2
Manga Katottoroan Manungud sa Pagsamba
1 Ona sa ngamin, ipinapakiosip ko na paaboton ninyo sa Diyos a manga pag-ayat, manga pangadyi, pakimaerak para sa iba, sagkud manga pasasalamat para sa ngamin na tawo. 2 Amo man a gibowon ninyo para sa manga hadi sagkud sa ngamin na agko katungran, tanganing mamoway kitang matoninung, iginagalang, sagkud agko kabanalan. 3 Ta a pagpapangadyi para sa iba maraay sagkud nakapaoogma sa Diyos na kanatung Paraligtas, 4 na nagmamawut na a ngamin na tawo maligtas sagkud makaintindi ka kamatoranan. 5 Ta usad sana a Diyos sagkud usad sana a tagapag-ultan na makababalik ka relasyon ka Diyos sagkud ka tawo, si Cristo Jesus na nagpakanitawo, 6 na itinao so kanyang boway bilang balokat ko manga kasalan ka ngamin. Sa tamang panawon nagraan si Cristo bilang patonay ka Diyos na gosto niyang iligtas a ngamin na tawo. 7 Amo adi a rason kaya pinili ako ka Diyos bilang apostol sagkud tagapangadal ka Maraay na Bareta, sagkud paratottoro ka kamatoranan sagkud pagtobod ki Cristo sa manga bukung Judio. A sinasabi ko matood diri ako nagbobotig.
8 Minamawut kong sa kada logar na kaninyong pinagtitiponan sa pagsamba sa Kagorangnan, a manga lalaking maimbod sa oosipun ka Diyos, mangadyi na nakataas a kamut sagkud uda raut sa buut o kasogot.
9 Buut ko man na a manga babaying paratobod magin simple sagkud disinte sa pagbabado sagkud pag-oosay ka book, diri nasosobraan sa alaas o mamalun na bado, 10 kindi sa paggibo ka karayan, ta amo yan angay na gibowon ka babaying nagsasabing iya parasamba sa Diyos.
11 A manga babayi kaipowan na makatuud na diri magpararibok sa panawon ka pag-aadal sagkud pomasakup sa bilog na kapakombabaan sa nagtotottoro. 12 Diri ko tinotogotan na a manga babayi magtottoro o mamoon sa manga lalaki, kindi kaipowan sirang mag-irungug na matoninung. 13 Ta si Adan a onang linalang, bago si Eba. 14 Sagkud bukung si Adan so nadaya, kindi si Eba a nadaya sagkud diri nagkoyog sa kamandaan ko Diyos. 15 Alagad a manga babayi makaliligtas sa paagi ka pangingigina sagkud kin sira magpadagos sa pagtobod sa Diyos, sa pagkabuut sa kapwa, sa kabanalan sagkud sa kabinian.