6
A Kaongaan ka Alduw sa Pagpapaingalo
(Mt. 12:1-8; Mk. 2:23-28)
1 Usad na Alduw sa Pagpapaingalo, linnabos sira si Jesus sa manga trigowan. Nagpoknit sa trigo so manga disipolo niya, piniripisi adto, sagkud kinaun. 2 Alagad so manga Pariseo nagsabi: “Ngata ta ginigibo ninyo sa Alduw sa Pagpapaingalo so ipinagbabawal ka layi? 3 Sinnimbag si Jesus: Diri ninyo nabasa so ginibo ni David ko mag-alup iya sagkud so manga kaiba niya? 4 Nagluug iya sa baluy ko Kagorangnan, nagkoko sa atang na tinapay sagkud kinaun sagkud tinawan pa niya so manga kaiba niya, dawa sabi sa Layi, na a manga saserdote sana a agko poder na magkaun kan.”
5 Sagkud sinabi ni Jesus kanda, “A Igin sa Tawo amo a Kagorangnan ka Alduw sa Pagpapaingalo.”
So Tawong Paralisado a Usad na Kamut
(Mt. 12:9-14; Mk. 3:1-6)
6 Usad na Alduw sa Pagpapaingalo, linnuug otro si Jesus sa sinagoga sagkud nagtottoro, agko sadto usad na lalaki na paralisado so satoong kamut. 7 Sa kagostowan ko manga paratottoro sa layi sagkud manga Pariseo na masawtan si Jesus, nagbantay sira tanganing mabayad nira kin iya migpaomay sa Alduw sa Pagpapaingalo. 8 Alagad naiisiyan man ni Jesus so manga iniisip nira, kaya sinabi niya sadto lalaking paralisado so kamut: Mayna sadi onaan. Nagrapo man so lalaki sagkud tinnindug sadto. 9 Sinabi ni Jesus kanda: “Oongaun ko kamo: Ari a oyon sa Layi, a gomibo sa maraay, o gomibo sa maraut sa Alduw sa Pagpapaingalo? Magligtas sa boway o gomuraan?” 10 Sinilngan ni Jesus so manga nakapalibot kanya sagkud sinabiyan niya so lalaki. “Iunat mo a kamut mo!” Iinunat man niya so kanyang kamut sagkud adi naomayan na. 11 Malakaungut ko manga paratottoro sagkud Pariseo, kaya pinag-osipan nira kin ono gigibowon ki Jesus.
Pinnili si Jesus sa Doseng Apostol
(Mt 10.1-4; Mk 3.13-19)
12 Ko panawon na adto, nagtokad si Jesus sa usad na kolod, tanganing mangadyi, kaya nagramrag iya sadtong nangadyi. 13 Pagkaramrag, binaoy niya so manga disipolo niya sagkud pinnili iya sa dose kanda na binaoy niyang apostol: 14 Sira amo si Simon (na nginaranan niyang Pedro) sagkud so ngod niyang si Andres, si Santiago, Juan, Felipe, Bartolome. 15 Mt., Tomas, sagkud Santiago na igin ni Alfeo, si Simon (na binabaoy na Makabayan), 16 si Judas na igin ni Santiago, sagkud si Judas Iscariote na nagin traydor.
Biyaya sagkud Pagtius
(Mt. 4:23-25)
17 Binnaba si Jesus na kaiba nira, sagkud tinnindug iya sa pantay na logar. Isadto so kadaklan ko manga parasonod niya sagkud malakadakul na tawo galin sa Judea sagkud Jerusalem sagkud so manga banwaan na sa gilid sa dagat ko Tiro sagkud Sidon. 18 Nagpaiyan sira sadto tanganing mag-irungug sagkud maomayan so kandang kamatian. Pinaomayan man niya so manga pinasasakitan ko maraut na espirito. 19 Nag-ingoa so ngamin na tawong marut'an iya ta agko iya kapangyariyan na magpaomay ka ngamin.
A Paladan sagkud a Pobre
(Mt. 5:1-12)
20 Sinilngan ni Jesus so manga disipolo, sagkud sinabi niya:
“Paladan kamong manga pobre,
ta a Diyos a mighadi kaninyo.
21 Paladan kamong nag-aalup ngowan,
ta kamo bobosogon.
Paladan kamong manga nagbobora,
ta kamo migtawa.
22 Paladan kamo kin a tawo nauungut kaninyo,
kin kamo isinosobol, sagkud kin toya-toyaun
sagkud rinaraut a ngaran ninyo holi ka Igin sa Tawo.
23 “Mag-ogma kamo sagkud maglokso sa kaogmaan, kin adi mangyari ta kadakulu ka premyo na nakatagama kaninyo sa langit. Ta arug man kan so ginibo ko manga ginikanan nira sa manga propeta.
24 Alagad erak man kaninyo na mayayaman ngowan,
ta nakamati na kamo sa kaginnawaan.
25 Erak man kaninyo na manga bosog ngowan,
ta kamo mig-alup.
Erak man kaninyo na nagtatawa ngowan,
ta kamo migmundu sagkud migbora.
