7
So Pagtobod ko Kapitan na Romano
(Mt. 8:5-13)
1 Ko maitottoro na ni Jesus so ngamin sadto manga tawo, nag-iyan iya sa Capernaum. 2 Sadto agko usad na kapitan na Romano na agko mamandaan na nabubutan niya sa maraay; adi nag-iilang sagkud nag-iingagdan na. 3 Ko mabaretaan ko kapitan so ginibo ni Jesus, nagmandayya sa manga gorang na manga Judio tanganing pakiosipan si Jesus na mag-iyan kanda sagkud paomayan so mamandaan. 4 Ko mag-abot na sira sadto ki Jesus, nakimaerak sira sa maraay kanya: “A lalaking adi nangangaipo sa maraay ka tabang mo. 5 Ta nabubutan niya saigo a nasyon ta, sagkud nagpatogrok pa iya sa sinagoga.” 6 Kaya nag-iba kanda si Jesus.
Ko arani na sira sadto baluy ipinasabat iya ko kapitan sadto manga amigo niya tanganing sabiyun kanya: “Kagorangnan, di nayka magpakapagal; ta buku akong angay na iyanan mo sa baluy ko. 7 Kaya ngani di ako nagkusug buut na omatobang kanimo. Alagad sabiyun mo sana ta maoomayan na so mamandaan ko. 8 Ta ako nasa irarum man sa mas alangkaw kanaku na manga opisyal, agko man ako nasasakupan na manga soldados; kin sabiyun ko sa usad: Agi na! iya mig-agi man, o kaya: Mayang! nagrarapo man iya! Kin minamandaan ko a kanakung mamandaan: Gibowa 'di! ginigibo man niya.”
9 Nagngalas si Jesus pagkarungug niya kadto sagkud inatobang niya so manga tawo na nagsosonod kanya sagkud nagsabi iya: “Sinasabi ko kaninyo: Dawa sa Israel di pa ko nakabayad sa arug kadi kadakulung pagtobod!” 10 Sagkud ko paoli na so manga amigo ko kapitan sadto baluy niya, naabotan nirang naomayan na so mamandaan.
Binoway ni Jesus so Igin ko Babaying Balo
11 Matapos adto, nag-iyan si Jesus kaiba so manga disipolo niya sa usad na banwaan na binabaoy na Nain sagkud kadakul na tawo so nagsosonod kanya. 12 Ko arani na sira sadto trangkaan ko banwaan, nasabat niya so ilulubung na kasolo-solong igin na lalaki ko babaying balo. Kadakul ko nakigubuk. 13 Ko mabayad ni Jesus so ina ko guraan, naerak iya sa maraay kaya sinabiyan niya so babayi: “Di na ika magtangis!”
14 Pagkatapos nagrapo iya sadto pinagboboligan sagkud rinut'an niya adto sagkud so manga nagbobolig ko guraan nagpondo. Sinnabi iya: “Soltero, sinasabi ko kanimo: Bomangon ika!” 15 Nagbangon so guraan sagkud nagpoon nang magngabil sagkud itinao nayya otro sadto kag-igin niyang babayi.
16 Nakamati sa sobrang katakotan so manga tawo sagkud so ngamin nag-omaw sa Diyos sagkud nagsabi: “Innabot na kanatu a makapangyariyan na propeta!” sagkud “Innabot a Diyos tanganing tabangan a kanyang banwaan!” 17 So bareta manunungud ki Jesus nagluyap sa bilog na Judea sagkud sa manga logar na nasa palibot.
Manga Minandaan ni Juan na Parabunyag
(Mt. 11:2-19)
18 So ngamin na adto ibinareta ki Juan ko manga disipolo niya. Kaya binaoy niya so darwa kanda 19 sagkud pinaiyan niya sa Kagorangnan tanganing ongaun: “Ika na po a sinasabi ni Juan na mig-abot o mig-ulat pa kami sa iba?”
20 Pag-abot nira ki Jesus sinabi nira: “Pinaiyan po kami sadi ni Juan na parabunyag sagkud ipina-oonga niya: 'Ika na a sinasabi niyang mig-abot o mig-ulat pa kami sa iba?' “
21 Ko oras man sanang adto, pinaomayan ni Jesus so malakadakul na tawo na agko manlain-lain na ka'ilangan, sagkud nasasaniban sa maraut na espirito, sagkud nakabayad so manga bota. 22 Pagkatapos sinabi niya kanda: “Magbalik kamo sagkud sabiyun ninyo ki Juan so ngamin na nabayad sagkud narungug ninyo: So bota nakabayad, so pilay nakaagi, naomayan so manga pudpurun, nakarungug so manga bungug, binoway so manga guraan, sagkud so Maraay na Bareta itinottoro sa manga pobre. 23 Paladan a siisay man na di nagdodorodarwa manungud kanaku.”
