9
Iminanda ni Jesus so Dose
(Mt. 10:5-15; Mk. 6:7-13)
1 Binaoy ni Jesus so Dose sagkud tinawan sira sa kakayaan sagkud kapangyariyan na magpagalin sa manga demonyo sagkud magpaomay sa manga agko ilang. 2 Kaya minandaan niya sira na ipangadal a paghahadi ka Diyos sagkud magpaomay sa manga agko ilang. 3 Sinabi niya kanda, “Diri kamo magbalon sa ono man ka kaninyong pagbaklay dawa sogkod, bag, pagkaun, sintabo o sanglian. 4 Makidagos kamo sa kiisay man na omako kaninyo, sagkud pomirmi kamo sadto anggan sa paggalin ninyo sa banwaan na an. 5 Kin diri kamo akoon, gomalin kamo san sagkud ipagpag ninyo a talbo san tiil ninyo bilang patanid kanda.”
6 Kaya naggalin so manga disipolo sagkud nag-iyan sa manga baryo, tanganing itottoro a Maraay na Bareta sagkud magpaomay sa agko manga ilang sa ngamin na logar.
Naribaraw so Isip ni Herodes
(Mt. 14:1-12; Mk. 6:14-29)
7 Nabaretaan ni Herodes na namomoon ko Galilea so ngamin na nangyayari. Naribaraw iya ta agko nagsasabing naboway otro si Juan na Parabunyag. 8 Agko man nagsasabing, “Nagpabayad si Elias” sagkud so iba man nagsasabing, “Naboway otro so usad sa manga propeta ko onang panawon.” 9 Kaya nagsabi si Herodes, “Pinapogotan ko na si Juan. Alagad siisay a tawong adi, na kadakul kong narurungug manungud kanya?” Kaya iningoa niya na mabayad si Jesus.
Pinakaun ni Jesus so Limang Ribo Katawo
(Mt. 14:13-21; Mk. 6:30-44; Jn. 6:1-14)
10 Ko magbalik na so manga apostol, sinabi nira ki Jesus so ngamin na ginibo nira. Pangala iniba niya sira sa usad na banwaan na binabaoy na Betsaida. 11 Alagad ko maisiyan adto ko manga tawo, sinnonod sira ki Jesus. Inako niya so manga tawo sagkud sinabi niya kanda so manungud sa paghahadi ka Diyos, sagkud pinaomayan man niya so manga agko ka'ilangan.
12 Ko sinnusulnud na so alduw rinnapo kanya so Dose sagkud nagsabi, “Isobol na po ninyo a manga tawo tanganing makaiyan na sira sa baryo sagkud sa palibot ka kabokidan tanganing omanap sa pagkaun sagkud madadagosan, ta nasa kaiwasan na logar po kita.”
13 Alagad sinabi ni Jesus kanda, “Tawan ninyo sira sa pagkaun.”
Sinnimbag sira, “Agko po kita sadi limang tinapay sagkud darwang isura sana, pwera kin magbakal kami sa kakaunun para sa ngamin na tawo.” 14 (Manga limang ribong lalaki a tawo sadto.)
Alagad sinabiyan ni Jesus so manga disipolo niya, “Paulaun ninyo sira sa tigsingkwenta kada gropo.” 15 Ginibo adto ko manga disipolo, sagkud so ngamin nag-ula. 16 Kinoko ni Jesus so limang tinapay saka so darwang isura, tinnangad iya sa langit sagkud nagpasalamat, sagkud pinagbaakbaak niya adto. Pangala itinao niya sadto manga disipolo tanganing ipanao sadto manga tawo. 17 Nagkaun so ngamin sagkud nabosog, pangala tinipon ko manga disipolo so ngamin na natuda sagkud nakapono pa sira sa doseng kararaw.
A Patotoo ni Pedro manungud ki Jesus
(Mt. 16:13-19; Mk. 8:27-29)
18 Usad na alduw, mantang solong nangangadyi si Jesus, rinnapo kanya so manga disipolo niya. Inonga niya sira, “Siisay ako sa pag-una ka manga tawo?”
19 Nagsimbag sira, “A iba nagsasabing ika si Juan na Parabunyag; a iba man po ika si Elias; sagkud so iba nagsasabing usad ika sa manga propeta kadto na naboway otro.”
