Disaŋkindi 36

1 «Beesaleel nì Ooliyaab nì bininjab bin kɔkɔ ti-Dindaan pú dinyil nì iciinee làá tɔ̄ circir kɔŋkooŋŋu tuuŋŋi mmɔntiim án kàl̄ deedee, kii ti-Dindaan nín tīī mara yii bí ŋá puee.»

2 Mooyiisi nìn yíiń Beesaleel nì Ooliyaab nì bininjab bin kɔkɔ ti-Dindaan nìn tīī dinyil bi dū bi-ba ki tīī kí tɔ̄ ditundi nì dipɔbil dibee. 3 Ní Mooyiisi dū tiwan tin kɔkɔ Isirayeel yab nìn cáań ki ŋá saraa bí dūú tɔ̄ circir kɔŋkooŋŋu tuuŋŋee ki tīī-bi. Kutaafaau kamaayee, binib nìn gbíntìi cāabìń tiwan nì dipɔbil diba. 4 Niinee bitɔntɔnliibi bin Unimbɔti tīī iciin bi bíi tūǹ circir kɔŋkooŋŋu tuuŋŋee gbēeǹ bi-tuuŋŋi pu, 5 ki cūtìi ká Mooyiisi ki bí-u yii: <Binib bíi cāabìń tiwan an wīikí tikpil ki jítiǹ min ti-Dindaan bālifì bí dūú tɔ̄ ditundee pu kpataaa.> 6 Ní Mooyiisi tīī mara bi dūu nāatì binib kɔkɔ dinaapaal poon yii: <Bininjab nì binimpoobi kɔkɔ ń gbèen̄ kí taa ti cáań tiwan tin bi làá dūú tɔ̄ circir kɔŋkooŋŋu tuuŋŋee.> Niinee ní báà ŋma gbēeǹ kaa ti bíi cāabìń. 7 Di sá yii tiwan tin bi nìn cáań bí dūú tɔ̄ atuun kɔkɔ nín sá puee nìn wīikí tikpil. An nìn wīikí ki lákatì.

Circir kɔŋkooŋŋu bɔ́ntitam

8 Bitɔntɔnliibi bin nìn cáá iciin tikpilee nìn bɔ́ntì circir kɔŋkooŋŋu ŋaabui. Bi nìn dū gulfab bin máǹ gùŋgumee nì bin máǹ wèeeeyee nì bin máǹ cínciŋee ki lùn̄ aŋaajan saalaa, ní ki lùn̄ keerubimbi ki nákáǹ ŋi-pu. 9 Aŋaajanee fɔkɔŋŋu nìn sá meetab ubɔ kpá saalku ní ŋi-waaŋŋu sá meetab bili. Ŋi-kɔkɔ nìn ŋmà ní. 10 Bi nìn dū aŋaajan aŋmoo ki ŋáĺ ki kpáfì, ní ki dū aŋmoo ŋin kíǹee mun ki ŋáĺ ki kpáfì. 11 Bi nìn dū ŋŋaacalimu mun máǹ gùŋgumee ki kpákám̀ aŋaajan aŋmoo ŋin bi ŋáĺ ki kpáfì mpeekaamee diŋaajandi din lúŋkèe nyɔɔgbandi, nì ŋin bi ŋáĺ ki kpáfì nliliitiimee din pééyee nyɔɔgbandi. 12 Bi nín ŋáĺ aŋaajan aŋmoo aŋmoo ki kpáfì puee kamaa nyɔɔgbandi nìn cáá ŋŋaacalimuee imuŋku ili nì saalaa, ní ajanliitilee ŋaacalimmu nìn ŋmà. 13 Bi nìn dū sindaariya ki mɔ́ɔ́ titábikaal imuŋku ili nì saalaa ki cúú ajanliitil ki kpáfì, ní tanti kɔkɔ dūu ŋá tiwambaantiil.

14 Boonee bi nìn dū tiŋɔkuti ki lùn̄ aŋaajan saalaa nì diba ki dūu ŋá tantililiiti un làá nīn bìintí circir kɔŋkooŋŋu puee. 15 Diŋaajandi kamaa fɔkɔŋŋu nìn sá meetab saalku, ní ŋwaan sá meetab bili. 16 Bi nìn dū ajan aŋmoo ki ŋáĺ ki kpáfì ubaanti, ní ki dū aluu mun ki ŋáĺ ki kpáfì ubaanti. 17 Bi nìn dū ŋŋaacalimu imuŋku ili nì saalaa ki kpákám̀ aŋaajan aŋmoo ŋin bi ŋáĺ ki kpáfèe diŋaajandi din lúŋkèe nyɔɔgbandi, nì aluu ŋin bi ŋáĺ ki kpáfèe din pééyee nyɔɔgbandi. 18 Bi nìn dū tasa kúti ki mɔ́ɔ́ titábikaal ki dūu nákáǹ ŋŋaacalimu pu ki dūu cúú diŋaajandi din kíǹee ki táb́, ní an dūu ŋá tiwambaantiil. 19 Boonee ní bi mántì tipigban ki dūu bīiǹ tanti un bīī circir kɔŋkooŋŋu puee, ní ki dū ŋgban ŋun dàfèe ki páaǹ.

