2
A Pagbalik ka Kagorangnan
1 Ngowan, manungud sa pagbalik ka kanatung Kagorangnan na si Jesu Cristo sagkud a pakikipagtipon ta kanya, ipinakikiosip namu kaninyo, manga ngod, 2 na diri kamo mabigla o maporisaw holi ka manga bareta na nagsasabing nag-abot na a Kagorangnan. Diri kamo magtobod dawa sabiyun nirang adi sinabi ka Espirito kanda, o nabaretaan nira, o nabasa nira sa usad na sorat na galin kanamu. 3 Diri kamo magpadaya sa kiisay man sa onoman na paagi. Holi ta a Alduw ka pagbalik ka Kagorangnan diri omaabot anggan na diri pa pinnopoon a oring pagrerebelde sa Diyos, sagkud diri pa innaabot a tawong maraut na itinagama na sa impiyerno. 4 Kakalabanun niya a ngamin na sinasamba sagkud dinidiyos ka tawo, sagkud itataas a sadiri sa ngamin na manga adi. Omuula iya sa luug ka templo ka Diyos sagkud ibubutang a sadiri bilang Diyos.
5 Diri ninyo narurumruman na sinabi ko na a manga bagay na adi ko kaiba pa ako ninyo? 6 Kaya isi ninyo kin ono a pinnupugul ngowan ka tawong maraut. Alagad sa tamang panawon migpabayad iya. 7 Ta ngowan pa sana pailum ng nagtatrabawo a karatan ka tawong adi, sagkud padagos na ilum anggan na diri naaalin a pinnupugul ka kanyang pagpapabayad. 8 Pangala a tawong maraut maayag sagkud guguranun iya ka Kagorangnan na si Jesus, sa paagi ka kanyang inangus sagkud rarautun ka kanyang malangsolang liwanag. 9 Migpabayad ading maraut na tawo na dara a kapangyariyan ni Satanas. Gomigibo iya sa ngamin na klase sa manga makadadayang manga tanda, milagro sagkud manga ngangalasan. 10 Gagamitun niya a ngamin na klase sa pandadaya sa manga tawong mapakararaut. Mapakararaut sira holi ta diri nira nabutan a kamatoranan na lomiligtas kanda. 11 Holi kadi, pababayaan na sana sira ka Diyos sa kandang grabing pagkadaya tanganing maniwala sira sa kabotigan, 12 tanganing mapadosaan a ngamin na nagpakamuya sa karatan imbes na maniwala sa kamatoranan.
Pinili kamo tanganing Maligtas
13 Tama sanang magpasalamat kami sa Diyos holi kaninyo, manga ngod na nabubutan ka Kagorangnan, ta pinili na kamo ka Diyos sa kapinonan na maligtas sa paagi ka Espiritong nagpapabanal kaninyo, sagkud sa paagi ka pagtobod ninyo sa kamatoranan. 14 Binaoy kamo ka Diyos sa paagi ka Maraay na Bareta na itinottoro namu kaninyo, tanganing makairas kamo ka kamorawayan ka kanatung Kagorangnan na si Jesu Cristo. 15 Kaya ngani, manga ngod, magpakakusug kamo sagkud pangaptan ninyo a manga itinottoro namu kaninyo magin sa oosipun o sa sorat.
16-17 Rangawun man logod kamo ka kanatung Kagorangnan na si Jesu Cristo sagkud ka kanatung Diyos Ama na nabuut kanatu sagkud nagtao kanatu sa uda kasagkuran na karangaan sagkud matibay na paglaom holi ka karayan sa buut niya. Sagkud logod tawan man kamo sa kakusugan sa buut tanganing maipaayag sagkud maisagibo ninyo a ngamin na maraay.