Disaŋkindi 19

UNIMBƆTI PŌOǸ ISIRAYEEL YAB DIPOONDI 19–24

Unimbɔti là kí pòon̄ Isirayeel yab dipoondi

1 Isirayeel yab nín nìn nyáń Eejipiti tiŋkinee, iŋmal ita wimpeepeekaaŋu deedee ní bi bàn̄ Siinaayi teekun. 2 Bi nìn yíkì Reefiidiim ní ki dūu bàn̄ Siinaayi teekun ki ŋātì ŋkaa niin ki túĺ dijool. 3 Ní Mooyiisi dàb̄ dijool ki nín cá Unimbɔti cee.

Ti-Dindaan nìn bíń dijoolee yilpu ki yíiń-u ní ki bí-u yii: «Á tùkù Jaakɔb naantiibi Isirayeel yab yii: 4 <Ni ká tin m ŋá Eejipiti tiŋkee, nì m nín yōoǹ-ni m-feeŋyi pu kii ukaalunee ki cáań-ni m-ceeyee. 5 Kɔŋkɔnnee ni yaa pílifì m-nyɔkɔ, ki ŋúb́ m-pooŋyee, inifunaan kɔkɔ kansikinee, nimbi di làá nīn sá man m-ba bindi pu nibul. Di sá yii man di yì kitiŋ kɔkɔ. 6 Ama nimbee, ni làá nīn sá man beelin saraaŋaliibi, ní kí nīn sá ditimbundi din sá man yal ki tūǹ m-tundee^a.> Tibɔti tin a làá cáá nàatī Isirayeel yabee dee.»

7 Mooyiisi bāańee ní ki yíiń Isirayeel yab kpilib ní ki dū tibɔti tin kɔkɔ ti-Dindaan tùkūń-uee ki bíl̀ bi-nimbiin. 8 Ní dinibul kɔkɔ kíí yii: «Tin kɔkɔ ti-Dindaan lēe, ti làá ŋá míǹ.» Ní Mooyiisi gíiǹ bi nín kíí puee ki tùkū ti-Dindaan. 9 Niinee ní ti-Dindaan bí Mooyiisi yii: «Kpèè, m làá dāan̄ a-cee kí nīn kāń ditagbancancaal din gbìfèe poon kí sòoǹ nì si ní dinibul ń nīn gbìl̀ m nín bíi sòoǹ nì see, án nín làá ŋá pu bí nīn cáá a-pu dimákal baabadalee.» Ní Mooyiisi cáá Isirayeel yab nín kíí puee ki tùkū ti-Dindaan.

Unimbɔti nì Mooyiisi kpáfì Siinaayi jool pu

10 Ní ti-Dindaan bí Mooyiisi yii: «Cù samaa cee kí tùkù-bi yii bí nīn bí circir díǹ nì fool, kí fíntí bi-wampeeŋkaati. 11 Bí bɔ́ntí bi-ba kí nīn cí winta dal, di sá yii yaadalee, m làá kpákatiń kí nīn bí Siinaayi jool pu, dinibul kɔkɔ nimbiin. 12 Á yóoń-bi kikpaanyɔkɔ kí màntīí tū dijool, ní kí tùkù-bi yii: <Ubɔ ń taa dàb̄ dijool, kí taa gbēē di-kpaanceetiŋu.> Un kamaa yaa gbēē-dee làá kpú. 13 Baa làá gbēē udaan, ama ataŋkpee àá ipiin ní bi làá dūú yāŋkì-u kí kpɔ̀. An yaa sá unilaaa, kuwaŋkuluuaaa, udaan ń taa ŋmátí. Bi yaa láa búń ŋyin baba ní biba dāa ŋūǹ kí jɔ̄m̀ dijool^b.» 14 Mooyiisi kpákatìń dijool puee ní ki yāntì samaa kɔkɔ bɔ́ntì ki bí circir, ní ki fíntì bi-wampeeŋkaati. 15 Míǹ boonee ní u bí samaa yii: «Ní bɔ́ntí, iwiin ita nee poonee, ubɔ ń taa gbēē unimpu.»

16 Winta dal kutaafaauee ní ditagbancancaal din gbìfèe dɔ́miń ki yúl̀ dijool pu, ní utaa bí ki tátí ki ŋmóò^c dijoolee pu. Bi nìn gbìl̀ ŋyin búǹ ki pɔ̄ɔ̄ kpaŋkpam. Tifaandi nìn kɔ́ samaa kɔkɔ dinaapaal pu ní bi-wunti jìkì. 17 Mooyiisi nyántì samaa kɔkɔ dinaapaal pu bí cù Unimbɔti nimbiin, ní bi bàn̄ ki yúl̀ dijool taapu. 18 Siinaayi jool kɔkɔ nìn kpántì ŋŋminyiim ŋma ní, kun puee ti-Dindaan nìn kpákatìń ŋŋmi poon. Ŋŋminyiimee nìn nyēē ki jɔ́ḿ kii kipaai ŋminyiimee, ní dijool kɔkɔ nìn cīŋkì tiŋan tiŋan. 19 Ní ŋyinee mɔ̀tīi búǹ ki pɔ̄ɔ̄ kpaŋkpam. Mooyiisi nìn sòoǹ ní Unimbɔti kíikí-u mpɔn itaatantati poon.

20 Míǹ ní ti-Dindaan nìn kpákatìń Siinaayi jool yilpu kúnti kunti, ní ki yíiń Mooyiisi u jɔ́m̀ u-cee niin. 21 Ti-Dindaan nìn bí Mooyiisi yii: «Kpákatí kí cù samaa cee kí tùkù-bi yii bí taa ŋá kìrikiri yii bi là kí wāl̀-mi, án yaa sá fám, bi-kansikin binib tikpil làá kpú. 22 Bisaraaŋaliibi bin làá sútiń kí pìl̄-mee gba ń bɔ́ntí bi-ba kí nīn bí circir, án yaa sá fám, m làá kpɔ̀-bi.» 23 Ní Mooyiisi bí ti-Dindaan yii: «Samaa kaa ŋūǹ kí jɔ̄m̀ Siinaayi jool pu, kun puee a yóoǹ-ti mara yii tí yóoń kikpaanyɔkɔ kí màntīí tū dijool ní samaa ń nīn yúń kudandaŋu.» 24 Niinee ní ti-Dindaan bí Mooyiisi yii: «Kpákatí, si nì Aarɔn ń fàtīí jɔ̄mìń. Ama bisaraaŋaliibi nì samaayee ń taa ŋá kìrikiri yii bí làá jɔ̄mìń man cee, án nín làá ŋá pu bí taa kpúee.» 25 Ní Mooyiisi kpákatìń samaa cee, ní ki dū an bɔtee ki tùkū-bi.