11
Si Jesus Nagtottoro manungud sa Pagpapangadyi
(Mt. 6:9-13; 7:7-11)
1 Usad na alduw, nangangadyi si Jesus sa usad na logar. Pagkatapos niya, sinabiyan iya ko usad sa manga disipolo niya, “Kagorangnan, tottoroan mo po tabi kami na mangadyi, pareyo ko ginibo ni Juan sadto manga disipolo niya.” 2 Sinabi ni Jesus kanda, “Kin kamo mingngadyi, amo adi a sabiyun ninyo,
‘Ama, sambawun a ngaran mo.
Mag-abot na logod a kahadian mo;
3 tawan mo kami sa kakaunun sa oroalduw.
4 Patawarun mo kami sa kanamung manga kasalan,
arug ka pagpapatawad namu sa manga nagkasala kanamu.
Sagkud diri mo kami pagpabayaan na madaug sa sogot.’ ”
5 Sagkud sinabi pa nanggayud kanda, “Ipamutang ta na a usad kaninyo agko amigo, pagkatapos nag-iyan iya kaninyo na lawud na, sagkud nagsabi, ‘Amigo, tawan mo ngona ako sa tolong tinapay, 6 ta innabot kaya so usad kong amigo na nagbabaklay, uda ako ipapakaun kanya.’ 7 Sagkut arug kadi a isisimbag kanimo ka amigo mo sadto luug ka baluy, ‘Diri mo ako pagdistorbowon! Sarado na a pwertaan namu sagkud nakabatang na kami ka manga igin ko, diri na ako makababangon tanganing tawan ika ka kaipowan mo.’ 8 Sinasabi ko kaninyo, diri man iya bomangon para ko kandang pagigin mag-amigo, bombangon iya tanganing itao so inaayat ko amigo niya holi sa kapipirit.
9 Kaya sinasabi ko kaninyo: Omayat kamo sagkud kamo tatawan; mag-anap kamo sagkud kamo makatotorak; magtoktok kamo sagkud a pwertaan boboksan para kaninyo. 10 Ta a siisay man na nag-aayat, nag-aako; a siisay na nag-aanap, nakatotorak; sagkud a siisay man na nagtotoktok, a pwertaan binoboksan.
11 Kamong manga ama, tatawan raw ninyo sa sawa a manga igin ninyo kin nag-aayat sa isura? 12 Tatawan raw ninyo iya sa mantok kin iya nag-aayat sa itlog? 13 Kin kamo nganing manga maraut, tattaong magtao sa maraay na bagay sa kaninyong manga igin, a Ama pa raw na nasa langit! Itatao niya a Espirito Santo sa manga nag-aayat kanya!”
Si Jesus sagkud si Beelzebul
(Mt. 12:22-30; Mk. 3:20-27)
14 Nagpalayas si Jesus sa usad na demonyo na nagpangola sa usad na lalaki. Ko so demonyo maglowas, so lalaking ngola, nakangabil. So manga tawo nagngalas. 15 Alagad, agko nagkapira kanda na nagsabi, “Si Beelzebul na prinsipe ka manga demonyo a nagtao kanya sa kapangyariyan na magpalayas sa manga demonyo.” 16 Agko man iba na gosto iyang porbaran, kaya nag-ayat sira sa manga tanda galin sa langit.
17 Isi ni Jesus so iniisip nira kaya sinnabi iya kanda, “Ono man na kahadian na nababanga, bombagsak. Mararaut a manga pamilyang diri nagka-ooyon. 18 Kin si Satanas nababanga man, paono migpadagos a kanyang kahadian? Sinasabi ninyong nagpapalayas ako sa demonyo sa kapangyariyan ni Beelzebul. 19 Ngowan, kin nagpapalayas ako sa demonyo sa kapangyariyan ni Beelzebul, sa kiisay na kapangyariyan nagpapalayas a kaninyong manga parasonod? Sira na a nagpapabayad na sala kamo. 20 Alagad kin nagpapalayas ako ka manga demonyo sa kapangyariyan ka Diyos, napamamatoran kadi na nag-abot na a paghahadi ka Diyos kaninyo.
21 Kin a usad na makusug na lalaki na kompleto sa ngamin na armas, nagbabantay ka sadiri niyang baluy, a kanyang pagsorosadiri diri maoono. 22 Alagad kin agko usad na mas makusug kisa kanya a lomaban sagkud madaug iya kokoonon niya so ngamin na armas na linalaoman niya sagkud so pagsorosadiring inaguw kanya itatao sa iba.
23 A siisay na bukung sorog kanaku, kontra kanaku; sagkud a diri nagrurugup na magtipon kanaku, nagwawarak.”
A Pagbowelta ka Maraut na Espirito
(Mt. 12:43-45)
24 “Kin a maraut na espirito naglowas sa tawo, nag-iiyan iya sa marang logar sagkud nag-aanap sa mapaingaloan sagkud kin uda iya matorakan, sasabiyun niya sa kanyang sadiri, ‘Bombalik ako sadto baluy na pinaggalinan ko.’ 25 Pagbalik niya maaabotan niya na malinig sagkud malakaosay. 26 Kaya, lomolowas iya otro sagkud mig-iba pa iya sa pitong espirito na mas maraut kisa kanya, lomuluug sira sagkud omiistar sadto, kaya mas orog na romaraut so kamutangan ko tawong adto kisa dati.”
A Matood na Paladan
27 Mantang nagngangabil si Jesus, agko usad na babayi sadto kadaklan na nagsabi kanya sa makusug na boses, “Paladan a babayi na nangigin sagkud nagpasoso kanimo!”
