12
Patanid sagkud Pag-indagar
(Mt. 10:26-27)
1 Mantang nagraraniyan na so riboribong tawo, sagkud nangagkatorongtongan na so kada usad, nagngabil si Jesus sadto manga disipolo niya, “Magmaan kamo sa lebadora ka manga Pariseo na amo a kapalangkawan. 2 Ta uda natatago na diri naiisiyan, sagkud uda ilum na diri naayag. 3 Kin ono man na sabiyun ninyo sa kangitngitan, marurungug an sa kaliwanggan, sagkud kin ono man na ipinag-iing-ing ninyo sa luug ka kwarto, ikakagrat sa atup.
A Kaipowan na Katakotan
(Mt. 10:28-31)
4 “Sinasabiyan ko kamo, manga amigo ko: Diri kamo makatakot sa manga nangguguraan ka awak, ta pagkatapos kan uda naman magiginibo. 5 Alagad sasabiyun ko kaninyo kin siisay a kaipowan ninyong makatakotan: Katakotan ninyo a pagkatapos na guranun a kaninyong awak, agko pa kapangyariyan na iapon kamo sa impiyerno. Amo, sinasabi ko kaninyo: A Diyos a kaipowan ninyong makatakotan!
6 Bukung ipinababakal a limang rignus sa darwang sintabo sana? Alagad ni usad kanda diri pinabayaan ka Diyos. 7 Dawa a book ninyo bilang niya ngamin. Kaya diri kamo makatakot! Mas importante kamo kisa manga rignus.”
A Pagbisto ki Cristo
8 Sinasabi ko man kaninyo, “A siisay man na nagbibisto kanaku sa atobangan ka manga tawo, bibistowon man ka Igin ka Tawo sa atobangan ka manga anghel ka Diyos. 9 Alagad a magdiyar kanaku sa atobangan ka manga tawo, didiyaran ko man sa atobangangan ka manga anghel ka Diyos. 10 A siisay man na magngabil kontra sa Igin ka Tawo patatawarun, alagad a magngabil kontra sa Espirito Santo diri patatawarun.
11 Kin kamo darawun nira sa sinagoga, o sa atobangan ka manga namamaala sagkud manga makapangyariyan tanganing iakosar, diri kamo maandal kin paono ninyo ididipensa a sadiri ninyo o kin ono a sasabiyun ninyo, 12 ta sa oras na an, a Espirito Santo a migtottoro kaninyo kin ono a kaipowan ninyong sabiyun.”
A Parabola ko Mayaman na Patal
13 Agko usad na tawo sadto na nagsabi ki Jesus, “Maestro, sabiyan mo man a ngod ko na itao kanaku so parte ko sa minana namu sa kanamung ama.”
14 Sinnimbag si Jesus, “Lalaki, siisay a nagbutang kanaku bilang owis o tagabanga ka pagsorosadiri ninyo?” 15 Kaya sinabi niya sa ngamin, “Magmaan kamo sa ngamin na klase sa kaimutan; ta a boway ka tawo uda sa kin gaomno kadakul ka kayamanan.”
16 Pangala sinabi ni Jesus a parabolang adi, “Sa oma ko usad na mayaman na lalaki nag-ani sa malakadakul. 17 Kaya sinabi niya sa sadiri niya, ‘Ono a gigibowon ko? Uda na ako bubutangan ka manga pinag-ani ko.’
18 Pangala sinnabi iya sa sadiri niya, ‘Amo adi a gigibowon ko: Rurugmaun ko a manga kamalig ko sagkud migtogrok ako sa mas dakulu; sadto ko ibubutang a manga naani ko sagkud manga pagsorosadiri ko. 19 Sagkud sasabiyun ko sa sadiri ko: Kadakul ko ng pagsorosadiri na natipon para sa dakul na taon. Kaya migpaingalo na sana ako; migkaun, mig-inom sagkud migmuyamuya.’
