Disaŋkindi 35

CIRCIR KƆŊKOOŊŊU CÓONTAM 35–40

Ŋwiŋŋuŋfikaa bɔti

1 Mooyiisi kpáfì Isirayeel yab kɔkɔ ní ki bí-bi yii: «Kpèèmaan ti-Dindaan nín yóoǹ mara yii ní ŋá puee sèé: 2 <A cáá iwiin iluu kí tɔ̄ ditundi, ama ŋwinluluúti dal sá ŋwiŋŋuŋfikaa ní, ŋwiin ŋun a dūu sú man ni-Dindaanee. Un kamaa yaa túń ditundi ŋwiin gbantee, bí kpɔ̀-u^a. 3 Laakin kamaa ni yaa kóòyee, ubɔ ń taa kpāā ŋŋmi ŋwiŋŋuŋfikaa dal.>»

Isirayeel yab cáań bi-saraabi

4 Mooyiisi bí Isirayeel yab kɔkɔ yii: «Kpèèmaan ti-Dindaan nín yóoǹ mara yii ní ŋá puee sèé: 5 <Ní lēēmaan ni-kansikin tigaajati tin ni cááyee poon kí ŋá ti-Dindaan saraa. Bin làá tīīyee ń tīī nì dipɔbil diba. Bí tīī sindaariya nì animbil kúti nì tasa kúti, 6 nì bigulifamambi nì gulfab bin bí gùŋgumee nì bigulifamambi cínciŋ nì bigulifapimbi bin bí fálfalee nì tiŋɔkuti, 7 nì ipigban in bi mántèe nì igban in dàfì tikpilee nì akasiya dɔi, 8 nì ŋkpam min bi làá nīn cáa ŋáań fitilabinee nì talaalu kpam min bi làá nīn cáa sìtī binib yiliŋ pu kí dū-bi kí sú ti-Dindaanee nì talaalub bin bi làá nīn tùutēe, 9 nì ataŋkpanyaan ŋin bi yíì soowamee nì ataŋkpanyaan aba mun bí dūú nákań eefoodi nì kilɔbiki kin pāantí usaraaŋakpil bindi puee. 10 Bitɔntɔnliibi bin yáb̀ee kɔkɔ ń kpāfì kí tɔ̄ ditundi din ti-Dindaan bālifì yii ní tɔ̄ee. 11 Bí kpāfì kí ŋá circir kɔŋkooŋŋu nì ŋu-biiŋkaati nì ŋu-tabikaati nì ŋu-fukuŋkaati nì ŋu-kalimii nì ŋu-dɔjaatii nì i-tílkaati, 12 nì Dipoondi dakaau nì u-kpandɔi nì u-bìil nì ŋŋaasakaŋkaa ŋun pìtī circir laŋki nì circir páaa laŋki kansikinee, 13 nì teebil nì u-kpandɔi nì tin kɔkɔ bi cáa tūǹ ditundi u-puee nì kpɔnɔb bin bi cāabìń ki pāantí ti-Dindaan nimbiinee, 14 nì fitilab tɔ́kɔŋkaati nì ti-wanti kɔkɔ nì fitilab nì bi-kpam, 15 nì talaalutuukaa saraafaŋŋu nì ŋu-kpandɔi nì ŋkpam min bi sìtī unil yil pu kí dū-u kí sú Unimbɔtee nì talaalutuukaa nì ŋŋaabu ŋun sàkā circir kɔŋkooŋŋu punyɔkɔkee, 16 nì saraawɔkaa faŋŋu nì ŋu-làaŋ́ki kin sá tasa kútee nì ŋu-kpandɔi nì tin kɔkɔ bi cáa tūǹ ŋu-pu ditundee nì kusampeeu nì tikúti tin pu ku tɔ́kɔ́ee, 17 nì iŋaabu in bi làá dūú màntīí gíb́ circir kɔŋkooŋŋu cindee nì i-dɔjaatii nì tikúti tin bi làá dūú tíĺ idɔjaa taapuee nì sata un bi làá dūú sàkan̄ dicindi punyɔkɔkee, 18 nì circir kɔŋkooŋŋu kpakpaaŋi nì ŋu-cindi kpakpaaŋi nì ŋu-ŋmiii, 19 nì tiwampeeŋkaal tin bi làá nīn pèentí ki tūǹ atuun circir kɔŋkooŋŋunee nì usaraaŋakpil Aarɔn wampeeŋkaati nì u-jipɔmbi yati tin bi làá nīn pèentí ki tūǹ disaraatundee.>»