20 Inonga sira ni Jesus, “Para kaninyo, siisay man ako?”
Nagsimbag si Pedro, “Ika po a Cristo na iminanda ka Diyos!”
Sinabi ni Jesus a Kadipisilan sagkud Kagranan Niya
(Mt. 16:20-28; Mk. 8:309:1)
21 Maigpit na sinabiyan ni Jesus so manga disipolo niya na diri nira pagsabiyun dawa kiisay man na iya a Cristo. 22 Sinabi pa niya, “A Igin ka Tawo kaipowan na magtius sa kadakul na bagay sagkud ninigaran iya ka manga gorang, ka manga namomoon ka saserdote, sagkud manga paratottoro sa layi, sagkud guguranun iya alagad sa ikatolong alduw maboboway otro.”
23 Pangala sinabi niya kanda ngamin, “A siisay man na gostong somonod kanaku, lingawan niya a kanyang sadiri, pas'anun a kanyang kros oroalduw sagkud somonod kanaku. 24 Ta a siisay man na nagmamawut na iligtas a kanyang boway mauudaan; alagad a siisay man na maudaan ka boway niya para kanaku, maliligtas. 25 Ono maraay ka usad na tawo kin mapakanya a bilog na kinaban, alagad mapapaamak o mauuda man a kanyang boway? 26 Kin ako sagkud a kanakung oosipun ikasusupug kiisay man, ikasusupug man iya ka Igin sa Tawo pag-abot niya sa kanyang kamorawayan sagkud sa kamorawayan ka Ama sagkud ka manga banal na anghel. 27 Sinasabi ko kaninyo a kamatoran: agko nagkapira sadi na diri migraan anggan diri nira nababayad a paghahadi ka Diyos.”
Nagbagong Itsora si Jesus
(Mt. 17:1-8; Mk. 9:2-8)
28 Walong alduw pagkatapos na sabiyun adi ni Jesus, iniba niya si Pedro, si Juan, sagkud si Santiago paiyan sa usad na bokid tanganing mangadyi.
29 Mantang iya nangangadyi, nabago so itsora ko lalawgun niya, sagkud so bado niya malangsola sa kapotian. 30 Pangala agko darwang lalaking linnutuw: si Moises sagkud si Elias; 31 na nagpabayad na malangsola, sagkud nakikipag-osip sira ki Jesus. Pinag-oosipan nira so nagraraning kagranan ni Jesus na mingyari sa Jerusalem. 32 Malakatorog ni Pedro sagkud so manga kaiba niya, alagad bigla sirang nagisung sagkud nabayad nira si Jesus na malangsola sagkud so darwang lalaking nakatindug na kaiba niya. 33 Ko miggalin na so darwang lalaking kaiba ni Jesus, nagsabi si Pedro, “Maestro, maraay pa sadi na sana kita. Gomigibo po kami sa tolong balayan; usad kanimo, usad ki Moises sagkud usad ki Elias.” (Na diri man niya isi kin ono so pigsasabi niya.)
34 Mantang iya nagngangabil pa nalindongan sira sa panganoron, nakatakot sira ko matawban sira kadto. 35 Usad na boses na galin sa panganoron a nagsabing, “Amo adi a kanakung Igin, a kanakung pinili. Irunggun ninyo iya!” 36 Ko so boses pinnondo na, si Jesus sana man so nabayad nira. Diri ngona ipinagsabi sa kiisay pa man so manga nabayad nira.
Pinaomayan ni Jesus so Igin na Lalaki na Sinasaniban sa Maraut na Espirito
(Mt. 17:14-18; Mk. 9:14-27)
37 Ko somonod na alduw, binnaba na sira galin sadto bokid, sinabat si Jesus ko malakadakul na tawo. 38 Agko usad na lalaki sadto kadaklan nagbaoy kanya, “Maestro, nakikimaerak ako kanimo na silngan mo man ading solosolo kong igin na lalaki. 39 Sinasaniban iya sa usad na maraut na espirito, basta na sana iyang rarait, nagkokoraykosay saka nagsosobo a kanyang nganga; saka kinukulgan sagkud abung bayaan. 40 Nakimaerak ako sa manga disipolo mo na palayasun a maraut na espirito, alagad diri nira adi mapalayas.”
41 Sinnimbag si Jesus, “Manga tawong uda pagtobod sagkud mararaut! Anggan kono pa ako mikiiiba kaninyo? Anggan kono ko kamo pigtiusan?” Sagkud sinabiyan niya so lalaki, “Darawun mo sadi so igin mo.”
