3
Manga Tagapamoon sa manga Kangoran
1 Amo adi a matood na kasabiyan: A siisay man na lalaking nagmamawut sa kanyang poso na magin tagapamoon sa simbaan, nagmamawut sa kagalanggalang na trabawo. 2 Kaya kaipowan na a tagapamoon uda katatsaran, usad sana agom, tattaong magdesisyon kin ono a tama, iginagalang, bokas a baluy para sa ibang tawo, sagkud tattaong magtottoro, 3 bukung paraborat, bukung paribok kindi mabuut, bukung parapakikasogot, sagkud bukung pakikwarta. 4 Kaipowan tattaong omasikaso ka sadiri niyang pamilya sagkud mabayad na a kanyang manga igin nagkokoyog kanya na agko paggalang. 5 Ta kin diri iya tattaong omasikaso ka sadiri niyang pamilya, paono niya aasikasowon a simbaan ka Diyos? 6 Kaipowan buku iyang bagowan sa pagtobod, tanganing diri iya magkaagko poso na pono sa kapalangkawan, tanganing diri iya maosgaran ka Diyos arug ni Satanas. 7 Kaipowan iyang igalang magin ka manga tawo na uda pa sa pagtobod, tanganing uda sira masabing maraut kontra kanya, sagkud tanganing diri iya maolog sa paun ka diyablo.a
8 Kinakaipowan na a tagasirbi sa simbaan, angay na igalang, agko iya usad na oosipun, bukung paraboborat, sagkud bukung pakikwarta. 9 Kaipowan agko masarig na paninindugan sa misteryo ka kanatung pagtobod na agko malinig na poso. 10 Kaipowan mo ngona sirang porbaran, sagkud pangala kin mapamatoranan mo na uda sira salang gibo pabayai na sirang magsirbi.
11 Kapareyo man kan, kaipowan na a agom niya maraay a ogali. Bukung parangatongato, kindi mabuut sagkud mapagkakatiwalaan sa ngamin na bagay.
12 A tagapagsirbi sa simbaan, kaipowan usad sana agom sagkud tattaong omasikaso ka manga igin sagkud pamilya niya.
13 So manga nagsisirbi sa maraay, makakokoko sa maraay na repotasyon sagkud nagdadakulu a kasigoradowan ka kandang pagtobod ki Cristo Jesus.
14 Grabi a pagmawut ko na makaiyan kaninyo tolos, alagad sinosorat ko a manga bagay na adi tanganing 15 kin maori ako isi ninyo, kin paono kamo kaipowan mamoway bilang usad na miyembro ka pamilya ka Diyos, na amo a simbaan ka boway na Diyos, a arigi sagkud pondasyon ka kamatoranan. 16 Sa loyo ka ngamin na kaongaan, dakulu a misteryo ka kanatung banal na pagtobod:
Nabayad iya ko iyab nagpakanitawo
sagkud pinamatoranan ko Espirito ka Diyos
nabayad iya ko manga anghel,
ipinangadal sa manga bukung Judio,
tinobod sa bilog na kinaban
sagkud dinara sa kamorawayan.