3
Ipangadyi ninyo Kami
1 Kaya ngowan, manga ngod, ipangadyi ninyo kami tanganing a oosipun ka Kagorangnan maispid na magluyap sagkud mamuyang akoon sa iba pang manga logar, arug ka ginigibo ninyo. 2 Ipangadyi man ninyo na iligtas kami ka Diyos sa manga mararaut sagkud makasalan na tawo, ta bukung ngamin na tawo naniniwala sa itinotottoro namu.
3 Alagad maimbod a Kagorangnan, tatawan niya kamo sa kusug sagkud mamaanan niya kamo kontra sa Diyablo. 4 Holi sa Kagorangnan, makusug a pagtobod namu na ginigibo sagkud padagos ninyong gigibowon a kanamung manga togon.
5 Antabayan logod kamo ka Kagorangnan tanganing mabayad ninyo a pagkabuut ka Diyos sagkud kakusugan na itinao ni Cristo.
Patanid kontra sa manga Ogakun
6 Kaya ngowan iminamanda namu kaninyo, manga ngod, sa ngaran ka kanatung Kagorangnan na si Jesu Cristo, na rayoan a siisay na ngod na ogakun sagkud diri nagsosonod sa manga itinottoro namu kanda. 7 Ta isi man ninyo kin paono kami kaipowan na arugun, holi ta diri kami nagin ogakun ko isiton pa kami inyo. 8 Diri kami innako sa pagkaun kiisay man na diri namu binayaran, kindi nagtrabawo kami alduw gab'i tanganing diri kami magin pagubat kiisay man kaninyo. 9 Ginibo namu adi, buku sa uda kami poder na omayat ka tabang ninyo, kindi tanganing tawan kamo sa arugan na kaipowan ninyong arugun. 10 Ko kaiba pa kami ninyo, a togon namu kaninyo arug kadi: ?A siisay man na abung magtrabawo, diri pagpakaunun.?
11 Sinabi namu adi ta narungug namu na a iba kaninyo manga ogakun, abung magtrabawo, sagkud uda ginibo kindi makialam sa boway ka iba. 12 Kaya sa ngaran ka Kagorangnan na si Jesu Cristo, maigpit namung iminamanda sa manga tawong adi na magtrabawo para sa ikaboboway nira sagkud diri makialam sa boway ka iba. 13 Manga ngod, diri kamo mapagal sa paggibo sa karayan.
14 Kin agko abung somonod ka manga sinabi namu sa sorat na adi, tandaan ninyo iya sagkud rayoan tanganing mapasupug iya. 15 Alagad diri ninyo iya ibilang na kasogot, kindi parumrumun iya bilang usad na ngod sa pagtobod.
Paisi sagkud Bendisyon
16 Logod a Kagorangnan na pinaggagalinan ka katoninungan amo a magtao kaninyo sa katoninungan sa ngamin na panawon sagkud sa ngamin na paagi. Mapakaninyo logod ngamin a Kagorangnan.
17 Akong si Pablo a nagsorat ka manga pangongomostang adi, amo adi a tanda ka ngamin kong sorat na nagpapamatood na kanaku talaga naggalin a sorat. Arug ako kadi kin magsorat.
18 Pagbendisyonan logod kamo ngamin ka kanatung Kagorangnan na si Jesu Cristo.