26 Erak man kaninyo kin inoomaw kamo ka ngamin na tawo,
ta arug man kan a ginibo ko kandang manga ginikanan sa manga bukung matood na propeta.
Mabutan a manga Kasogot
(Mt. 5:38-48; 7:12)
27 Alagad sinasabiyan ko kamong manga nag-iirungug kanaku: mabutan ninyo a kaninyong manga kasogot, gibowan ninyo sa maraay a manga nauungut kaninyo, 28 bendisyonan ninyo a manga sinnompa kaninyo, sagkud ipangadyi ninyo a manga nagraraut kaninyo. 29 Kin sinampaling ika sa usad na pisngi, itao mo pa a saloyo; kin inaguw kanimo a alikbuy mo, itao mo na pati bado mo. 30 Tawan mo a kada nag-aayat kanimo, sagkud kin agko magkoko ka onoman na pagsorosadiri mo di mo na pagbawiun. 31 Gibowon ninyo sa iba a gosto ninyong gibowon nira kaninyo.
32 “Kin mabubutan mo sana a nabubuut kanimo, ono pang premyo a inuulat mo? Ta dawa a manga 'parakasala' nabubuut man sa nabubuut kanda. 33 Kin a gigibowan ninyo sa maraay an sanang ginnigibo kaninyo sa maraay, ono pang premyo a inuulat ninyo? Ta dawa a manga 'parakasala' ginnigibo man kadi. 34 Sagkud kin a pinapauram sana ninyo a isi ninyong migsolit kaninyo, ono pang premyo a inuulat ninyo? Ta dawa a manga 'parakasala' nagpapauram man sa pag-unang isosolit nira. 35 Alagad mabutan ninyo a manga kasogot ninyo, sagkud gibowan ninyo sira sa maraay. Magpauram kamo na di naglalaom na isosolit pa nira. Kin arug kan dakulung premyo a makoko ninyo, sagkud kamo magiging Igin ka Kaoroalangkawi. Ta iya maraay sa mararaut sagkud tattaong magtan'aw sa maraay na buut. 36 Magin maeerakun kamo, arug ka kaninyong Ama.”
Pag-osga sa Kapwa
(Mt. 7:1-5)
37 “Di kamo mag-osga, tanganing di kamo osgaan. Di kamo magpasakit, tanganing di kamo pasakitan. Magpatawad kamo sagkud patatawarun man kamo. 38 Magtao kamo, ta tatawan man kamo: Tamang takad, gadut, yinugyug sagkud naglilipwas pa a itatao kaninyo; ta gagaynan na ginamit ninyo sa iba amo man gagamitun kaninyo.”
39 Sinabi man niya kanda sa parabola: “Pwede raw na magin taga-kabit a bota sa usad man na bota? Diri raw sira pareyong maoolog sa kalot? 40 Uda taga sonod na mas madonong sa paratottoro; alagad kin matottoroan na iya sa maraay magigin arug na iya ko paratottoro niya. 41 Ngata ta sinisilngan mo a sadit na mota ka ngod mo, alagad di mo nababayad a dakulung mota sa mata mo? 42 Paono mo masasabi sa ngod mo: 'Ngod ulat ngani ta alinun ko a sadit na mota sa mata mo,' na di mo ngani nababayad a dakulung mota sa mata mo? Ika na mapagmataas alinun mo ngona a dakulung mota sa mata mo tanganing mabayad mo sa maraay; kin arug kan maaalin mo na a sadit na mota ka ngod mo.”
A Poon Nabibisto sa Bonga
43 “Uda maraay na kawoy a mamomonga sa maraut, sagkud uda maraut na kawoy na mamomonga sa maraay. 44 Nabibisto a kada kawoy sa paagi ka bonga niya; ta diri nakakagiro sa igos sa poon ka aromaa sagkud di man nakakakoko sa obas sa manga doot. 45 A maraay na tawo nakakatao sa maraay ta a kanyang poso pono sa karayan, a maraut na tawo, maraut man a gibo ta a nasasaray sa kanyang poso ngamin karatan: ta kin ono a luug ka poso amo naglolowas sa nganga.”
So Madonong sagkud Patal na Nagtogrok sa Baluy
(Mt. 7:24-27)
46 Ngata ta binabaoy ninyo akong: 'Kagorangnan, Kagorangnan,' alagad di man ninyo ginigibo a pigsasabi ko? 47 Ipabibisto ko kaninyo kin kiisay nakapapareyo a kada tawo, na rinnarapo kanaku, sagkud nakakarungug ka oosipun ko sagkud naggigibo. 48 Pareyoy 'ya ka usad na tawong nagtogrok sa baluy. Kinnalot iya sa ararum sagkud nagtogrok sa baluy na so pondasyon bato. Ko magbaha, tinnama so tobig sadto baluy alagad di basang nayugyug ta malangtibay ko pagkagibo. 49 Alagad a nagrurungug ka manga oosipun ko na di nagkokoyog, bagana man sana yan so tawo na nagtogrok sa baluy na di nagbutang sa pondasyon. Binnaha, inagyan sa tobig so baluy, pangala napokan sagkud deretsong narugma.