10
Iminanda ni Jesus so Sitenta e Dos
1 Pagkatapos ko manga bagay na adto, nagpili pa a Kagorangnan sa sitenta e dosa , sagkud minandaan niya sira na maona kanya na tigdorodarwa sa kada banwaan sagkud logar na paiiyanan nira. 2 Sinabiyan niya sira, “A aaniyun malakadakul, alagad ka gagatikot ka paraani, kaya makimaerak kamo sadto kagsadiri ka aaniyun na magpadara sa manga paraani sadto aniyan niya. 3 Omagi na kamo! Minamandaan ko kamo arug sa manga karnero sa bitnga ka manga singgalong. 4 Diri kamo magdara sa pitaka, bag o sandalyas, sagkud diri kamo magpondo sa aagyan tanganing makiistorya sa kiisay man. 5 Pagluug ninyo sa kiisay man na baluy, sabiyun ngona ninyo, ‘Maghadi a katoninungan sa baluy na adi.’ 6 Kin a nakaistar san gosto sa katoninungan, mapapakanda a katoninungan; alagad kin diri, migbalik an kanimo. 7 Magpirmi kamo sa baluy na dinagosan ninyo; kaunun ninyo sagkud inomon a ono man na itao nira kaninyo ta a nagtatrabawo angay na tangranan. Diri kamo magparaborobalyo sa baluy.
8 Pagluug ninyo sa onoman na banwaan na nag-ako kaninyo, kaunun ninyo a ono man na ianda kaninyo. 9 Paomayan ninyo a manga agko ilang sadto, sagkud sabiyun kanda na, ‘Arani na a paghahadi kaninyo ka Diyos.’ 10 Alagad kin magluug kamo sa ono man na banwaan na diri kamo akoon, maggalin kamo, sagkud mantang nag-aagi kamo sa kalsada nira, sabiyun ninyo, 11 ‘Dawa a talbo sadi banwaan ninyo na rinnukut sadi tiil namu, ipinapagpag namu bilang patanid kaninyo. Alagad intindiyun ninyo adi: A paghahadi ka Diyos arani na.’ 12 Sinasabi ko kaninyo na sa Alduw ka Pag-osgar, mas magubat a padosa na itatao sa manga tawo ka banwaan na an kisa sa manga tagaSodoma!”
Patanid sa manga Banwaan na uda Pagtobod
(Mt. 11:20-24)
13 “Erak man kaninyo, manga tagaCorazin! Erak man kaninyo manga tagaBetsaida! Ta kin a manga milagrong ginibo san kaninyo, ginibo sa Tiro sagkud Sidon, uban na kintanang nagsopong sa sako sagkud nag-ula sa abo so manga tawo sadto bilang pagpapabayad na sira nagsusulsul. 14 Sa Alduw ka Pag-osgar mas magaan a padosa na itatao sa manga tagaTiro sagkud Sidon kisa kaninyo. 15 Sagkud kamong tagaCapernaum, gosto ninyong ilangkaw anggan langit? Diri, ioolog kamo sa impiyerno!
16 A siisay man na nag-iirungug kaninyo nag-iirungug man kanaku, sagkud a siisay man na nagsisikwal kaninyo sinisikwal man ako, sagkud a siisay man na nagsisikwal kanaku, sinisikwal man so nagmanda kanaku.”
Binnalik so Sitenta e Dos
17 Malang-ogmang binnalik so sitenta e dos sagkud nagsabi, “Kagorangnan, dawa manga demonyo nagsonod kanamu kin minamandaan namu sira sa ngaran mo!”
18 Sinnimbag si Jesus, “Nabayad ko so pagkaolog ni Satanas galin sa langit na bagana kitkilat. 19 Tinawan ko kamo sa kapangyariyan na tongtongan a manga sawa sagkud mantok sagkud sa pagdaug ka ngamin na kasogot, kaya diri kamo maoono. 20 Alagad, mamuya kamo bukung sa soko kaninyo a mararaut na espirito, kindi holi ta nasosorat a ngaran ninyo sadto langit.”
Namuya si Jesus
(Mt. 11:25-27; 13:16-17)
21 Kadtong oras man sanang adto, si Jesus napono sa kamuy'an sa paagi ko Espirito Santo sagkud sinabi niya, “Inoomaw ko ika Ama, Kagorangnan ka langit sagkud ka raga, nagpapasalamat ako kanimo ta inilum mo a bagay na adi sa manga madodonong sagkud ipinabayad mo sa manga tawong a poso arug sa manga igin. Opo, Ama, ta amo yan a namumuy'an mo.