28 Kindi sinnimbag iya, “Orog na paladan a manga nag-iirungug ka oosipun ka Diyos sagkud nagsosonod kadi!”
Inanapan si Jesus sa tanda galin sa Langit
(Mt. 12:38-42)
29 Mantang nagparadakul so manga tawo sa palibot ni Jesus, sinnabi iya, “Malangraut ka henerasyon na adi! Nag-aanap sira sa manga tanda galin sa langit, alagad uda tanda na ipababayad kanda pwera sa nangyari ki Jonas. 30 Kin paonong nagin tanda si Jonas sadto manga tagaNineve, pareyo man a Igin ka Tawo amo magigin tanda sa henerasyon na adi. 31 Sa Alduw ka Pag-osgar, tomitindug a Reyna ka Sheba kontra sa henerasyon na adi sagkud sira aatolan sa kapadosaan. Ta iya galin sa poro ka kinaban tanganing irunggun a kadonongan ni Solomon; kindi mas orog pa ki Solomon a isadi! 32 Sa Alduw ko Pag-osgar, tomitindug a manga tagaNineve kontra sa henerasyon na adi sagkud aatolan sa kapadosaan, ta nagsulsul sira ko mangadal si Jonas. Kindi ngowan mas orog pa ki Jonas a isadi!”
A Liwanag ka Awak
(Mt. 5:15; 6:22-23)
33 “Uda nagsosolo sa soloan tanganing ibutang sa logar na natatago o kaya ibutang sa irarum ka takaran. Imbes, ibinubutang adi sa tamang bubutangan, tanganing pagluug ka manga tawo mabayad a liwanag. 34 A mata mo amo a solo ka kanimong awak. Kin malinaw a mata mo, a bilog mong awak pono sa kaliwanggan; alagad kin lubug a mata mo, a bilog mong awak pono sa kangitngitan. 35 Magmaan ika, ta baka a liwanag na inuuna mong isan kanimo, kangitngitan palan. 36 Kaya, kin a bilog mong awak pono sa liwanag, sagkud uda parteng mangitngit, intero yan na maliliwanggan na arug sa nasisilawan sa maliwanag na solo.”
Tinuyaw ni Jesus so manga Pariseo sagkud so manga Paratottoro sa Layi
(Mt. 23:1-36; Mk. 12:38-40)
37 Pagkatapos magngabil ni Jesus, agko Pariseo na nag-imbitar kanya na magkaun sadto baluy nira, kaya nag-iyan iya sagkud nag-ula sadto atobangan ko lamesa. 38 Nagngalas so Pariseo ko mabayad niya na diri nanninuw sa kamut si Jesus, bago magkaun. 39 Kaya, sinabiyan iya ni Jesus, “Kamong manga Pariseo, inoogasan ninyo a lowas ka tasa sagkud pinggan ninyo, alagad a poso ninyo malakapono sa kaangapan sagkud karatan. 40 Manga patal! Bukung a Diyos na naggibo ka sa lowas, amo man a naggibo ka sa luug? 41 Alagad, itao ninyo sa manga pobre a nasa luug ka manga tasa sagkud manga pinggan ninyo sagkud a ngamin magiging malinig para kaninyo.
42 Erak man kaninyo manga Pariseo! Nagtatao kamo ka manga ikasampolong parte ka manga inani ninyo sa Diyos maski ka manga tinanum na panrekado, arug ka pamenta, anis sagkud iba pa, alagad pinababayaan ninyo a katanosan na pakikiiba sa kapwa sagkud a pagkabuut sa Diyos. Amo yan kaipowan ninyong gibowon alagad diri man ninyo pagpabayaan a iba. 43 Erak man kaninyo manga Pariseo! Ta nabubutan ninyo so maalagang ulaan sadto sinagoga sagkud omawun kamo sa manga sasaran.
44 Erak man kaninyo manga Pariseo! Ta bagana baga kamo manga pantiyong na uda tanda, kaya binabantayan ka manga tawo na diri nira isi.”
45 Usad sa manga paratottoro sa Layi nagsabi kanya, “Maestro, sa manga pinagngangabil mo pati kami iniinsolto mo.”
46 Kaya nagsimbag si Jesus, “Kamong manga paratottoro ka Layi, erak man kaninyo! Ta ipinapapas'an ninyo sa manga tawo a magugubat na bagay, alagad kamo dawa a gigis ninyo diri basang naiiwag tanganing tabangan sira. 47 Erak man kaninyo! Ta naggibo kamo sa pantiyong para sa manga propeta na ipinaguraan ko manga ginikanan ninyo. 48 Kaya kamo man sana a nagpamatood na oyon kamo sadto ginibo ko manga pinaggikanan ninyo, ta ginuraan nira so manga propeta sagkud kamo man so nagpagibo sa pantiyong nira. 49 Manungud kadi, sinabi ka Diyos sigon sa kadonongan niya, ‘Ipadadara ko kanda a manga propeta sagkud manga apostol; a iba guguranun nira sagkud a iba man pasasakitan.’ 50 Kaya a manga tawo sa panawon na adi amo sisingilun sa pagkagraan ko ngamin na propeta poon na lalangun a kinaban, 51 magpoon ki Abel anggan ki Zacarias na ginuraan sa pag-ultanan ko altara sagkud ko Templo. Amo, sinasabi ko kaninyo, padodosaan a henerasyon na adi ko ginibo nira.
52 “Erak man kaninyo manga paratottoro sa Layi! Ta kinoko ninyo sa mga tawo a ilyabi sa pagkaintindi ka kamatoranan. Abu na ngani ninyong somonod sa kamatoranan, inuulang pa ninyo a manga gostong somonod.”