5
Responsabilidad sa Kapwa
1 Diri mo pag-ungtan a nakagogorang kanimong lalaki, kindi kaosipun mo iya bilang kag-igin. A manga hobin na lalaki itrato mong ngod, 2 a nakagogorang na babayi bilang ina, sagkud a hobin na babayi bilang ngod na agko bilog na paggalang.
3 Kaipowan na igalang ka kangoran a manga babaying balo na talagang nangangaipo sa paagi ka pag-aataman kanda. 4 Alagad kin a babaying balo agko manga igin o makoapo kaipowan ngona nirang ipamoway a kandang pagtobod sa paagi ka pag-aataman ka sadiri nirang pamilya, tanganing makabalus sira sa kandang manga kag-igin sagkud manga pakoapoon, ta amo adi a nakapagpapaogma sa Diyos. 5 A matood na babaying balo amo a nagsosolosolo na sana sa boway. A Diyos amo na sana niya linalaoman, kaya padagos iyang nangangadyi alduw gab'i sagkud innaayat sa tabang sa Diyos. 6 Alagad a babaying balo na namomoway na sobra ka sadiring kagostowan ka awak, maibibilang na guraan dawa boway iya. 7 Ipagibo mo sa manga kangoran a katottoroan na adi, tanganing diri sira matatsaran. 8 A siisay man na diri omasikaso ka manga erensiya niya, orog na a sadiri niyang pamilya, tinnalikokod na sa pagtobod sagkud mas maraut pa kisa sadto uda pagtobod.
9 A manga balong kaipowan na iiba sa listaan ka manga tatabangan amo so diri bomababa sa saysenta edad, sagkud nagin maimbod sa kanyang agom. 10 Kaipowan bistado sa paggibo sa karayan, maraay so pagpadakulu ko kanyang manga igin, bokas a baluy para sa ibang tawo, nagsirbi na agko kapakombabaan ko manga kangoran sa Kagorangnan, tinnabang sa manga nangangaipo, sagkud itinao a sadiri sa paggibo sa karayan.
11 Diri mo ipag-iba sa listaan a manga hobin pang balo, ta kin mas komusug a kamawutan ka kandang laman, babayaan nira a pagsirbi ki Cristo sagkud migpaagom otro. 12 Holi kan oosgaran sira ka Diyos ta diri nira kinoyog so ona nirang panoga ki Cristo. 13 Pwera pa kan, magigin ogakun sira sagkud migparapamaluybaluy. A maraut pa kan magigin parapakilabut sira sa iba sagkud parangatongato. 14 Kaya inaatolan ko a manga hobin na babaying balo na magpaagom otro, magkaigin, sagkud asikasowon a sadiring pamilya tanganing diri matawan sa oportonidad na masabiyan kita sa maraut ka kanatung kasogot. 15 Sinasabi ko adi ta agko nagkapirang babaying balo na tinnalikokod na sa pagtobod sagkud sinnonod ki Satanas. 16 Kin a usad na babaying paratobod agko kapamilyang babaying balo, kaipowan na asikasowon niya yan sagkud diri na ilaom pa sa simbaan tanganing amo na man matabangan so manga balong talagang nangangaipo.
17 Kaipowan na igalang sagkud tawan sa tamang bayad a manga namomoon sa simbaan, orog na a nagsesermon sagkud nagtotottoro. 18 Ta a Kasoratan sinnasabing, ?Diri mo pagbugkusan a nganga ka damolag mantang iya ipinaggigiuk,a? sagkud, ?A trabador kinakaipowan na bayaran.b? 19 Diri mo pag-akoon a sawut kontra sa usad na namomoon kin uda darwa o tolong testigo.c 20 Pagsabiyan mo sa atobangan ka ngamin a siisay man na nagsisirbi sa simbaan na abung pomondo sa paggibo sa karatan tanganing makatakot a iba. 21 Maigpit ko ikang minamandaan sa atobangan ka Diyos sagkud ni Cristo Jesus pati ka manga banal na anghel, na gibowon a manga katottoroan na adi na uda kinakampiyan o sinosorog. 22 Diri ika magmadali sa pagruta ka kamut o sa pagtao sa bendisyon para ka mimmoon sa simbaan, tanganing diri ika madamay sa kasalan ka iba. Kaya magmaan ika sa manga ginigibo mo tanganing makarayo ika sa ngamin na maraut.
23 Buku sanang pirming tobig a inomon mo, ominom man ika sa gatikot na alak sa ikararaay ka boros mo sagkud iba mo pang manga kamatian.
24 Rumrumun ninyo na agko nagkapirang tawo na naboboway sa kasalan, sagkud isi ka ngamin na oosgaran sira. Alagad agko nagkapira na a kasalan diri tolos naaayag sagkud ori na kin maayag. 25 Pareyo man an ka maraay na gibo madaling mamangno; alagad kin diri man an mamangno tolos, diri man adi maiilum anggan pa man.