Disaŋkindi 22

1 «Unaayuu yaa bíi wìil̄ digundi kunyeeu kí kɔ́ kudiin kí yɔ̀ tiwan ní bi yaa fáá ki kūū-uee, un kūū-uee kaa ŋá nnikpaakoon. 2 An yaa sá ŋwiimpu ní u bíi ŋáań míǹ ní bi kūū-uee, un kūū-uee ŋá nnikpaakoon. Unaayuu máaǹ kí pà kun u yùn̄ee pu ní. U yaa kaa cáá báà tibee, bí dū-u kí nyāfì kí pà kun u yùn̄ee pu.

3 «Ubɔ yaa yùn̄ unaa àá kimaŋ àá upii àá uŋoobu ní bi yaa ká kuwaŋkuluu gbanti unaayuu ŋaan ku dáá wāĺee, unaayuuyee máaǹ kí téeǹ kuwaŋkuluu kun u yùn̄ee mili pu.»

Asaluub bɔti

4 «Ubɔ yaa yāntì u-waŋkuti kɔ́ u-juti saakun, àá u-juti fiinyi kpaabun ki ŋmɔ́ee, ú dāá lēē u-saakun àá u-fiinyi kpaabun subimɔntiŋ kí téeǹ.

5 «Ubɔ yaa sēē u-kpaabun ŋŋmi ní an fōō ikuŋkum ki tin kɔ́ ubɔ saakun, ki wùn̄ bilee un bi cáńee, àá un baa láá cáńee àá un kaa láá lòon̄ee, un sēē ŋŋmee ń pà tin ŋŋmi wùn̄ee pu.

6 «Ubɔ yaa tīī u-juti animbil àá tiwan tin pɔ̄ɔ̄ kudaauee yii ú dūú yóoń-u, ní unaayuu kɔ́ un fōō tiwanee dumpu ki yùn̄ tiwan gbantee, bi yaa cúú unaayuuyee, ú pà tiwan tin u yùn̄ee mili pu. 7 Bi yaa kaa ká unaayuuyee, un fōō u-juti wanti ki yóoǹ u-ceeyee ń sútí kí pìl̄ Unimbɔti, kí pùtī yii waa gbēē u-juti wanti. 8 Tibɔti tin kɔkɔ pu ní ni kpákà ní ibaamɔn kaa nyáńee, an yaa sá unaa pu àá kimaŋ pu àá upii pu àá tiwampeeŋkaal pu àá tiwan tiba tin wáŋkì bi dūu túǹ ubɔ puee, binib bili bin bíi kpákà mimmee ń cáań bi-bɔti Unimbɔti nimbiin. Un ní Unimbɔti yaa sāā diŋambil yii úǹ di yì dibɔkpilee ń pà tin pu bi kpákèe mili pu.

9 «Ubɔ yaa dū u-maŋki àá u-naau àá u-piiiu àá u-ŋoobuu àá kuwaŋkuluu kubɔ ki kpāaǹ u-juti, ní kuwaŋkuluuee kpíì àá ku fōō tiweendi àá bi yùn̄-ku, ní báà ubɔ kaa ká kí lēē mmɔ́ɔnee, 10 u-juti ń pùtī Unimbɔti yii waa gbēē u-bɔɔ wanti ní u-bɔɔ ń gbìl̄ kí tīiǹ-u. Mimmee waa ti pà kuwaŋkuluu gbanti pu. 11 Ama u-cee ní bi yaa yùn̄ kuwaŋkuluu gbantee, ú nyàab̀ kuwaŋkuluu kí téeǹ uwandaan. 12 Upeecuncuti di yaa cúú kuwaŋkuluu gbantee, ú cáań ku-laakin kíǹee kí dàkà án nīn sá seera. Niinee waa ti pà kuwaŋkuluu kun an cúúyee pu.

13 «Ubɔ yaa cūtìi pīnnì u-juti waŋkuluku ní ku ká tiweendi àá ku kpíì kuwaŋkuluu daan boonee, un pīnnì-kuee máaǹ kí pà uwandaan. 14 An yaa sá uwandaan nimbiin ní míǹ jítèe, an kaa cáá ú pà tiba. Ama u yaa nìn fōō-ku ki ŋá gbaaree, ú pà gbaara nimbiliŋ.»

Akoobil nì dinimbɔtinool marab biba mun

15 Ubɔ yaa kíil̀ usapɔɔn un kaa láá cáá bɔɔnee ki dōoǹ nì uee, ú pà usapɔɔnee cootiiku pu kí cáá-u. 16 U-baa yaa yíì kpataaa yii waa làá dū u-bisal kí tīī-uee, ú pà kii bi nín pée pà bisapɔmbi bin kaa nyí bininjabee cootiiku puee^a.

17 Ní kpɔ̀ unimpu un yaa ŋáań kukpaŋkpantiiu tundee^b.

18 Ubɔ yaa dōoǹ nì kuwaŋkuluuee, bí kpɔ̀ udaan^c.

19 Un di yaa ŋá saraabi ki tīī awaa ní an kaa sá ti-Dindaanee, bí kpɔ̀ udaan^d.

20 «Ní taa sàaǹ unicaan un dɔ́miń ki kɔ́-ni ki bí ni-tiŋkinee, kí taa mùul̀-u. Di sá yii ni mun nìn kāl̀ kunicaŋu Eejipiti tiŋkin míǹ ní. 21 Ní taa sàaǹ ukpiipu nì ditaŋkpiibil^e. 22 Ni yaa bíi sàantí-bi ní bi tíminsì an bāań-mee, m làá pīlifì bi-timinsii, 23 kí fōō diŋuul ni-pu, ní kí yàntī bí kpɔ̀-ni kujaaun. Niinee ni-nimpoobi làá kpántí bikpiipoobi ní ni-biyaamu ń kpántí ataŋkpiibil.

24 «Man nibul kansikin ubɔ àá usoodaan ubɔ yaa dɔ́miń ni-cee ki pīnnì animbilee, ní taa páań-u animbipaaŋkaa^f.

25 «A yaa fōō a-juti bɔkutikpaandi ki yóoǹ a-cee toolimee, á gíiǹ kí tīī-u kí wàatī ŋwìiń ń nín jēetí. 26 Kun puee kun u pée cáá kí bìin̄ u-ba puee kɔkɔ dee. A yaa kaa gíiǹ ki tīī-uee, u làá gíti ká ba kí bìin̄ kunyeeu? U yaa tíminsì ki yíiń-mi, m làá pīlifì-u, di sá yii m sá usaasɔl ní^g.

27 «Ní taa sìì man ni-Nimbɔtiu, kí taa tɔ̄ ni-bɔtiu un kpèé ni-nibulee mbusu^h.

28 «Ni máaǹ kí cáań ni-kpaajinti ticɔfikaal nì ni-dapeepeekaam min ni ŋmáaḿee kí ŋá-mi saraa.

«Ní dū ni-biseebiyaamu nninjabiyaamu kí sú-mi.

29 «Míǹ mbaantiim ní ní tí dū ni-naai nì ni-piii nì ni-ŋoobui biseemaliŋ kí sú-mi. Tiwaŋkuti gbanti yaa màl̄ee, ti-biyaamuee ń nīn bí mu-na cee kí cáá sāā iwiin iluli. Winnii dalee ní cáań-mu kí dūú ŋá saraa kí tīī-mi.

30 «Ni làá nīn sá binib bin bí circiree ní m-cee. An puee ní taa ŋmɔ́ upeel un upeecuncuti cúú ki tɔ̄ntèe nantiⁱ. Ní dū-tì kí tīī iboo.