Disaŋkindi 20

Unimbɔti tīī u-nibul marab saalaa

(Kpèè Ditee 5.6-21)

1 Niinee ní Unimbɔti sòon̄ nì Isirayeel yab tibɔti nee yii:

2 «Man di sá a-Dindaan a-Nimbɔtiu un nyántìń-si kuyuŋun Eejipiti tiŋkinee.

3 Á taa jāam̀ unimbɔti ubɔ kí kūtì man pu.

4 Á taa mɔ́ɔ́ diwaal diba kí nántíǹ tiba tin bí yilpuee àá tin bí kitiŋ pu taapu dooyee àá tin bí nnyimin kitiŋ taapuee. 5 Ní taa gbàan̄ awaa gbanti nimbiin ní kaa nín jáam̀-ŋigb \fr 20.5 \ft B. 4-5: kpèè 34.17, Akoo 19.4, 26.1, Ditee 4.15-18, 27.15.. Di sá yii man di sá a-Dindaan a-Nimbɔtiu, Unimbɔti un cáá ipoompoonee. Ubɔ yaa ná-mee, m dátí udaan tafal ní kí dāá dáaĺ u-biyaamu mun tafal kí cáá sāā anaantitɔntɔkɔ ata kii anaa pu. 6 Ama bin néeń-mi ki ŋúb́ m-marabee, m ŋáań-bi tiŋan ní kí cáá sāā anaantitɔntɔkɔ kutuku puⁱ.

7 Á taa nín̄ yíì man a-Dindaan a-Nimbɔtiu yindi fám fám, kun puee man a-Dindaan kaa làá dūú pɔ̄ un ŋáań mimmee^a.

8 Á nīn tɔ́ ŋwiŋŋuŋfikaa ŋú nīn sá circir wiiŋŋu ki tīī-si. 9 A cáá iwiin iluu kí tɔ̄ ditundi, kí ŋá tin kɔkɔ a cáá kí ŋée. 10 Ama ŋwinluluúti dal sá ŋwiŋŋuŋfikaa ní, ŋwiin ŋun a dūu sú man a-Dindaan a-Nimbɔtiuee. Á taa tɔ̄ báà ditundi diba ŋwiin gbanti. Sii a-baaa, a-jipɔmbaaa, a-bisalibaaa, a-tɔntɔnliibi bininjab nì binimpoobaaa, a-waŋkutaaa, binicambi bin kóò a-pueeyaaa, ubɔ ń taa tɔ̄ ditundi. 11 Di sá man ni-Dindaan dū iwiin iluu ní ki náań yilpu nì taapu, nì tiŋku nì tin kɔkɔ bí u-poonee, ní ŋwinluluúti dalee m kāl̀ ki ŋūŋfì. An pu ní ti-Dindaan bīiǹ ŋwiŋŋuŋfikaa gbanti pu, ní ki dū-ŋu ki sú u-ba^b.

12 Á nīn tɔ́ a-baa nì a-na ní kí ŋmā kí kàl̄ kitiŋ kin ti-Dindaan Unimbɔti làá tīī-see poon kí yúntí^c.

13 Á taa kpɔ̀ unil^d.

14 Á taa ŋá tilaakpaal^e.

15 Á taa yɔ̀^f.

16 Á taa lēē inyimɔn seerau kí túń a-juti pu^g.

17 Á taa nín̄ cáá a-juti diiku pu nnimbitaataam, kí taa nín̄ cáá a-juti nimpuu àá u-tɔntɔnliu uninja àá unimpu àá u-naau àá u-maŋki àá tin pée sá a-juti wantee pu nnimbitaataam^h.»

18 Isirayeel yab kɔkɔ nìn gbìl̄ itaatantati nì ŋyin pu, ki ká itaaŋmɔŋmɔ nì dijool din pu nnyiim bīīyee, ní ki fāŋkì yɔ́kɔ́ yɔkɔ ki yúń kudandaŋu. 19 Ní bi bí Mooyiisi yii: «Sii ní ń sòoǹ nì ti a-ba tí ŋmā kí gbìl̄. Ama Unimbɔti u-ba ń taa ti sòoǹ nì ti, an yaa kaa sá míǹ ti làá kpúⁱ.» 20 Ní Mooyiisi bí-bi yii: «Taa fàŋkìmaan! Unimbɔti là kí cɔ̄ŋkì-ni kí kpèè ní, an pu ní u dɔ́miń ni-cee. U là ní nīn tɔ́-u ní kí taa ŋá ikpiti.» 21 Samaa kɔkɔ nìn yúń kudandaŋu, ama ní Mooyiisi sútìi pìl̄ ditagbambɔndi din poon Unimbɔti nìn kēe.

Mara un bi yóoǹ nsaraafan puee

22 Ti-Dindaan bí Mooyiisi yii: «A nín làá tùkù Isirayeel yab tibɔti tiŋyee sèé: <Kéè nimbi ni-ba ká yii doooo yilpu ní m sòon̄ní nì naa! 23 Ní taa dū animbil kúti nì sindaariya kí mɔ́ɔ́ awaa kí dū-ŋi kí ŋàl̄-mi. Ní taa mɔ́ɔ́ awaa gbanti kí yóoń ni-ba. 24 Ní dāá mā-mi titan saraafaŋŋu ŋun pu ni làá dāá nīn cáá ni-naai nì ni-piii nì ni-ŋoobui kí ŋáań-mi bisaraawɔkaabi nì mpèé saraabee. Laakin kamaa ní m yaa láa lēē m-ba ki dàkēe, m làá dāá nīn bí niin kí bìin̄ ni-pu. 25 Ama ni yaa làá dū ataŋkpee kí mā nsaraafanee, ní taa dū ataŋkpee ŋin bi kpítèe kí mā, di sá yii ni yaa dū kigaai ki kpítèe, ni kɔ́ǹ-ŋi tijɔkɔndi dee^j. 26 Ní taa mā nsaraafan án nín bí yilpu yilpu bi tà ki jɔ́ḿ, án nín làá ŋá pu bí taa ká un còom̄ ki jɔ́ḿee cancaŋgbeelee.>»