20 Alagad sinabi ko Diyos kanya, ‘Patal! Ngowan na gab'i babawian ta ika sa boway. Kiisay mapaiiyan a manga tinipon mo?’ 21 Arug kan a mingyari sa kiisay man na nagtitipon sa kayamanan para sa sadiri alagad bukung mayaman sa atobangan ka Diyos.”
Diri ika Maporisaw
(Mt. 6:25-34)
22 Pangala sinnabi si Jesus sadto manga disipolo niya, “Kaya sinasabi ko kaninyo: diri kamo maporisaw manungud sa pagkaun na kaipowan ninyo tanganing maboway, o manungud sa babadoon para ka awak ninyo. 23 Ta a boway mas importante kisa pagkaun, sagkud a awak kisa bado. 24 Isipun na sana ninyo a manga owak: diri sira nagtatanum o nag-aani man, uda sira manga sasarayan o manga kamalig, alagad pinakakaun sira ka Diyos! Kamo pa raw a diri pakanun ka Diyos na mas importante kisa manga bayong! 25 Siisay kaninyo a makapagpaaba ka kaninyong boway usad na oras basang sa paagi ka pagkaporisaw? 26 Kin diri ninyo kayang magibo a arug kan kasadit na bagay, ngata kamo ta napoporisaw manungud sa ibang bagay?
27 Isipun ninyo kin paono nagtotobo a manga borak sa kaiwasan; diri sira nagpapagal ni nagtatayi. Alagad amo adi a sasabiyun ko kaninyo: dawa si Solomon diri nakapagsopong sa arug kagayon ka manga borak na adi, dawa naggagayon na ko manga bado niya. 28 Kin a manga doot sa kabokidan naboway ngowan sagkud iginagatong kinaudmaan, binabadoan ka Diyos, kamo pa kaya diri niya badoan? Kamo na malaka gagatikot ka pagtobod kanya! 29 Kaya diri kamo maporisaw sa pag-anap ka kaninyong pagkaun sagkud iinomon. 30 A manga bagay na adi amo kinakaabalaan ka manga tawong uda pagtobod sa Diyos. Alagad isi ka kaninyong Amang nasa langit na kaipowan ninyo a ngamin na adi. 31 Kaya orog sa ngamin, ingowaun ninyong paghadian kamo ka Diyos, ta itatao niya a manga pangangaipo ninyo.
32 Diri kamo makatakot, saday na katiriponan, ta kamuy'an ka Ama na itao kaninyo a kahadian. 33 Ipabakal ninyo a kaninyong pagsorosadiri, sagkud ipanao ninyo a kabakalan sa manga pobre! Gomibo kamo sa manga lulugan na diri naloloma, sagkud magsaray kamo sa kayamanan sadto langit na diri nauuda. Ta uda sadto makararapong mataban sagkud uda bokbok na migraut. 34 Ta kin sari a kayamanan ninyo, isan man a poso ninyo.”
A Andam na Mamandaan
35 “Magin andam kamo, sagkud padtaan a kaninyong manga soloan. 36 Omarug kamo sa manga tawong nag-uulat sa pag-oli ko kandang kagorangnan galin sa kinasal, tanganing pag-abot niya maboboksan tolos a pwertaan. 37 Paladan a manga mamandaan na maabotan na nagbabantay pag-abot ka kandang kagorangnan. Sinasabi ko kaninyo, migpreparar iya sagkud pauulaan sira, ipig-anda sira sa pagkaun sagkud pigsirbiyan. 38 Paladan sira kin maabotan niya sirang andam, omabot man iyang lawud o mararamragun. 39 Tandaan ninyo adi: kin isi sana ka kagsadiri ka baluy kin onong oras na omaabot a mataban, diri niya pababayaan na luugun a baluy niya. 40 Kaya kaipowan kamong magin andam, ta a Igin ka Tawo omaabot sa oras na diri ninyo naiisiyan.”