20 Ní bi dū akasiya dɔŋu ki kpáá idɔjaati ki cóoǹ án nīn ŋúb́ circir kɔŋkooŋŋu. 21 Idɔjaatee fɔkɔŋŋu nìn sá meetab biŋmoo, ní i-waaŋŋu sá santimeetab biŋmoo kpá imuŋku inaa. 22 Bi nìn cáká idɔ ili in cāatèe taapui ní i kɔ́ĺ tɔb ili ili. Bi nìn ŋá idɔjaatee kɔkɔ pu míǹ ní. 23 Bi nìn kpáá idɔjaati mmuŋku circir kɔŋkooŋŋu ŋgiil pú, 24 ní ki dū animbil kúti ki mɔ́ɔ́ titílkaal imuŋku ili. Tíǹ pu ní bi nín kpáá idɔjaati puee làá nīn tɔ́kɔ́. Bi nín kpáá idɔjaati puee kamaa nìn cáá titílkaal tili tin poon ní laakin bi cákée làá kɔ́ee. 25 Bi nìn gíti kpáá idɔjaati mmuŋku circir kɔŋkooŋŋu ŋgan pú. 26 Bi nìn dū animbil kúti ki mɔ́ɔ́ titílkaal imuŋku ili, ndɔjaati kamaa titílkaal tili. 27 Bi nìn kpáá idɔjaati iluu ki cóoǹ circir kɔŋkooŋŋu boon pú jandi din bí ŋwìiń jeetilaŋki púee. 28 Bi nìn kpáá idɔjaati ili ki cóoǹ akpin pu poon pú án nīn tíkí circir kɔŋkooŋŋu. 29 Idɔjaati gbanti taapui nìn dátiǹ tɔb, ama ní ki tin dūu kpáfì yilpu dibɔɔbaantiil dibɔmbipeepeekaalin. Míǹ ní idɔjaatiliitilee nìn sá tiwambaantiil ní ki nìn sá titíkiŋkaal. 30 Mimmee idɔjaatee nìn sá inii dee, ní i-taapu tílkaati nìn sá animbil kúti ní ki nìn sá saalku nì ubɔ, an dàkà yii ndɔjaati ŋubɔ, titílkaal tili.

31 Bi nìn dū akasiya dɔŋu ki kpítì ikalim iŋmoo ki cúú idɔjaati in bi kpááyee circir kɔŋkooŋŋu jandi diba. 32 Bi nìn kpítì ikalim iŋmoo mun ki cúú dijandi din kíǹee, ní ki kpítì iŋmoo mun ki cúú boon ŋwìiń jeetilaŋki pú. 33 Ŋkalim ŋun nìn bí kansikinee nìn jítì idɔjaati in bi kpááyee kansikin nì kansikin ní, kí yòon̄ circir kɔŋkooŋŋu kílilaŋki kí tin cáá kátí. 34 Bi nìn dū sindaariya ki nyūntì idɔjaati in bi kpááyee nì ikalimee pu, ní ki dū sindaariya ki mɔ́ɔ́ mbɔmbiyaamu mun poon ní bi dū ikalimee ki bɔ́ee.

35 Bi nìn dū gulfab bin máǹ gùŋgumee nì bi máǹ wèeee nì bi máǹ cínciŋee nì gulfab bin bí fálfal ki dàfèe ki lùn̄ ŋŋaasakaŋkaa, ki lùn̄ keerubimbi ki nákáǹ ŋŋaabuee pu. 36 Bi nìn dū-ŋu ki sākaǹ akasiya dɔjaai inaa in bi dū sindaariya ki nyūntì sindaariya babikaati túuńee. Bi nìn dū animbil kúti ki mɔ́ɔ́ titílkaal tinaa ki dūu tíĺ taapu.

37 Bi nìn dū gulfab bin bí fálfal ki dàfèe, nì bin máǹ gùŋgumee nì bin máǹ cínciŋee nì bin máǹ wèeeeyee ki lùn̄ ŋŋaasakaŋkaa ŋubɔ mun, usatalul nyáantì-ŋu ní bi dūu sākaǹ circir kɔŋkooŋŋu punyɔkɔki nyɔkɔpu. 38 Bi nìn kpítì akasiya dɔjaatii iŋmoo, ki dū sindaariya ki nyūntì-i ki dūu cóoǹ, ní ki dū titábikaal tin bi dū sindaariya ki mɔ́ɔ́yee ki bá, ní ki dū tasa kúti ki mɔ́ɔ́ titílkaal tiŋmoo ki tíĺ idɔjaatee taapu. Idɔjaati gbanti pu ní bi nìn dū ŋŋaasakaŋkaayee ki sākaǹ.