13
Magsulsul o Mapaamak
1 Nag-abot kadto so nagkapirang tawo sagkud ibinareta ki Jesus na ipinaguraan ni Pilato so ibang Galilea mantang nag-aatang sira sa Diyos. 2 Sinabi niya kanda, “Pag-una ninyo mas makasalan a manga Galileang adi sa ibang manga tagaGalilea ta amo adto nangyari kanda? 3 Diri! Alagad sinasabi ko kaninyo: kin diri ninyo pagsulsulan a manga kasalan ninyo, mapapaamak man kamo ngamin. 4 So desi otsong nagraan ko maologan ko tore sadto Siloe, sa pag-una kaya ninyo mas makasalan sira kisa ibang nag-iistar sa Jerusalem? 5 Diri! Alagad sinasabi ko kaninyo: kin diri ninyo pagsulsulan sagkud diri talikoran a kaninyong manga kasalan, mapapaamak man kamo ngamin.”
A Parabola manungud sa Poon sa Igos na Uda Bonga
6 Sinabi niya a parabolang adi, “Agko usad na tawo na agko poon sa igos sadto tanuman niya sa obas sagkud inniyan iya sadto tanganing silngan kin agko bonga adi, alagad uda iya nabayad. 7 Kaya sinabiyan niya so paraasikaso ko obasan, ‘Tolong taon na akong nagparaiyan sadi na nag-aanap sa bonga sa kawoy na adi, alagad uda ako nababayad. Puludun mo na ta nakapipiut sana yan!’ 8 Alagad nagsimbag so para asikaso, ‘Maestro, diri ta ngona pagpuludun ngowan na taon. Kakaloton ko a palibot kan sagkud bubutangan ko sa abono. 9 Kin magbonga po adi ka somosonod na taon, maraay; alagad kin diri, pupuludun ko na.’ ”
A Babaying Boktot na Pinaomayan sa Alduw ka Pagpapaingalo
10 Usad na Alduw ka Pagpapaingalo, si Jesus nagtotottoro sa usad na sinogoga. 11 Agko usad na babayi sadto na desi otsong taon ng agko ka'ilangan na gibo ko manga maraut na espirito sadto kanya. Malakaboktot niya sagkud diri na natotolid. 12 Ko mabayad ni Jesus so babayi, inalok niya adi sagkud sinabiyan, “Babayi, naomayan na a kanimong ka'ilangan,” 13 sagkud ibinutang ni Jesus so manga kamut niya sadto babayi, kadto tolos natolid iya, sagkud nag-omaw sa Diyos.
14 Alagad naungut so namamaala sadto sinagoga, ta nagparaay si Jesus sa Alduw ka Pagpapaingalo. Kaya sinabiyan niya so manga tawo, “Agko unum na alduw na kaipowan gamitun sa pagtatrabawo; paiyan kamo sadi tanganing magparaay sa manga alduw na an, sagkud buku sa Alduw ka Pagpapaingalo.”
15 Sinimbag iya ko Kagorangnan, “Manga parasaginsagin! Bukung inoobad ninyo sa pinagpapasabsaban a manga baka sagkud dinadara sira sa pigrararaan dawa Alduw sa Pagpapaingalo? 16 A babaying adi na gikan sa lahi ni Abraham, na ginapos ni Satanas sa luug sa desi otsong taon, buku raw na kaipowan na iyang obaran dawa Alduw ka Pagpapaingalo ka nakagapos kanya?”
17 Napasupug so ngamin na nagkakalaban ki Jesus sadto simbag niya, sagkud naogma man so kadaklan sadto manga ngangalasan na bagay na ginibo niya.
A Parabola manungud ka Tolang ka Mostasa sagkud ka Lebadora
(Mt. 13:31-33; Mk. 4:30-32)
18 Nag-onga si Jesus, “Ono a kapareyo ka paghahadi ka Diyos? Sari ko ipapareyo adi? 19 Kapareyo adi ka usad na tolang ka mostasa, na itinanum ka usad na tawo sadto tanuman niya. Nagdakulu adi anggan na magin kawoy sagkud nagsalagan so manga bayong sadto manga sanga.”
20 Nag-onga otro si Jesus, “Sari ko ipapareyo a paghahadi ka Diyos? 21 Kapareyo adi sa lebadora na isinalak ko usad na babayi sa tolong takad na arina, kaya innalsa so ngamin na minasa.”
A Kipot na Pwertaan
(Mt. 7:13-14, 21-23)
22 Nagpadagos si Jesus ko kanyang pag-agi. Nagtotottoro iya sa syodad sagkud baryo na maagyan niya paiyan sa Jerusalem. 23 Agko usad na nag-onga kanya, “Gagatikot raw po sana a maliligtas?”
Sinnimbag si Jesus, 24 “Ingowaun ninyong lumuug sa kipot na pwertaan. Sinasabi ko kaninyo, kadakul ka mig-ingoa na lomuluug alagad diri makaluluug. 25 Kin ginukpan na ka kagbaluy a pwertaan nira, migtindug kamo san lowas sagkud migparatoktok sagkud makikimaerak, ‘Kagorangnan, bokse man po a pwertaan para kanamu,’ alagad sisimbagun niya kamo, ‘Diri ko kamo bisto sagkud diri ko isi kin tagasari kamo.’ 26 Sagkud sasabiyun ninyo, ‘Nagkaun sagkud nag-inom kami na kaiba mo, sagkud nagtottoro pa ika sadto manga aagyan namu,’ 27 alagad somisimbag iya, ‘Diri ko isi kin tagasari kamo! Romayo kamo kanaku, kamo ngamin na naggigibo sa maraut.” 28 Mingigtangis sagkud mingigragut a manga ngipun ninyo kin mabayad ninyo si Abraham, si Isaac, sagkud si Jacob sagkud so ngamin na propeta, na sadto kahadian ka Diyos alagad so sadiri ninyo nasa lowas! 29 Sagkud omaabot a manga tawo galin sa subangan sagkud sa sulnuran, sa norte sagkud timog sagkud omuula sira sa andaan sa kahadian ka Diyos. 30 Matood na agko manga naooring maoona, sagkud agko man manga naoonang maoori.”
A Pagkabuut ni Jesus sa Jerusalem
(Mt. 23:37-39)
31 Ko oras na adto agko nagkapirang Pariseo na nagrapo ki Jesus sagkud nagsabi kanya, “Maggalin po ika sadi ta si Herodes gosto ikang ipaguraan.”
32 Sinnimbag si Jesus, “Agi na, sabiyun ninyo sa singgalong na an na nagpapalayas ako ngowan sa manga demonyo saka nagpapaomay, udma amo man; ka ikatlong alduw, tataposon ko ading ginigibo ko. 33 Alagad kaipowan akong magpadagos ka pag-agi ko ngowan, udma sagkud ka usad pang alduw, ta diri kaipowan magraan sa lowas ka Jerusalem a usad na propeta.”
34 “Manga tagaJerusalem! Ginuguraan ninyo a manga propeta sagkud pinagbabato a manga pinaiiyan ko siton! Pirang beses kong pinirit na tiponon sagkud atamanun kamo, pareyo ka pagkobkob ka usad na isiwan sa kanyang manga isiw; alagad abu ninyo. 35 Silngi, ta pinabayaan na a baluy ninyo. Sinasabiyan ko kamo, diri mo na ako mababayad hanggan na diri ika nagsasabing, ‘Bendisyonan a mig-abot sa ngaran ka Kagorangnan!’ ”