8
So Manga Babaying Nagsisirbi ki Jesus
1 Di nag-uban, linibot ni Jesus so manga banwaan sagkud so manga baryo, nangangadal sa Maraay na Bareta manungud sa pighadi ka Diyos sagkud kaiba niya so doseng apostol, 2 sagkud nagkapirang manga babaying pinaomayan niya sa mararaut na espirito sagkud manga ka'ilangan, si Maria na binaoy sa Magdalena (na linowasan sa pitong demonyo), 3 si Juana na agom ni Cusa na katiwala ni Herodes. Si Susana sagkud kadakul pang ibang babayi. So pagsorosadiri nira, amo ipinantostos ko pangangaipo ni Jesus sagkud ko manga disipolo niya.
A Parabola Manungud sa Parasabwag
( Mt. 13:1-9; Mk. 4:1-9)
4 Abot sanang abot so manga tawong naggagalin sa manga boro-banwaan ta nagrarapo ki Jesus. Ko natitipon na so malakadakul na tawo, sinabi niya a parabolang adi: 5 “Agko usad na paratanum na naglowas tanganing magsabwag sa binni. Sadto pagsabwag niya, agko binning naolog sa raran sagkud natongtongan, pangala tinoka adto sa manga bayong. 6 Agko man naolog sa kababat’wan, ko magtobo adto, naloyos man sana ta malakamara ko raga. 7 So iba naolog sadto katotodokan, na kasabay na tinnobo ko manga binni kaya nagin tagiltil man sana so manga binni. 8 Alagad so ibang binni naolog sa balonbon na raga, tinnobo sagkud namonga sa tigsasanggatos na pisug.”
Pangala mak’sug niyang sinabi: “A agko talinga mag-irungug!”
A Katoyowan Ka Parabola
( Mt. 13: 10-17; Mk. 4:10-12)
9 Inonga si Jesus ko manga disipolo niya kin ono buut sabiyun ko parabolang adto. 10 Sinnimbag si Jesus: “A pakaintindi ka manga nakatago manungud ka kahadian ka Diyos itinao kaninyo, kindi sa iba pinapaagi sa parabola tanganing;
'somilung man sira di makabayad;
mag-irungug man sira di makaintindi.' “
Ipinaliwanag Ni Jesus So Parabola
( Mt.13:18-23; Mk. 4:13-20)
11 Amo adi a buut sabiyun ko parabola: A binni amo a oosipun ka Diyos. 12 So manga binning naolog sadto gilid ko raran, nagrerepresentar ko manga nag-irungug, alagad innabot a diyablo sagkud inalin sadto kandang poso so oosipun tanganing diri sira makatobod sagkud maligtas. 13 So manga naolog sadto kababat’wan nagrerepresentar ko manga nag-irungug ko Oosipun sagkud inako nira adto na agko kaogmaan alagad bukung tuduk sa poso nira. Nakatobod sira sa gatingay na panawon alagad ko omabot so pagporbar, nagbaya na sira. 14 So manga naolog man sadto katotodokan, nagrerepresentar ko nag-irungug, alagad ko nag-uuban na nadaug sira ko manga kadipisilan sa boway, pagkabuut sa manga kayamanan sagkud kaogmaan sadi kinaban kaya diri nakapagpadagos. 15 Alagad so manga naolog sa balonbon na raga, nagprepresentar man ko manga nag-iirungug ko Oosipun. Iningatan nira adto sa kandang poso, sagkud pinagmaimbodan nira adto sagkud na namonga sa malakadakul.
A Parabola Manungud ka Sosoloan
( Mk. 4:21-25)
16 Uda nagsosolo sa sosoloan tanganing sakban sa bangga o ibutang sa irarum ka katri. Kindi ibinubutang niya yan sa tamang bubutangan tanganing a siisay man na magluug mababayad so liwanag. 17 Ta uda natatago na di mailolowas, sagkud uda pinag-iilum na di maiisiyan. 18 Kaya pakarayun ninyo a kaninyong pag-irungug! Ta a agko tatawan pa, alagad so uda lalong maalinan maski so inu-una niyang kanya, aalinun pa.”
