Ikarwang Sorat ni Pablo sa manga
TagaTesalonica
1
1-2 Para sa manga kangoran sadto Tesalonica na pinili ka kanatung Diyos Ama sagkud Kagorangnan na si Jesu Cristo:
Mapakaninyo logod a bendisyon sagkud katoninungan galin sa Diyos Ama saka ka Kagorangnan na si Jesu Cristo.
Akong si Pablo a nagsorat kadi kaiba si Silas sagkud Timoteo, nangongomosta kaninyo.
Pasasalamat sagkud Pangadyi
3 Pirmi kaming nagpapasalamat sa Diyos holi kaninyo, manga ngod, sagkud tama sanang gibowon namu adi, ta a pagtobod ninyo ki Cristo mas orog na kinnukusug, sagkud a pagkabuut ninyo sa kada usad mas orog na nagrorogang. 4 Kaya ngani, ipinag-oorgolyo namu kamo sa ngamin na simbaan ka Diyos holi sa kaninyong pakatius sagkud pagtobod, sa loyo ka ngamin na namamatian ninyong kadipisilan sagkud pagpirsigir.
5 A manga adi kamatoran sana na patas a pag-osgar ka Diyos, holi ka manga namamatian ninyong kadipisilan para sa kahadian niya na kamo kaakoako na mapabilang sadi. 6 Gigibowon ka Diyos a tama, sagkud padidipisilan niya a manga nagpapadipisil kaninyo. 7 Sagkud kamong manga nagtitius tatawan niya sa kapaingaloan kaiba namu. Mingyari yan sa pagbalik ka Kagorangnan na si Jesus galin sa langit kaiba a makapangyariyan niyang manga anghel. 8 Omaabot iya sa bitnga ka nagluludab na kalayo, sagkud padodosaan niya a manga diri nagbibisto sa Diyos sagkud abung magkoyog ka Maraay na Bareta manungud sa kanatung Kagorangnan na si Jesus. 9 Padodosaan sira sa uda kasagkuran na pagsakit sagkud isosoway sa presensiya ka na Kagorangnan, sagkud diri na nira mababayad pa a kamorawayan ka kapangyariyan niya. 10 Mingyari adi sa alduw na iya omabot, sagkud oomawun iya ka manga pinili niya, sagkud tatawan sa onra ka manga nagtotobod kanya. Kaiba kamo sadto, holi ta nagtobod kamo sa itinottoro namu kaninyo.
11 Amo adi a rason kin ngata ta pirmi namu kamong ipinapangadyi. Pangadyi namu na logod gibowon kamong angay ka Diyos sa pagkabaoy kaninyo. Sagkud ipinapangadyi man namu na sa tabang ka kanyang kapangyariyan, magibo ninyo a ngamin na mararaay na bagay na gosto ninyong gibowon holi sa kaninyong pagtobod, 12 tanganing matawan ninyo sa onra a ngaran ka kanatung Kagorangnan na si Jesus sagkud kamo man matawan niya sa onra oyon sa karayan na buut ka kanatung Diyos sagkud ka Kagorangnan na si Jesu Cristo.