A Matanos sagkud Bukung Matanos na Mamandaan
(Mt. 24:45-51)
41 Nag-onga si Pedro ki Jesus, “Kagorangnan, sinasabi mo po a parabolang adi para kanamu, o para sa ngamin?”
42 Sinnimbag so Kagorangnan, “Siisay a maimbod sagkud madonong na mamandaan? Bukung iya a pipimmalaun ka kanyang kagorangnan sa baluy kadi tanganing magtao sa ibang manga mamandaan ka pagkaun nira sa tamang panawon? 43 Paladan a mamandaan na maabotan iyang naggigibo sa arug kan, sa pag-abot ka kanyang kagorangnan. 44 Sinasabi ko kaninyo a kamatoranan: Pipimmalaun iya ka kanyang kagorangnan sa ngamin na pagsorosadiri niya. 45 Alagad kin sabiyun sa sadiri ka mamandaan na an, ‘Mauuban pa bago magpaoli a kanakung kagorangnan,’ sagkud pigponan niyang pag-aprusan a manga kapwa niya mamandaan; lalaki man o babayi, pangala migkaun, mig-iinom sagkud migboborat iya. 46 Omaabot so among niya sa alduw na diri niya linalaoman sagkud sa oras na diri niya isi. Pasasakitan iya saigo sagkud iiiba iya sadto manga diri mapagkakatiwalaan.
47 A mamandaan na nakakaisi ka kabutan ka kanyang kagorangnan, alagad diri nag-aanda ni sinnosonod ka kabutan kadi, mig-ako sa magubat na pasakit. 48 Alagad a mamandaan na diri nakakaisi ka kabutan ka kanyang kagorangnan sagkud ginnigibo ka manga bagay na angay niyang pagtiusan, mig-ako sa magaan na pasakit. A pinagkatiwalaan sa dakul na bagay, pig-anapan man sa dakul na bagay; a pinagkatiwalaan sa mas orog na dakul na bagay, pig-anapan man sa mas orog na dakul na bagay.”
Pagkabangabanga ka Pamilya
(Mt. 10:34-36)
49 “Napaiyan ako sadi tanganing magdara sa kalayo sadi kinaban, sagkud gosto ko kintanang nagluludab na adi! 50 Alagad bago adi mangyari, agko manga pagsakit na kaipowan kong akoon, sagkud napoporisaw ako anggan na diri pa nangyayari adi! 51 Pag-una ninyo napaiyan ako tanganing magdara sa katoninungan sadi raga? Sinasabi ko kaninyo: bukung katoninungan kindi pagkabangabanga. 52 Poon ngowan, agko lima katawo sa usad na pamilyang migkabangabanga; a tolo kontra sa darwa sagkud a darwa kontra sa tolo. 53 Migkasogot a ama sagkud a igin na lalaki, a ina sagkud a igin na babayi, sagkud amo man a panogangan na babayi, sagkud manogang na babayi.”
Pagmangno ka Panawon
(Mt. 16:2-3)
54 Sinabi man ni Jesus sadto manga tawo, “Kin nabayad ninyong maib'ug a panganoron sa sulnuran, sinasabi ninyo na omooran sagkud amo man nangyayari. 55 Kin makusug a angin paiyan sa norte, sinasabi ninyong mig-init, sagkud amo man nangyayari. 56 Manga parasagin-sagin! Tattao kamong mag-intindi ka tanda ka manga panawon sa raga sagkud sa langit, ngata ta diri ninyo maisiyan a tanda ngowan na panawon?”
Makipag-osay sa Kasogot
(Mt. 5:25-26)
57 “Ngata ta diri ninyo mapagdisisyonan sa sadiri ninyo kin ari a tama? 58 Kin iinakosar ika sa korte, makipag-osay ika sa nag-akosar kanimo mantang agko pa panawon; ta baka godgoron ika paiyan sa owis sagkud so owis itatao man ika sadto manga bantay na amo man a migluug kanimo sa prisowan. 59 Sinasabi ko kanimo: Diri ika makalolowas sa prisowan sagkud na diri mo nababayaran a pinakaoltimong sentimo.”