So Ina sagkud Manga Ngod ni Jesus
( Mt. 12:46-50; Mk.3:31-35)
19 Innabot so ina sagkud manga ngod ni Jesus, alagad diri sira nakarapo ta malakadakul ko tawo. 20 Agko nagsabi kanya: “San po lowas a kanimong ina sagkud manga ngod, gosto po nirang makipagbayadan kanimo.” 21 Alagad sinabi ni Jesus: “A nag-iirungug ka Oosipun ka Diyos sagkud naggigibo, amo yan a ina sagkud manga ngod ko.”
Pinapondo ni Jesus so Bagyo
22 Usad na alduw sinabi ni Jesus sadto manga disipolo niya: “Mag-iyan kita sa loyo ka ranuw.” Kaya naglonad sira sadto bangka sagkud nagbalyo. 23 Ko sira nagsasakuy na, nakatorog si Jesus. Nag-abot so mak’sug na angin pangala naluug sa malakadakul na tobig so bangka nira sagkud nabutang sira sa peligro. 24 Kaya so manga disipilo rinaniyan si Jesus sagkud ginisung na nagsabi: “Kagorangnan! Kagorangnan! Malulunud na kita!” Nagbangon si Jesus sagkud dinawuy so angin saka so malangkusug na alun, kaya nagtoninung so angin sagkud nagraay so panawon. 25 “Sari a pagtobod ninyo?” onga niya sadto manga disipolo.
Napangalas sira sagkud nangakatakot sagkud nagsabi sa kada usad: “Siisay raw adi? Minamandaan niya a angin sagkud a dagat sagkud sinosonod man iya kadi.”
Pagpaomay ko Lalaking Nasaniban sa Manga Demonyo
( Mt. 8:28-34; Mk. 5:1-20)
26 Rinnoong sira sa karagaan ko Gergeseno, na kaampang ka Galilea. 27 Pagtongtong ni Jesus sa pangpang, sinabat iya sa usad na lalaki na taga sadto na nasaniban sa manga demonyo. Sa uban nang panawon a lalaking adi diri na nagbabado o nag-iistar sa baluy, kindi sa lulubngan na sana. 28 Ko mabayad niya si Jesus, nagrait iya sagkud linnaob sadto paniilan sagkud mak’sug na nagsabi: “Jesus, Igin ka Kaoroalangkawing Diyos, ono pakilabut mo kanaku? Nakikiosip ako kanimo, di mo ako pagpasakitan!” 29 Sinabi niya adi ta minandaan ni Jesus so maraut na espirito na lomowas sadto lalaki. (Permi iyang nasasaniban sa demonyo, dawa bantayan, gaposon, sagkud kadinaan, alagad binobogto sana niya sagkud dinadara iya ko manga demonyo sa kalangtadan.)
30 Inonga iya ni Jesus: “Ono ngaran mo?”
“Lehiyon,”a simbag niya, ta kadakul nang demonyong nagluug kanya. 31 Sagkud paoro-otro sirang nakimaerak ki Jesus na diri sira pagmandaan na tomalon sa bobon na uda kasagkuran.
32 Agko malakadakul na baktin na pinakakaun sadto kolod. Nakiosip ki Jesus so manga demonyo na palugun sira sadto manga baktin, kaya tinogotan man sira. 33 Ko maglowas na so manga demonyo sadto tawo nagluug sira sadto manga baktin. Kaya biglang nangagdalagan so manga baktin paiyan sadto ranuw sagkud nangagtalon kaya nagkalulumus.
34 Ko mabayad kadtong manga paraataman so nangyari, nagdalagan sira sagkud ibinareta adto sa manga banwaan sagkud manga baryo. 35 Sagkud naglowas so manga tawo tanganing silngan so nangyari. Pag-abot nira sadto ki Jesus, nabayad nira so tawong nasaniban sa manga demonyo. Nag-uula iya sadto paniilan ni Jesus, agko na bado sagkud maraay na so pag-iisip. Kaya nakatakot sira sa maraay. 36 Ipinaliwanag man kanda ko manga nakabayad kin paono naomayan so lalaking nasaniban sa manga demonyo. 37 Pangala so manga tawo sadto Gergeseno nakiosip ki Jesus na maggalin sadto logar nira ta nakakatakot sira. Kaya naglonad iya sadto bangka sagkud naggalin.
