Disaŋkindi 21

Iyumbu in sá Eebru yabee pu marab

1 Ní ti-Dindaan gíti kútì ki lī yii: «Marab bin a làá yóoń Isirayeel yabee sèé. 2 Ni yaa làá dāá dā uyumbu ní u sá ueebrujee, ú dāá dū abin aluu kí tɔ̄ ditundi kí tīī-ni, dibinluluútiilee ní yàntī ú nyā kí tɔ̄ u-ba, kí taa pà báà tiba. 3 U yaa nìn sá ujaakpaati ní ni dá-u ú nīn tūǹ-ni ditundee, ú fàtīí nyā u-baba. U yaa nìn cáá unimpuee, ú nyā kí kpáaǹ u-nimpuu. 4 An yaa sá u-kpiliu di cáá unimpu ki tīī-u ní unimpuee màl̄-u mbininjabiyaamu àá nnimpubiyaamuee, u-kpiliu di yì unimpu nì mbiyaamu, uyumbuee ń nyā u-baba. 5 Ama uyumbuee yaa bí yii: <M néeń m-kpiliu nì m-nimpuu nì m-biyaamu, maa làá nyā kí nīn tɔ́ m-ba,> 6 niinee ní u-kpiliu ń cùnnì-u Unimbɔti nimbiin. Ú sútí-u kí pìl̄ kudii punyɔkɔki ní kí dū u-tafal kí nákáǹ punuu àá ndɔ ŋun pu punuu nákée ní kí dū mpiin kí sāā kí cíĺ u-tafal, ní ú kpántí u-yumbuu kí nīn cáa cá jaanjaan^a.

7 «Ubɔ yaa dū u-bisal ki nyáfì ú nīn sá uyumbuee, úǹ kaa làá nyā kí tɔ̄ u-ba kii bininjab nín bí puee. 8 Usapɔɔnee bɔti yaa kaa fáatì u-kpiliu ú dū-u kí kpántí u-nimpuuee, u-yab ń pà kí fàtīí fōō-u. U-kpiliuee kaa cáá nsan kí dū-u kí nyāfiǹ uniyaŋyan. U yaa ŋá mimmee, u nyáń usapɔɔnee boon. 9 U yaa dá-u ki tīī u-jipɔɔn cááyee, ú ŋá kii mara nín lī yii bí ŋá bisapɔmbi puee. 10 Boonee u yaa láa fātìi cáá unimpuliliitee, ú taa láa bàtī unimpukpiki nín cáá nsan kí fōō tiŋyee báà tiba pu, an dàkà yii tijin jandi nì tiwampeeŋkaal jandi nì uninja nì unimpu dooŋu jandi. 11 U yaa yíì kaa bíi ŋáań tiwan tita nee ki tìì-uee, unimpuee cáá nsan kí nyā kí tɔ̄ u-ba kí taa pà báà tiba.»

Ikpiti in unil yaa ŋá u máaǹ ŋkúmee

12 «Un di yaa fáá ki kūū u-jutee, bí kpɔ̀ udaan^b. 13 U yaa kaa píĺ-u ki yóoǹ ní an sá yìkíl̄ yikil ní udaan dūu dīntiǹ-uee, m làá lēē mpaan ŋubɔ ŋun poon ní u làá sāǹ kí cùú báĺee^c. 14 Ama un di yaa nyí ní ki ŋá nciin ki kūū u-jutee, báà udaan yaa sáǹ ki cūtìi kɔ́ m-saraafaŋŋu, ní nyāntí-u kí kpɔ̀-u^d.

15 «Un di yaa fáá u-baa àá u-nee, bí kpɔ̀-u.

16 «Un di yaa yùn̄ unil ki nyáfì àá u bí u-ceeyee, bí kpɔ̀-u^e.

17 «Un di yaa sīī u-baa àá u-nee, bí kpɔ̀-u^f.»

Unil yaa fáá u-juti ki tīī-u tiweendee bɔti

18 «Binib bili di yaa bíi jáà ní ubɔ fáá u-juti àá u yá-u ditaŋkpal ní u fōō tiweendi kaa kpíìyee, 19 u yaa láa yíkì ki ŋūǹ kí nyīī ŋkpandɔ kí nyā mmɔŋki kí còom̀ee, un fáá-u ní u fōō tiweendee nyáń tibɔtin. Ama an sá ú pà u-juti tundi din u bàà làá tɔ̄ an gbēeǹee pu, ní kí cáaǹ-u ú pɔ̄ɔkì kɔkɔ.

