4
Manga Katottoroan ki Timoteo
1 A Espirito Santo malinaw na sinnasabi na sa oring panawona agko nagkapira na babayaan a kandang pagtobod sagkud somosonod sa manga madadayang espirito sagkud manga bagay na itinotottoro ka demonyo, 2 a manga katottoroan na an galin sa manga botigun, na kinnusa na so konsensiya nira. 3 Pinagbawalan nira a tawo na mag-agom sagkud pinagbutan na diri magkaun sa manga nagkapirang kakaunun na ginibo ka Diyos tanganing akoon na agko pagpapasalamat ka siisay man na nagtotobod sagkud ka siisay man na nakakaisi ka kamatoranan. 4 Ta a ngamin na pagkaun na ginibo ka Diyos maraay, sagkud diri kaipowan na abuan kin adi inako na agko pagpapasalamat, 5 ta an lininigb na ka oosipun ka na Diyos sagkud sa pagpapangadyi.
6 Kin itinotottoro mo a manga bagay na adi sa manga kangoran, ika magigin maraay na serbidor ni Cristo Jesus. Sagkud sa pagtotottoro mo kanda mapakukusug man ika sa paagi ka kamatoranan ka pagtobod ta sagkud sa manga matood na katottoroan na sinosonod mo. 7 Diri mo pagsayangan sa panawon a manga istoryang uda kamutangan, kindi magtuud ika sa kabanalan. 8 Ta a pagpapakusug ka awak agko gatikot na pakinabang, alagad mas agko pakinabang sa ngamin na bagay a pagtutuud sa kabanalan, ta an agko panoga buku sana sa boway ta ngowan, kindi magin sa omaaboton. 9 Amo adi a matood na kasabiyan na kaipowan akoon sagkud tobodon ka ngamin na tawo.
10 Holi kadi kita nagtatrabawo sagkud nag-iingoa sa pagtotottoro sa manga tawo ka kamatoranan, ta naglalaom kita sa boway na Diyos, na amo a Paraligtas ka ngamin na tawo, sagkud orog na sa manga nagtotobod.
11 Itottoro sagkud imanda mo a manga bagay na adi. 12 Diri mo pagtogotan a siisay man na pag-intrimisun ika holi ta ika hobin pa, imbes magin arugan logod ika ka manga paratobod sa pagngangabil, sa pag-oogali, sa pagkabuut, sa pagtobod sagkud sa kalinigan ka poso. 13 Anggan na diri pa ako nag-aabot siton tawan mo sa panawon a pagbasa ka oosipun ka Diyos sa atobangan ka manga tawo, sagkud sa pangangadal sagkud pagtottoro. 14 Diri mo pagpabayaan na diri mo magamit so itinao kanimong kakayaan ko Espirito Santo, sigon ko propesiya na sinabi kanimo ko iruta so manga kamutc ko manga namomoon sa manga kangoran.
15 Gibowon mo a manga bagay na adi, sagkud itao mo a bilog mong boway kanda, tanganing mabayad ka kada usad a kanimong pagpapadagos sa pagtobod. 16 Pagmaanan mo a kanimong pamomoway sagkud a manga bagay na itinotottoro mo. Ipadagos mo a paggibo kadi, tanganing maligtas ika sagkud a manga nag-iirungug kanimo.