38 So tawong ginalinan sa demonyo nakiosip na omiba kanya, alagad pinapaoli iya ni Jesus. 39 “Paoli na ika sadto inyo sagkud ipamarita mo a dakulung bagay na ginibo kanimo ka Diyos.” Kaya so lalaki napaoli sagkud ipinamarita sa bilog na banwaan so ginibo kanya ni Jesus.
Binoway so Igin ni Jairo sagkud Pinaomayan so Usad na Babayi
( Mt. 9:18-26; Mc. 5:21-43)
40 Pagbalik ni Jesus sadto loyo ko ranuw, maogmang inako iya ko manga tawo ta sira ngamin nag-uulat kanya. 41 Pangala innabot man so usad na lalaki na ngaran Jairo, na namomoon sadto sinagoga. Nagdapla iya sadto paniilan ni Jesus sagkud nakiosip na pomaiyan sadto baluy niya, 42 ta so solo-solong igin niyang babayi na migdose anyos na nag-iingagdan.
Ko nag-aagi na si Jesus paiyan sadto baluy ni Jairo, nagsusuruksukan so manga tawo. 43 Kaiba sadi so usad na babayi na dosing taon nang pinagrorogo na diri nabobolong ni siisay man. (Naobos na ngani sa pagparapabolong so ngamin niyang pagsorosadiri.) 44 Nagrani iya sadto tarikoran ni Jesus saka rinut'an so gayad ko bado niya, pag-uban-uban napondo tolos so pagrogo.
45 Nag-onga si Jesus: “Siisay so rinnuta kanaku?”
Ko uda mag-ako, nagsabi si Pedro: “Maestro, napapalibotan ika sagkud sinusuksuk ka manga tawo!”
46 Alagad nagsabi si Jesus: “Agko rinnuta kanaku! Namati kong agko kapangyariyan na naglowas sadi kanaku.”
47 Ko maisiyan ko babayi, na diri palan natago so ginibo niya, nangungubugkubug iyang nagrani sagkud nagtiklod sadto paniilan ni Jesus. Sinabi niya sa ngamin na isadto kin ngata ta rinut'an niya si Jesus sagkud kin paono iya naomayan tolos. 48 Sinabiyan iya ni Jesus: “Igin, pinaomayan ika ka kanimong pagtobod. Paoli ika na agko katoninungan.”
49 Mantang nagngangabil pa si Jesus, agko nag-abot na usad na lalaki galin sadto baluy ni Jairo, na namomoon sa sinagoga: “Guraan na po so igin mo!” sabi niya. “Diri mo na pag-abalaun a Maestro.” 50 Ko marungug adto ni Jesus, sinabiyan niya si Jairo: “Diri ika makatakot, tomobod ika sagkud iya maoomayan.” 51 Pag-abot ni Jesus sadto baluy ni Jairo, uda iya iiniba sadto luug kindi si Pedro, Juan sagkud si Santiago, sagkud so kag-igin ko daragita. 52 So ngamin na tawo nangag-rarawitdawit sagkud pinagtatangisan so guraan: “Diri kamo magtangis,” sabi ni Jesus. “Buku iyang guraan, natotorog sana.” 53 Pinagtaw'an iya nira ta isi nirang guraan na so daragita. 54 Alagad kinaptan ni Jesus so kamut ko daragita sagkud nagsabi sa makusug: “Igin ko, bomangon ika!” 55 So espirito ko daragita binnalik, sagkud iya binnangon. Pangala sinabiyan sira ni Jesus na tawan iya sa pagkaun. 56 Napangalas so kag-igin niya, alagad tinogon sira ni Jesus na diri pagsabiyun kiisay man so nangyari.