì ki pōoǹ si nì Isirayeel yab dipoondi.» 28 Mooyiisi nìn kāl̀ ti-Dindaan cee iwiin imuŋku ili, ŋwiimpu nì kunyeeu, kaa jíń kaa nyùn̄. Ti-Dindaan nìn ŋmàn̄ dipoondi marab saalaayee titaŋkpapilindi pu.

Mooyiisi fātìi gítìń dinaapaal pu

29 Mooyiisi kpákatìń Siinaayi jool pu, ki ŋúbiń titaŋkpapilindi tili tin pu bi ŋmàn̄ dipoondi marabee. Waa nìn nyí yii ŋyunti ŋun u bí ti-Dindaan ceeyee, u-nimbiin cúu kpántì ki kíǹ ki jìliŋkī. 30 Aarɔn nì Isirayeel yab kɔkɔ kpēē Mooyiisee ki ká yii u-nimbiin cúu kpántì ki kíǹ ki jìliŋkī. Ní bi fāŋkì kí sútí kí pìl̄-u. 31 Ní Mooyiisi yíiń-bi. Niinee Aarɔn nì samaa kpilib dɔ́miń u-cee ní u bíi sòoǹ nì bi. 32 Boonee ní Isirayeel yab kɔkɔ sútìń ki pìl̄-u ní u dū marab bin kɔkɔ ti-Dindaan tīī-u Siinaayi jool puee ki tùkū-bi.

33 Mooyiisi sòon̄ nì bi míǹ ki dóòyee ní ki dū ŋŋaabu ki bīiǹ u-nimbiin. 34 Ŋyunti ŋun Mooyiisi yaa nìn là kí kɔ́ ti-Dindaan cee kí sòoǹ nì uee, ní ú cúú ŋŋaabu kí bìitī u-nimbiin kí nīn cí ŋyunti ŋun u yaa dóò ki làá nyānnée. U yaa nìn nyánnée ní ú dū marab bin u fōońee kí tùkù Isirayeel yab. 35 Isirayeel yab nìn kāntí yii Mooyiisi nimbiin nìn kíǹ ki jìliŋkī. Niinee ní ú gíiǹ ŋŋaabu kí bìin̄ ŋu-pu kí nīn cí ŋyunti ŋun u làá fàtīí kɔ́ kí sòoǹ nì ti-Dindaaneeⁱ.