20 «Ukpil un di yaa dū ndɔ ki gbáń u-yumbuu uninja àá unimpu ní u kpíì u-ŋaanee, bí tɔ̀-u ipɔntoon. 21 Ama ŋwiin ŋubɔ àá ili boon ní u yaa kpíìyee, bí taa tɔ̀-u ipɔntoon, kun puee u-kpiliu dū u-nimbiliŋ ní ki dá-u.

22 «Bininjab yaa bíi jáà ní ki cūtìi bìl̄ upɔdaan ní u màl̄ dikáal tiba kaa ŋá-uee, u-cal ń gíí dipɔndi ní un ŋá mimmee ń pà kí nóó nì bibɔsoonliibi nín sòon̄ ki síiǹ puee. 23 Ama an yaa ŋá míǹ ní unimpuee kpíìyee, see bí kpɔ̀ un ŋá mimmee kí téeǹ. 24 Ubɔ yaa lēē u-juti nimbilee, bí lēē u mun yal. Ubɔ yaa lēē u-juti nyindee, bí lēē u mun yal. Ubɔ yaa gūutì u-juti ŋalee, bí gùutī u mun yɔŋu. Ubɔ yaa gūutì u-juti taalee, bí gùutī u mun yal. 25 Ubɔ yaa wùn̄ u-juti ŋŋmee, bí wà u mun ŋŋmi. Ubɔ yaa gbáń ki léetì u-juti wuntee, bí gbá kí léetí u mun yati. Ubɔ yaa ŋá u-juti tiweendee, bí ŋá u mun tiweendi^g.

26 «Ukpil un di yaa fáá u-yumbuu uninja àá unimpu nimbil ní di kpíìyee, ú gíiǹ-u kí líí ú tɔ̄ u-ba. Uyumbuee ń taa pà báà tiba dinimbil din kpíìyee pu. 27 An yaa ti sá u-yumbuu uninja àá unimpu nyindi ní u gbáń ki lēēyee, ú gíiǹ-u kí líí ú tɔ̄ u-ba. Uyumbuee ń taa pà báà tiba bi nín gbáń-u dinyindi din lēēyee pu.

28 «Unaa di yaa gūū ki kūū uninja àá unimpuee, bí yāŋkì unaayee ataŋkpee kí kpɔ̀. Bí taa ŋmɔ́ unaayee nanti, ama ní kí taa ŋá unaa daan tiba. 29 An yaa sá yii unaayee pée gùutī binib míǹ, ní bi tùkū u-dindaan ki kpáafì-u ní waa kpēē-u tiŋan ní u gūū ki kūū uninja àá unimpuee, bí yāŋkì-u ataŋkpee kí kpɔ̀, ní kí kpɔ̀ u-dindaan mun. 30 Bi yaa gíí udaan dipɔndi ú pà kí dā u-maŋfalee, ú pà kunimbiŋmiiu kun bi gíí-uee kɔkɔ. 31 An yaa sá kinaacimpɔmbiki àá kisapɔmbiki ní unaa gūū ki kūūyee, bí nóó mara gbanti ubaanti. 32 Unaa yaa gūū uyumbu uninja àá unimpuee, unaayee dindaan ń pà animbil jitɔmbi mmuŋku nì saalaa kí tīī uyumbuee kpiliu, ní bí yāŋkì unaayee ataŋkpee kí kpɔ̀.

33 «Ubɔ yaa gbìn̄ dinyimbɔbil ní kaa bīiǹ àá u bīitì kaa gíiǹ ki bīiǹ ní ubɔ naau àá u-maŋki jéetì poonee, 34 dinyimbɔbil daan ń pà kuwaŋkuluuee nyampooku nín sá puee, ní kí yòon̄ diwaŋkpil.

35 «Ubɔ naau di yaa gūū ki kūū u-juti yɔuee, bí dū unaa un gūū u-jutee kí nyāfì, ní bin yì inaayee liitil ń yàkatī animbil nì unaa un kpíìyee nanti. 36 Ama unaayee dindaan yaa nyí yii u-naau pée gùutī míǹ ní kaa kpēē-u tiŋanee, ú nyàab̀ unaa kí téeǹ unaa un kpíìyee yil pu kí yòon̄ dinakpil.»

Tiwaŋkuti naayubu

37 «Ubɔ yaa yùn̄ unaa àá upii ki kūū àá ki nyáfèe, ú téeǹ inaa iŋmoo unaa un u yùn̄ee yil pu, ní kí téeǹ ipii inaa upii ubɔ un u yùn̄ee yil pu^h.