A Onang Sorat ni Pablo ki
Timoteo
Kapinonan
Si Timoteo usad na hobin na tagaListra na nagtotobod ki Cristo Jesus. So kag-igin niyang babayi usad na Judia, so kanyang ama bukung Judio. Ko nangangadal si Pablo sagkud si Silas sadto Listra, nabayad nira si Timoteo sagkud naogma si Pablo kanya. Kaya, ko maglowas sira otro tanganing mangadal ko Maraay na Bareta manungud ki Cristo Jesus, ipinag-iba ni Pablo si Timoteo. Poon kadto nagin kaiba sagkud karugup na iya ni Pablo sa pangangadal. Pangala paggalin nira Pablo itinagak nira si Timoteo sadto Efeso tanganing pangonaan so manga paratobod.
Sa sorat na adi mababayad ta a manga patanid ni Pablo kontra sa manga salang katottoroan na nagigin rason kin ngata ta agko pagkabanga-banga a manga paratobod. Pangala, so manga pagsasadol ko manga kamandaan ni Pablo ki Timoteo manungud ka pangongona ka manga namomoon sagkud pagsamba, kaibaan na sa kin onong klaseng pag-oogali kinakaipowan na agko a usad na namooon sagkud a manga karugup. Pangala sinabiyan niya si Timoteo kin paono iya magin maraay na serbidor ni Cristo Jesus sagkud manungud ka responsibilidad na agko iya sa manlain-lain na gropo sa paratobod.
Sa sorat na adi mababayad a manga salang katottoroan na nakararaut sa manga kangoran arug ka pagtottoro na bawal mangagom sagkud magpaagom (4:3), manga bawal na pagkaun, sagkud maindagar a manga babayi na diri magkoyog ka manga nakatuuran na manga pag-oogali. Holi kan maigut a pag-indagar ni Pablo na makabalik sira sa baluy, magin maraay na ina sagkud agom tanganing diri matatsaran a repotasyon ki Cristo (2:9-15).
Manga Luug
Kapinonan 1:1-2
Manga katottoroan manungud sa manga paratobod sagkud sa manga namomoon kanda 1:3-3:16
Manga katogonan ki Timoteo manungud ko manga gigibowon niya 4:1-6:21