42 Ko nagrarapo na so igin ki Jesus, ibinadag iya ko demonyo sadto raga sagkud pinakoraykosay. Tinuyaw ni Jesus so maraut na espirito sagkud pinaomayan niya so igin sagkud itinao sadto kag-igin niya. 43 Napangalas so ngamin na tawo sa kapangyariyan ko Diyos.
Mantang nagngangalas so kada usad sa ngamin na ginibo ni Jesus, nagsabi iya sadto manga disipolo niya, 44 “Irunggun ninyo sa maraay a sasabiyun ko: A Igin sa Tawo itatao sa kapangyariyan ka manga parakasala.” 45 Alagad diri nira naintindiyan a buut sabiyun kadi, ta inilum adi kanda tanganing diri nira maintindiyan sagkud takot man sirang mag-onga kanya kin ono buut sabiyun kadto.
Siisay a Pinakadakulu
(Mt. 18:1-5; Mk. 9:33-37)
46 Nagkaagko pagdiskoter so manga disipolo kin siisay kanda a pinakadakulu. 47 Isi ni Jesus so manga iniisip nira, kaya kinnoko iya sa usad na igin na sadit sagkud pinatindug sa kaabay niya. 48 Sagkud sinabi niya kanda, “A siisay man na omako sa igin na adi alang-alang kanaku, inaako man ako; sagkud a siisay man na omako kanaku, inaako man a nagpadara kanaku. Ta a pinakasadit kaninyo ngamin, amo yan a pinakadakulu.”
Kasorog ta a Bukung kontra Kanatu
(Mk. 9:38-40)
49 Sinnabi si Juan, “Kagorangnan, nakabayad po kami so usad na lalaki na nagpapalayas sa demonyo sa ngaran mo. Pinorbaran po namung papondowon iya ta buku man iyang kaiba ta.”
50 Alagad sinabi ni Jesus ki Juan, “Diri ninyo iya pagpapondowon, ta a bukung kontra kanatu, kasorog ta.”
Diri Inako si Jesus sa usad na Baryo sa Samaria
(Mk. 9:38-40)
51 Ko arani na so panawon na madali ng itaas si Jesus sa langit, nagdesisyon iyang mag-iyan sa Jerusalem. 52 Minandaan niya so iba na maona na kanya, sadto baryo ko Samaria tanganing ianda so ngamin para kanya. 53 Alagad abu iyang akoon ko manga tawo sadto ta iya mig-iyan sa Jerusalem. 54 Ko mabayad adto nira ni Santiago sagkud Juan nakasabi sirang, “Kagorangnan, gosto po ninyong mag-ayat kami sa kalayo na mag-olog galin sa langit tanganing tunuwun sira arug ko ginibo ni Propeta Elias.” 55 Inatobang sira ni Jesus sagkud pinagsabiyan, 56 “Diri ninyo isi kin onong espirito agko kamo? Ta nag-iyan sadi a Igin sa Tawo bukung ipaamak a manga tawo kindi para iligtas sira.” Pangala nag-iyan sira sa ibang baryo.
A Responsibilidad sa Pagsonod ki Jesus
(Mt. 8:19-22)
57 Mantang nag-aagi na sira, agko lalaking nagsabi ki Jesus, “Omiiba ako kanimo dawa sari ika mag-iyan.” 58 Sinnimbag si Jesus kanya, “A manga singgalong agko baang sagkud a manga bayong agko salagan, alagad a Igin sa Tawo uda logar na matorogan niya.” 59 Sinnabi pa iya sa usad na lalaki, “Somonod ika kanaku.” Alagad sinnimbag so lalaki, “Kagorangnan, bayaan mo ngona kong mag-oli sadto baluy tanganing ipalubung ko so kag-igin ko.” 60 Sinnimbag si Jesus, “Bayaan mo a guraan na maglubung ka sadiri nirang guraan; kindi ika, omagi ika sagkud itottoro mo a manungud sa kahadian ka Diyos.” 61 So usad nagsabi man kanya, “Somosonod man po ako kanimo, Kagorangnan, alagad mig-oli ngona ako para magpatuud sadto pamilya ko.” 62 Alagad sinabi ni Jesus kanya, “A siisay man na nag-aarado na pirming naglililili bukung angay sa kahadian ka Diyos.”