24 Paggalin ko manga minandaan ni Juan, si Jesus nagpoon nang mag-istorya manungud ki Juan: “Ngata kamo ta linnowas sadto kalangtadan, ono gosto ninyong mabayad? Usad na tambo na pinagpapalid-palid sa angin? 25 O nag-uulat kamo na makabayad sa usad na tawong malang'gayon ka sopong? Buku, a tawong nagsosopong sa mamalun na bado sagkud naboboway sa kaambondaan nag-iistar sa palasyo. 26 Ono raw a gosto ninyong mabayad? Usad na propeta? Amo, sinasabiyan ko kamo a nababayad ninyo mas labi pa sa propeta. 27 Ta si Juan a sinasabi sa Kasoratan:
'Ipadadara ko a kanakung mandaan na maoona kanimo,
ta iaanda niya a kanimong aagyan.'a
28 Sinasabiyan ko kamo: Sa ngamin na ipinangigin uda omoorog ki Juan Bautista, alagad a pinakasadit sa pinaghahadian ka Diyos mas orog pa ki sa kanya.
29 Ko marungug nira 'di, kaiban ko manga parasingil sa bowis, nagkaoyon sira na a plano ka Diyos maraay,b ta sira binunyagan ni Juan. 30 Kindi so manga Pariseo sagkud manga paratottoro ka layi, inabuan a katoyowan ka Diyos para kanda ta diri sira nagpabunyag ki Juan.
31 Sari ko ibabaing a manga tawong adi ngowan? Ono a kapareyo nira? 32 Bagana sira manga igin na nakaula sa sasaran sagkud nagbibinaoyan sa kada usad:
'Tinogtogan namu kamo sa plawta,
alagad di kamo nagbayli!
Nagrawit-dawit kami,
alagad di man kamo nagtangis!'
33 Ta inniyan sadi si Juan na parabunyag na nag-aayono sagkud di nag-iinom sa alak, tapos sasabiyun ninyo na: 'Sinasaniban iya sa maraut na espirito.' 34 Napaiyan na man a Igin sa Tawo, na nagkakaun sagkud nag-iinom sinasabi ninyo: 'Sadi na so angap sagkud para-inom, amigo ka manga parasingil sagkud manga 'parakasala'!' 35 Alagad a kadonongan ka Diyos mapapatonayan ka manga tawong nag-aako kanya.”
Pinonasan si Jesus ko Makasalan na Babayi
36 Ngowan usad na Pariseo a nag-imbetar ki Jesus na makipang gab'i kanya, kaya nag-iyan iya sadto baluy ko Pariseo sagkud innula sadto kaunan. 37 Sadto banwaan na adto agko usad na babayi namomoway sa kasalan. Kaya ko maisiyan niya na si Jesus minggab'i sadto baluy ko Pariseo nag-iyan iya na dara-dara so bote sa alabastro na pono sa paamot. 38 Mantang nakatindug iya sa tarikoran ni Jesus,c sa agko paniilan, nagpoon iyang magbora sagkud so manga lowa niya nabasa so tiil ni Jesus. Tapos pinayran niya adto ko book niya, inarukan sagkud inolaan sa paamot.
39 Ko mabayad adto ko Pariseong nag-imbetar ki Jesus, nasabi niya sa sadiri: “Kin matood na propeta a tawong adi isi niya kin siisay sagkud onong klaseng babayi a nag-aapolas kanya na usad iyang makasalan.”
40 Nagsimbag si Jesus kanya: “Simon, agko ko sasabiyun kanimo.”
Sinnimbag iya: “Ono po an, Maestro?”
41 “Agko darwang tawo na nag-otang sa usad na parapautang, so usad innotang sa limang gatos na denaryod sagkud so usad singkwenta. 42 Ko diri makabayad ading darwa ko manga otang nira, pareyo sirang pinatawad. Ngowan siisay sadto darwa a mas nagpapayaba sadto parapa-otang?”
43 Nagsimbag si Simon: “Sa pag-una ko so pinatawad sa dakulong kantidad.”
“Tama a simbag mo,” sabi ni Jesus.
44 Kaya linnilili iya sadto babayi sagkud sinabi ki Simon: “Nababayad mo a babaying adi? Nag-iyan ako sadi baluy mo, alagad di mo basang ako tinawan sa tobig tanganing ninuwan ading tiil ko. Alagad inogasan niya tiil ko sa lowa sagkud pinayran ko book niya. 45 Diri mo ko inarukan, alagad ading babaying adi, poon ko magluug ako, diri nayya nagpondo sa pag-aruk sa manga tiil ko. 46 Diri mo binutangan sa lana sa olibo a payo ko, alagad binoboan niya sa paamot a manga tiil ko. 47 Kaya, sinasabi ko kanimo: A ipinabayad niyang kadakulung pagkabuut nagpapatonay na so dakul niyang kasalan pinatawad na. A pinatawad sa gatikit, gatikit man a pinababayad na pagkabuut.”
48 Pangala sinabi ni Jesus sadto babayi: “Pinapatawad na ika ka kanimong manga kasalan.”
49 Sagkud so manga kaiba niyang nagkakaun nagpoon nang mag-onga sa sadiri: “Siisay adi na nakapag-papatawad sa manga kasalan?”
50 Kindi sinabi ni Jesus sadto babayi: “A pagtobod mo amo nagligtas kanimo. e