14
Si Jesus sadto Baluy ko Pariseo
1 Usad na Alduw ka Pagpaingalo, inimbitaran si Jesus na magkaun sadto baluy ko usad na namomoon sa manga Pariseo sagkud binabantayan nira saigo so iwag-iwag niya. 2 Nagrapo ki Jesus so usad na lalaking namamaga. 3 Kaya inonga niya so manga Pariseo sagkud so manga paratottoro ka Layi, “Oyon raw sa Layi a magpaomay sa Alduw ka Pagpapaingalo o diri?”
4 Alagad diri sira nagpolaw, kaya kinoko ni Jesus so lalaking agko ilang, pinaomayan sagkud pinaoli. 5 Pangala, sinabi ni Jesus kanda, “Kin kamo agko igin o bakang naolog sadto bobon, diri raw ninyo aawasun ta Alduw ka Pagpapaingalo?” 6 Diri sira nakasimbag sa ongang adto.
A Maraay na Pakikiiba sagkud Pagpapakombaba
7 Namangno ni Jesus na so pinipili ko manga pinag-imbitaran amo so manga ulaan na para sadto manga mayor na bisita, kaya sinabi niya a parabolang adi, 8 “Kin iniimbitaran ika sa usad na kinasalan, diri mo pagpiliun a pinakamaraay na ulaan, ta baka agko inimbitaran na mas bistado kisa kanimo, 9 kin arug kan, a nag-imbitar kaninyong darwa, migrapo sagkud sasabiyan ika, ‘Pwede raw na itao mo a ulaan na an sa tawong adi?’ Mapapasupug ika sagkud maiiyan ika sadto pinakaiyan na ulaan. 10 Kaya kin iniimbitaran ika, sadto ika mag-ula pinakaiyan na ulaan, ta pagrani ko nag-imbitar kanimo, sasabiyun niya, ‘Amigo, sadi ika kabisera.’ Sa paagi kan natawan ika sa dakulung importansya sa atobangan ka ngamin na manga bisita. 11 Ta a nagmamataas, ibababa, sagkud a nagpapakombaba, itataas.”
12 Sinabi man ni Jesus sa nag-imbitar kanya, “Kin nag-aanda ika, buku mo pag-imbitaran a amigo mo, manga ngod o manga sadiring tawo o manga mayayaman na pag-abayan ta iimbitaran man ika nira tanganing makabalus kanimo. 13 Kaya, kin ika nag-aanda sa usad na dakulung okasyon, a manga parapakilimos, manga sikaw, manga pilay sagkud manga bota amo imbitaran mo. 14 Diri sira makababalus kanimo, kaya magigin paladan ika. Babalusan ika ka Diyos sa pagkaboway otro ka manga banal.”
A Parabola ka Dakulung Andaan
(Mt. 22:1-10)
15 Narungug adto ko usad niyang karungan sa pagkaun, kaya sinabi niya ki Jesus, “Paladan a nakaula sa lamesa ka kahadian ka Diyos.”
16 Sinnimbag si Jesus, “Agko usad na lalaking nag-anda sa dakulung andaan, sagkud kadakul niyang inimbitaran. 17 Ko omabot so oras na nakaanda na, minandan niya so manga mamandaan niya sagkud pinasabiyan so manga inimbitaran, ‘Mayang na kamo ta anda na a ngamin.’
18 Alagad naggibo sa rason so kada inimbitaran. So sabi ko ona, ‘Nakabakal ako sa oma, kaipowan kong iyanan, kamo na sana a balang magpasenya kanaku.’
19 Sinabi man ko usad, ‘Nakabakal ako sa limang pades na baka, sagkud kaipowan kong pawran tanganing porbaran, kamo na sana baalang magpasensya kanaku.’
20 So usad man sinnabi, ‘Bago kaming kasalun kaya diri ako makaiiyan.’
21 Nagpaoli so mamandaan sagkud ibinareta adto sa amo niya. Naungut adi, sagkud sinabiyan so mamandaan, ‘Lomowas ika, sagkud magmadaling omiyan sa manga aagyan sagkud sasadit na raran ka syodad sagkud iiba mo sadi a manga para pakilimos, manga sikaw, manga bota, sagkud manga pilay.’
22 Pag-oli ko mamandaan, sinabi niya sa amo niya, ‘Nagibo ko na po so iminanda mo, alagad dakul pa a manga ulaan.’ 23 Kaya sinabiyan ko amo so mamandaan, ‘Lomowas ika sa manga tinampo sagkud manga raran, sagkud piritun mong omiyan sadi a manga tawo, tanganing mapono ading baluy ko. 24 Sinasabiyan ko kamo, ni usad man sadto onang manga inimbitaran diri basang makananamit kading inanda ko.’ ”
A Kaalagaan ka Pagigin Disipolo
(Mt.10:37-38)
25 Nag-iba ki Jesus so malakadakul na tawo. Nag-atobang iya kanda sagkud sinabi niya, 26 “Diri pweding magin disipolo ko a siisay man na nabubuut sa kanyang ama sagkud ina, agom sagkud manga igin, manga ngod sagkud dawa sadiri niyang boway na orog pa kanaku. 27 A siisay man na diri magpas'an ka sadiring kros sagkud somonod kanaku diri pweding magin disipolo ko.
28 Kin a usad kaninyo nagpaplano na magtogrok sa tore, kaipowan na mag-ula ngona iya sagkud kwentawun a gagastoson, tanganing maisiyan kin agko iya tamang kantidad na gagastoson anggan na matapos. 29 Kin maipamutang na a pondasyon alagad diri man maipatapos, pigtoyatoyaun iya ka ngamin na makababayad kan, 30 sagkud sasabiyun nira, ‘Nagpoon ng magtogrok a tawong adi alagad diri man napatapos.’
31 Siisay na hadi a makilalaban sa kapareyong hadi a diri ngona mig-ula tanganing pag-adalan sa maraay kin a diyes mil niyang manga soldados pwedeng ilaban sa bente mil na soldados? 32 Kin diri niya kaya, arayo pa a kasogot migmanda na iya sa manga taowan niya tanganing makipagkasondo. 33 Arug man kan, diri pwedeng magin disipolo ko a siisay man, kin diri niya babayaan a ngamin sa boway niya.
A manga Disipolo ni Jesus Ipinareyo sa Asin
(Mt. 5:13; Mk. 9:50)