20 Niinee ní Isirayeel yab nyáń Mooyiisi cee. 21 Bin nìn cáá tiniti ki làá tīī nì dipɔbil dibee nìn cáań ti-Dindaan bi-wanti bí dūú cóoń circir kɔŋkooŋŋu, kí tɔ̄ atuun ŋin kɔkɔ sá bí dūú tɔ̄ee ní kí dūú ŋáĺ circir wampeeŋkaati. 22 Míǹ ní bininjab nì binimpoobi bin cáá tinitee yōoǹní akimbil nì falfatib nì mbɔmbiyaamu nì abɔmbil nì sindaariya wanti tin sá tiwannyɔkɔntikaalee ki dī akoobil nín sá puee ki dūu ŋá saraa ki tīī ti-Dindaan. 23 Bin kɔkɔ nìn cáá bi-dumpui bigulifamambi gùŋgumee nì gulfab bin máǹ wèeeeyee nì bin máǹ cínciŋee nì bin pīiǹee nì tiŋɔkuti nì ipigban in bi mántèe nì igban in dàfèe, nìn cáań ki tīī. 24 Bin kɔkɔ nìn lēē animbil kúti nì tasa kúti ki yóoǹ kí dūú ŋá ti-Dindaan saraayee nìn cáań. Bin kɔkɔ nìn cáá akasiya dɔyee nìn cáań bí dūú tɔ̄ atuun. 25 Binimpoobi bin nìn nyí diwanlulee nìn dū gulfab bin máǹ gùŋgumee nì bin máǹ wèeeeyee nì bin máǹ cínciŋee nì bin pīiǹee ki lùn̄ ki cáań. 26 Binimpoobi bin nyí diwanlulee nìn dū bi-pɔbiliŋ ki tīī ki dū tiŋɔkuti ki lùn̄ tiwan. 27 Samaa kpilib nìn cáań ataŋkpanyaan ŋin bi yíì soowamee nì ataŋkpanyaan aba mun bí dūú nákań eefoodi lɔbiki kin pāantí usaraaŋakpil bindi puee, 28 nì talaalub bin sɔ́fèe nì fitilab kpam nì min bi làá nīn cáa sìtī unil yil pu kí dū-u kí sú Unimbɔtee nì talaalutuukaa. 29 Isirayeel yab kɔkɔ, bininjab nì binimpoobi nìn dàkā tiniti ki cáań tin kɔkɔ máaǹ bí dūú tɔ̄ atuunee ki ŋá saraa ki tīī ti-Dindaan nì dipɔbil diba.

Bitɔntɔnliibi bin túń circir kɔŋkooŋŋu tundee

30 Mooyiisi bí Isirayeel yab yii: «Kpèèmaan ti-Dindaan lēē Uurii jipɔɔn Beesaleel, Uur un sá Juuda naakookunee naantiiu. 31 U tīī-u u-Fam tikpil, ú nīn yáb̀ ki cáá iciin kí ŋmā kí tɔ̄ atuun nín bí a-ba a-ba puee kɔkɔ mmɔntiimin. 32 U cáá nlandɔkɔ kí dū sindaariya nì animbil kúti nì tasa kúti kí dūú tɔ̄ atuun. 33 U ŋūǹ kí kpítí ataŋkpee kí nákań, kí dū ndɔ kí kpítí kí dūú tɔ̄ atuun ŋí nīn bí a-ba a-ba. 34 Ti-Dindaan pú-u ŋŋmam ú dàkà bi nín nāantí tiwan kí dūú tɔ̄ atuun puee kii u nín tí pú Ayiisamaaki un sá Daani naakookunee jipɔɔn Ooliyaab puee. 35 U pú-bi dinyil bí ŋmā kí kpítí ataŋkpanyaan kí dūú ŋá tikɔkɔ, kí ŋmā kí lēē tiwan kɔkɔ naŋku tiba pu, ní kí ŋmā kí dū gulfa un máǹ gùŋgumee, nì un máǹ wèeeeyee nì un máǹ cínciŋee nì un pīiǹee kí dūú lù àá kí gbá tiwanee. U pú-bi dinyil bí ŋmā kí tɔ̄ bin kɔkɔ kíǹee tuuŋŋi.