22 Itinao kanaku ka kanakung Ama a ngamin na bagay. Uda nakabibisto sa Igin kindi a Ama, sagkud uda nakabibisto sa Ama kindi a Igin, sagkud a manga tawong gosto kong makabisto sa Ama.”
23 Pangala innatobang iya sadto manga disipolo niya sagkud sinabiyan sirang uda ibang nakarurungug, “Paladan kamo ta nabayad ninyo a nababayad ninyo ngowan! 24 Ta sinasabi ko kaninyo: Kadakul na manga propeta sagkud manga hadi na gostong makabayad ka nababayad ninyo alagad diri nira nabayad. Sagkud minawut nirang makarungug ko narungug ninyo alagad diri man sira nakarungug.”
A Maraay na Samaritano
25 Sa usad na okasyon agko usad na paratottoro sa Layi na nagrapo ki Jesus tangani iyang porbaran, “Maestro, ono kaipowan kong gibowon tanganing magkaagko ako boway na uda kasagkuran?” 26 Nagsimbag si Jesus, “Ono a nasosorat sa Layi? Ono a nababasa mo sadto?” 27 Nagsimbag iya, “Mabutan mo a Kagorangnan mong Diyos sa bilog mong poso, bilog mong kalag, bilog mong kusug, sagkud sa bilog mong isip, sagkud mabutan mo a kanimong kapwa arug ka pagkabuut mo sa sadiri mo.” 28 “Tama a simbag mo,” sabi ni Jesus. “Gibowon mo yan sagkud ika maboboway.”
29 Sa kagostowan ko paratottoro sa Layi na diri iya lomowas na makasusupug, inonga niya otro si Jesus, “Siisay man a kapwa ko?” 30 Sinnimbag si Jesus, “Agko usad na lalaking nag-aagi galin Jerusalem paiyan sa Jerico. Inukpan iya sa manga mataban, kinoko pati so bado niya, inaprusan sagkud apus guraan ng binayaan. 31 Naupud man na innagi sadto so usad na saserdote sagkud pagkabayad niya ko tawo na nakabatang, linnikaw sana iya sagkud nagpadagos na sa pag-agi. 32 Pareyo man ko saserdote, innagi man so usad na Levita,b ko mabayad niya so lalaki linnikaw man sana iya sagkud nagpadagos sa pag-agi. 33 Alagad so Samaritanoc na nag-agi sadto, rinnapo iya sagkud ko mabayad niya so lalaki, naerak iya saigo. 34 Rinapo niya adi, pangala inogasan niya so manga maaprus ko lalaki sa lana sagkud alak saka binugkusan. Pagkatapos ilinonad niya so lalaki sadto asno, dinara sa paarkilan na baluy sagkud inasikaso. 35 Kinaramragan, binnotbot iya sa darwang denaryo sagkud itinao sadto kagsadiri ko paarkilaan sagkud sinabing, ‘Asikasowon mo iya sagkud kin saomno pa a kakolangan kan babayaran ta ika pagbalik ko.’
36 Siisay sadto tolo so pag-una mo a nagpabayad sa pakikipagkapwa ko tawong inukpan ko manga mataban?” 37 So paratottoro nagsimbag kanya, “So usad na naerak kanya.” Sinabiyan iya ni Jesus, “Agi na sagkud gibowon mo man so ginibo niya.”
Sadto Baluy ni Marta sagkud ni Maria
38 Nagpadagos si Jesus sagkud so manga disipolo niya sa pag-agi, anggan sa nakaabot sira sa usad na baryo. Agko usad na babayi sadto na a ngaran Marta a nagpadagos ki Jesus sa kandang baluy. 39 Si Marta agko man ngod na a ngaran Maria. Nag-ula si Maria sa paniilan ka Kagorangnan sagkud nag-irungug ko manga pinagtotottoro niya. 40 Alagad si Marta malakasibot ko preparasyon na ginigibo niya. Kaya nagrapo iya ki Jesus sagkud nagsabi, “Kagorangnan, diri ika naeerak na pinababayaan sana ako ka ngod ko na solong nagpepreparar? Pakisabiyi man raw tabi iya na rugpan ako!”