Disaŋkindi 18

Mooyiisi coo Jeetroo dɔ́miń u-cee kuteeun

1 Mooyiisi coo Jeetroo, Madiyan tiŋki tandaaŋwu gbìl̄ tin kɔkɔ Unimbɔti ŋá ki tīī Mooyiisi nì Isirayeel u-nibulee, ki gbìl̄ min ní ti-Dindaan nyántì Isirayeel yab Eejipiti tiŋkinee. 2 Ní Mooyiisi coo Jeetroo yōoǹ Mooyiisi nimpuu Siipoora un u nìn yāntì u dɔ́miń ki bí u-ceeyee, 3 nì u-jipɔmbi bilee. Bi nìn yíì ubɔ yii Geersɔm, an taapu di sá yii <Unicaan niin>, di sá u lī yii: <M sáǹ ki kpántì unicaan kinicantiŋ poon^a.> 4 Bi nìn yíì un kíǹee yii Eeliyeeseer, an taapu di sá yii <M-Nimbɔtiu di jòoń-mi>, di sá u lī yii: <M-baa Nimbɔtiu di jòoń-mi ní ki fīī-mi Faaroo ŋaan ki líì.>

5 Mooyiisi coo Jeetroo nì Mooyiisi nimpuu nì u-jipɔmbi bāań ki ká-u kuteeun, Unimbɔti jool caŋin, laakin u nìn ŋātì ŋkaa ki kēe. 6 Ní u tú bí tùkù Mooyiisi yii: <Man di sá a-coo Jeetroo. M cáań a-nimpuu nì a-jipɔmbi liitil tí dāá màntì a-pu.> 7 Ní Mooyiisi túŋkì u-coo ki gbāaǹ u-nimbiin ki jáam̀-u, ní ki yíkìi kpàl̄-u. Bi bālifì tɔb laafiyau pu, ní ki nín kóò Mooyiisi tantiun. 8 Ní Mooyiisi máafì u-coo min ní ti-Dindaan ŋá Faaroo nì Eejipiti yab Isirayeel yab puee. U nìn máafì-u agìń ŋin kɔkɔ Isirayeel yab nìn ká nsannee, nì ti-Dindaan nín nyántì-bi agìń gbanti poon miŋyee. 9 Ní Jeetroo bíi fàal̀ tiŋan tin kɔkɔ ti-Dindaan ŋá ki tīī Isirayeel yab, nì u nín nyántì-bi Eejipiti yab yuŋkunee pu. 10 Ní Jeetroo bí yii: «Inyɔŋki sá ki tīī ti-Dindaan un nyántì-ni Eejipiti yab nì Faaroo ŋaanee. 11 M béè kɔŋkɔnnee yii ti-Dindaan di sá ukpaan ki jítiǹ inimbɔti kɔkɔ, kun puee u nyántì u-nibul Eejipiti yab ŋaan ŋyunti ŋun bi nìn bí ki ŋáań-bi ntoomee.»

12 Mooyiisi coo Jeetroo ŋá saraawɔkaa nì mpèé saraabi ki tīī Unimbɔti. Ní Aarɔn nì Isirayeel yab kpilib kɔkɔ dɔ́miń, ní bi nì Mooyiisi coo kpáfì ki jíń tijin Unimbɔti nimbiin.

Mooyiisi kāaǹ bibɔsoonliibi

13 Kutaa wúntèe Mooyiisi kāl̀ kí sòoǹ binib bɔti, ní samaa dɔ́miń ki yúl̀ kutaafaau áli kujoou Mooyiisi ń ŋmā kí sòoǹ bi-bɔti. 14 U-coo nín ká tin kɔkɔ án sá ú ŋá kí tīī samaayee ní u bí Mooyiisi yii: «Ba ní a bíi ŋáań dinibul nee ní? Ba pu ní a kā a-baba ní dinibul nee yú ki māntìi tú-si, kí yòon̄ kutaafaau kí cáá sāā kujoou míǹ?» 15 Ní Mooyiisi kíí u-coo yii: «Binib nee dòoń m-cee ḿ bàlifì Unimbɔti ń sòoǹ nì bi tin bée ní. 16 Bi yaa tí cáá tɔb tibɔti tibee, ní bí dāan̄ m-cee ní ḿ sòoǹ kí ŋāŋkì bi-kansikin, ní kí dàkà-bi Unimbɔti koobiliŋ nì u-marab nín sá puee.»

17 Ní Mooyiisi coo bí-u yii: «Min a ŋáań nee kaa kítì. 18 A bíi tìì a-ba digìńdi ní ki bíi tìì dinibul din bí a-cee nee mun digìńdi. Ditundi nee nyìm̀ ki jítiǹ a-pɔŋŋu ní aa ŋūǹ kí tɔ̄-dì a-baba! 19 Kɔŋkɔnnee á pīlifì-mi, m làá tīī-si isaŋki ní Unimbɔti ń nīn bí a-cee. An sá yii sii ń fōō samaa yil kí yūĺ Unimbɔti nimbiin ní ki nīn cáǹ tibɔti ki nàatī Unimbɔti a-ba. 20 Á dàkà-bi akoobil nì marab, ní kí yàntī bí béé nsan ŋun bi máaǹ kí dēe nì tin bi máaǹ kí ŋée. 21 Lútí dinibul kansikin biniŋmambi bin fàŋkí Unimbɔti ki bí deedee kaa pɔ̀ gandee, kí dū-bi kí kpántí samaa kpootiliibi. Biba ń nīn sá binib kutuku ubɔ kpootiliibi, biba ń nīn sá binib dilaataal kpootiliibi, biba ń nīn sá binib imuŋku ili nì saalaa kpootiliibi, biba ń nīn sá binib saalaa kpootiliibi^b. 22 Bíǹ di làá nīn sòoǹ dinibul bɔti ŋyunti kamaa. Tibɔti tin yaa jítiǹ-bee, bí cáań-tì a-cee, ní bíǹ ń nīn sòoǹ tibɔti tin kaa pɔ̄ɔ̄yee. Ŋá míǹ kí bàtī a-gìńdi pu ŋwaam bí tūtuǹ-si á túń. 23 A yaa ŋá míǹ ní Unimbɔti yaa tīī-si marabee, a làá ŋmā kí ká mpɔn kí yūĺ ní samaa ń fàtīí kpì nì dipɔɔsɔŋkil.» 24 Mooyiisi nìn pílifì u-coo saŋkii ní ki ŋá min kɔkɔ u lēe. 25 Mooyiisi kpēē Isirayeel yab kɔkɔ kansikinee ki lēē biniŋmambi ki kāaǹ bí nīn sá samaa kpootiliibi. Biba nìn sá binib kutuku ubɔ kpootiliibi, biba sá binib dilaataal kpootiliibi, biba sá binib imuŋku ili nì saalaa kpootiliibi, biba mun sá binib saalaa kpootiliibi. 26 Bikpilibee nìn kíǹ ki bí kutaa sá kamaa ki sòoǹ samaa bɔti. Tin yaa nìn jítiǹ-bee, ní bí cáań Mooyiisi cee, ama ní ki nìn sòoǹ bi-ba tibɔti tin kaa pɔ̄ɔ̄yee.

27 Míǹ boonee ní Mooyiisi kāaǹ u-coo Jeetroo, ní u fātìi nín gítí u-tiŋkin.