A Onang Sorat ni Pablo ki
Timoteo
1
1 Para kanimo Timoteo na tonay kong igin sa pagtobod:a
2 Mapakanimo logod a bedisyon, pagkaerak sagkud katoninungan galin sa Diyos Ama sagkud ki Cristo Jesus na kanatung Kagorangnan.
Akong si Pablo na nagsorat kadi, nangongomosta kanimo. Ako na apostol ni Cristo Jesus pinili sigon sa kamandaan ka Diyos na kanatung Paraligtas sagkud ni Cristo Jesus na kanatung paglaom.
Manga Katottoroan manungud sa Simbaan sagkud sa manga Namomoon
3 Arug ko iminanda ko kanimo ko omiyan ako sa Macedonia, tominer ika siton Efeso tanganing papondowon a nagkapirang lalaki sa pagtottoro sa salang katottoroan 4 sagkud diri pagtawan sa panawon a paggibo sa manga uda kamutangan na istorya sagkud uda kataposing pagparalista ko kandang manga ginikanan. Ta a manga an nagbobonga sana sa pakikipagdiskotir, sagkud diri nakakatabang sa trabawo ka Diyos sa paagi ka pagtobod.b 5 A katoyowan ka kamandaan ko, amo a pagkabuut na galin sa malinig na poso, maraay na kaisipan sagkud sinserong pagtobod. 6 Agko nagkapira na tinnalikokod na sa arug kading katottoroan sagkud natuud na so sadiri sadto manga orosipan na uda kamutangan. 7 Gosto nirang magin paratottoro ka Layi ni Moises, alagad diri man nira maintindiyan kin ono a kaologan ka kandang manga inoosip o kin ono a manga itinotottoro nira na masarig nirang pinaninindugan.
8 Isi ta na a Layi maraay kin ginagamit sa tamang paagi. 9 Isi ta man na a Layi itinao bukung sa manga matanos kindi sadto manga diri kinnokoyog ka layi sagkud manga abung magpasakup, sa manga tawong bukung makaDiyos sagkud sa manga makasalan sagkud nag-oosip sa karatan manungud sa Diyos, sagkud so manga ginnuguraan ka kandang manga kag-igin, sagkud paraguraan. 10 Kaiba a manga parasambay sagkud naggigibo sa kadostaan, manga bakla, parakidnap, botigun, manga nagtetestigo sa sala sagkud so manga tawong kinnokontra ka tamang katottoroan 11 na nasa mamorawayun na Maraay na Bareta, na galin sa Dakulung Diyos na ipinagkatiwala kanaku tanganing ipaayag.
A Biyaya ka Kagorangnan ki Pablo
12 Nagpapasalamat ako ki Cristo Jesus na kanatung Kagorangnan, na amo tinnao kanaku sa kakusugan, sagkud ibinilang akong maimbod, sagkud pinnili kanaku na magsirbi kanya. 13 Dati usad ako sa nagparaosip sa maraut kontra kanya, sagkud nagpasakit sagkud nagtoyatoya sa manga kangoran, alagad naerakan niya ako holi ta diri ko pa naiisiyan na sala palan so ginigibo ko ta uda pa ako pagtobod kanya. 14 A malakaambondang biyaya ka kanatung Kagorangnan itinao kanaku, kaiba a pagtobod sagkud pagkabuut na isan ki Cristo Jesus.
15 Amo adi a matood na kasabiyan na kinakaipowan na akoon saigo, na si Cristo Jesus inniyan sadi kinaban tanganing iligtas a manga makasalan na kin sari, ako a pinakamakasalan sa ngamin. 16 Alagad naerakan ako ka Diyos, tanganing so nangyari kanaku maipabayad ni Cristo Jesus kin gaomno iya ka pasensiyoso, sagkud tanganing magin arugan sadto manga tomotobod kanya. Sa pagtobod nira makaako sira ka boway na uda kasagkuran. 17 Ngowan para sa Hading uda kasagkuran, uda kagranan sagkud diri nababayad, a onra sagkud kamorawayan mapakanimo logod anggan pa man. Amen.
18 Timoteo, igin ko, itinao ko a manga kamandaan na adi kanimo sigon ko propesiya kadto kanimo, tanganing sa paagi ka inspirasyon ka manga propesiyang an, mapakusug ika sa pakikipaglaban saigo laban sa karatan, 19 na agko pagtobod sagkud malinig na konsensiya. Holi ta diri nira inirungug so kandang konsensiya, agko nagkapira na pinnondo na sa pagtobod ki Cristo. 20 Darwa kanda amo si Himeneo sagkud Alejandro; na itinao ko na ki Satanasc tanganing tottoroan sira na diri magparaosip kontra sa Diyos.