15
Parabola ko Nauudang Karnero
(Mt. 18:12-14)
1 Pangala nagrapo ki Jesus so manga parasingil sa bowis sagkud manga binabaoy ka manga Judio na parakasala tanganing mag-irungug kanya. 2 Alagad so manga Pariseo sagkud manga paratottoro ng Layi, nagparangorobngorob, “A lalaking adi nakikiiba sa manga parakasala sagkud nagkakaun pa na kaibaan nira.”
3 Kaya inistoryan sira ni Jesus sa usad na parabola, 4 “Ipamutang ta na usad kaninyo agko sanggatos na karnero sagkud nauda so usad kadto, diri raw niya bayaan so nobenta e nowebeng karnero sadto pasabsaban tanganing anapun so usad na nauuda anggan sa matorakan adi? 5 Sagkud kin matorakan na niya, maogma niya ading papas'anun. 6 Pag-abot niya sa baluy, babaoyon niya so manga amigo niya sagkud manga kaabay sa baluy sagkud sasabiyan na, ‘Makiogma kamo kanaku, ta so nauudang karnero natorakan ko na.’ 7 Kaya sinasabiyan ko man kamo: Orog pa kan a mamamatian na kaogmaan sadto langit ta agko usad na makasalan na nagsulsul, kisa nobenta e nowebeng maraay na diri kinakaipowang magsulsul.”
A Parabola ko nauudang Sinsilyo
8 “O kaya a babayi na agko sampolong sintabong sinsilyo,a sagkud nauuda so usad, ono gigibowon niya? Bukung sosoloan niya a soloan, lilimpiyaan niya so baluy sagkud aanapun saigo, anggan na matorakan niya adi? 9 Sagkud kin natorakan na adi, babaoyon niya so manga amigo sagkud pag-abayan, sagkud sasabiyun na, ‘Makiogma kamo kanaku, ta natorakan ko na so nauuda kong sinsilyo.’ 10 Sinasabi ko kaninyo, ‘Nag-oogma a manga anghel ka Diyos holi ta agko usad na tawong makasalan na nagsulsul.’ ”
So Parabola ko nauudang Igin
11 Nagpadagos si Jesus, “Agko usad na tawo na agko darwang igin na lalaki. 12 So kaoriyan sinnabi sadto kag-igin, ‘Ama, itao mo na kanaku a mamanawun ko sa pagsorosadiri mo.’ Kaya binanga ko ama sa darwang parte so kanyang pagsorosadiri.
13 Pagkaagi sa nagkapirang alduw, ipinabakal ko kaoriyan so minana niya, sagkud napaiyan sa arayong logar daradara so ngamin niyang kayamanan sagkud sadto linostay niya sa salang paagi. 14 Ko maobos na so ngamin niyang kayamanan, nagkaagko grabing tag-alup sa ngamin na logar na adto, sagkud pinnoon iyang magtius. 15 Kaya nagpatangran iya na mag-ataman sa baktin ko usad na tagasadto. 16 Sa grabing pag-alup niya, dawa so pagkaun sa baktin parang gosto na niyang kaunun, ta uda nagtatao kanya sa pagkaun.
17 Ko makapag-urup-urup na iya, nasabi niya, “Sobra sobra a kinakaun ka manga nagtatrabawo sadto baluy ka kanakung ama, alagad ako sadi migraan na sa pag-alup! 18 Mig-oli ako sadto kanakung ama sagkud sasabiyun ko kanya, ‘Ama, nagkasala ako sa Diyos sagkud kanimo. 19 Buku na akong angay na baoyon na igin mo; gibowon mo po akong usad sa manga oripun mo.’ ” 20 Kaya nagtindug iya sagkud napaoli sadto kanda.
Alagad arayo pa, natan'aw na iya ko kanyang ama sagkud napono adi sa pagkaerak kanya; kaya dinnalagan ading sinnabat kanya, ginakus iya sagkud inarukan.
21 Sinabi ko igin sadto kanyang ama, ‘Ama, nagkasala ako sa Diyos sagkud kanimo; buku na akong angay na baoyon na igin mo.’
22 Alagad binaoy ko kag-igin so manga oripun niya, ‘Dali! Darawun ninyo sadi so pinakamagayon na bado sagkud isopong kanya, sopongan ninyo iya sa singsing sagkud sandalyas. 23 Koon ninyo so pinakamatabang baka, sagkud bonoon, magkaun kita sagkud mag-ogma, 24 ta a igin kong adi na pag-una kong nagraan na, binnalik na boway. Nauda iya alagad natorakan otro.’ Kaya nagpoon sirang mag-ogma.
25 Pagkangumunngumun so gorang na igin paoli na galin sadto oma. Ko arani na iya sadto baluy nira, narungug niya so togtogan sagkud agko nagbabayli. 26 Kaya binaoy niya so usad ko oripun nira, sagkud inonga kin ono so nangyayari. 27 Sinnimbag so oripun, ‘So ngod mo nag-abot na sagkud so kag-igin mo pinabono so pinakamatabang baka, ta nakabalik iyang boway sagkud matoninung.’
28 So gorang na igin naungut sagkud abung lomuug sadto baluy nira. Kaya linnowas so kag-igin nira sagkud pinakiosipan na omiba kanya. 29 Alagad sinimbag niya so kag-igin niya, ‘Silngi man tabi! Sa luug sa dakul na taon nagin oripun mo ako, sagkud kono pa man diri ko binalgar so manga iminanda mo, alagad diri mo basang ako tinawan dawa sadit na kanding tanganing makipag-ogma ako ka manga amigo ko. 30 Alagad ko a igin mong adi na naglostay ko sintabo mo sa manga mararaut na babayi, ipinabono mo pa so pinakamatabang baka para kanya.’