5
Pagbaoy Ko Onang Disipolo
Mat 4:18-22; Mk 1:16-20
1 Usad na alduw nagtitindug si Jesus sadto pangpang ko ranuw sa Genesaret. Malakadakul ko manga tawong nagsusuruksukan ta gostong makarungug ko oosipun ka Diyos. 2 Nakabayad iya sa darwang bangka sadto pangpang. Nakaawas na so manga paraisura sagkud nag-oogas na ko kandang manga pokot. 3 Naglonad iya sadto usad na bangka sagkud sinabiyan si Simon na irayo sa gatikot so bangka galin sadto gilid. Nag-ula iya sadto bangka saka nagtottoro sadto manga tawo.
4 Pagkatapos niyang magtottoro, sinabiyan niya si Simon: “Magpabitnga kamo sagkud iolog ninyo a pokot tanganing manrakup sa isura.” 5 Sinnimbag si Simon: “Maestro, magramrag na kaming nanggaga-isura uda kami narakup; alagad ta sinabi mo, ioolog ko ading pokot.” 6 Amo adto so ginibo nira, kaya sa kadakul nirang narakup na isura madali nang mapaknit so pokot nira. 7 Kaya kinayab nira so manga kaiba sadto ibang bangka tanganing tomabang, kaya nagrani man sira. Napono so darwang bangka mala ta madali nang malundag. 8 Ko mabayad adto ni Simon Pedro, nagtiklod iya sadto atobangan ni Jesus sagkud nagsabi: “Romayo ika kanaku, Kagorangnan, ta ako makasalan.” 9 Napangalas iya sagkud so manga kaiba niya ta malakadakul ko narakup na isura, 10 amo man si Santiago sagkud si Juan, manga igin ni Zebedeo, na manga kabakas ni Simon. Sinabiyan ni Jesus si Simon: “Diri ika makatakot; poon ngowan, manga tawo na a rarakpun mo.” 11 Ko maipagilid na nira so kandang manga bangka, binayaan nira so ngamin sagkud nagsonod na ki Jesus.
Pinaomayan Ni Jesus So Pudpurun
12 Ko si Jesus nasa usad na banwaan, nakasabat iya sa lalaking pudpurun. Ko mabayad iya ko lalaki, linnaob iya sa atobangan niya sagkud nakimaerak: “Kagorangnan, kin gogostowon mo paoomayan mo ako.” 13 Inabot ni Jesus so kanyang kamut sagkud irinuta sadto lalaki sagkud sinnabi: “Gosto kong maomayan ika!” Kadto tolos nauda so pudpud niya. 14 Pangala, sinabiyan iya ni Jesus: “Diri mo pagsabiyun dawa kiisay, kindi, mag-iyan ika sadto manga saserdote tanganing magpamangno sagkud mag-atang sigon ko iminamanda ni Moises, bilang patonay sa tawo na naomayan nayka.” 15 Kindi lalong linnuyap so bareta manungud ki Jesus. Sagkud mas lalong dinnakul so manga tawong gostong makarungug sagkud magpabolong kanya. 16 Alagad si Jesus pirming nag-iiyan sa kalangtadan tanganing mangadyi.
Pinaomayan Ni Jesus so Paralitiko
( Mt.9:1-8; Mk. 2: 1-12)
17 Usad na alduw, mantang nagtotottoro si Jesus, so manga Pariseo sagkud manga paratottoro sa layi na galin pa sa Galilea, Judea, sagkud Jerusalem nag-uula man sadto. Sagkud so kapangyariyan ko Kagorangnan sadto kanya tanganing magpa-omay sa manga nag-iilang. 18 Agko innabot na pira katawo, dara so usad na paralitikong nakabatang. Nagpipipirit sirang makaluug sadto baluy tanganing maibutang sa atobangan ni Jesus so agko ilang. 19 Ko diri sira makatorak sa paagi na gibowon adi ta kadakul ko tawo, pinnanik sira sadto atup, saka linobot, pangala itinonton nira so lalaki sadto bitnga ko manga tawo, tamang-tama sadto atobangan ni Jesus. 20 Ko mabayad ni Jesus kin gaomno kadakulu so pagtobod nira, sinabi niya sadto paralitiko: “Amigo, pinatatawad nayka ka kanimong manga kasalan.”
21 Pag-una-una sana ko manga paratottoro saka Pariseo: “Siisay ading nagpaparangabil kontra sa Diyos? Siisay a makapagpapatawad sa kasalan kindi a Diyos sana?”
22 Kindi isi man ni Jesus so kandang iniisip, kaya sinnimbag iya kanda: “Tangata kamo ta nagparaisip kan? 23 Ari a mas madali, a sabiyun sa paralitikong: Pinatatawad nayka ka manga kasalan mo o a sabiyun na: Tomindug ika saka omagi? 24 Pamamatoran ko kaninyo na a Igin sa Tawo agko kapangyariyan sadi raga na magpatawad sa manga kasalan. Sagkud sinabiyan niya so paralitiko: Minamandan taykang tomindug, darawun mo a kanimong binabatangan saka ika paoli!” 25 Tinnindug tolos so lalaki sa atobangan ko manga tawo, inalsa so binatangan niya sagkud innoling nag-oomaw sa Diyos. 26 Nangalas sira sagkud napono sa katakotan na nag-omaw sa Diyos sagkud nagsabi: “Nakabayad kami ngowan sa makangangalas na bagay.”
So Pagbaoy ki Levi
( Mt. 9:9-13; Mk. 2:13-17)
27 Pagkatapos kadi, linnowas si Jesus sagkud nabayad niya so usad na parasingil sa bowis na a ngaran Levi na nag-uula sadto opisina niya. Sinabi kanya ni Jesus: “Somonod ika kanaku.” 28 Tinnindug si Levi, binayaan so ngamin saka sinnonod ki Jesus.
29 Pangala, tinawan ni Levi si Jesus sa dakulung andaan sadto baluy niya. Nakaatobang man sadto andaan so manga parasingil sagkud iba pang tawo. 30 Nag-ing-ingan so manga Pariseo sagkud so kaibang manga paratottoro sa layi. Sinabi nira sa manga disipolo: “Ngata kamo ta nagkakaun sagkud nag-iinom na kaiba a manga parasingil saka manga parakasala?” 31 Sinnimbag si Jesus: “Diri nangangaipo sa parabolong a uda ilang kindi a agko ilang; 32 napaiyan ako sadi, bukung baoyon a manga maraay kindi a manga parakasala tanganing magsulsul.”
Kaongaan Manungud sa Pag-aayono
(Mt. 9:14-17 k. 2:18-22)
33 Agko nagkapipirang sinnabi ki Jesus sa arug kadi: “A manga disipolo ni Juan pirming nag-aayono sagkud nangangadyi, amo man a manga parasonod ka manga Pariseo. Kindi a manga disipolo mo sigi sana kaun sagkud inom. 34 Sinnimbag si Jesus: Ngata ta pigpa-ayonowon ninyo a manga bisita sa kinasalan, mantang kaiba nira so lalaking ikinakasal? 35 Alagad mig-abot a panawon na a nobyo aalinun sa kaibanan niya, sa panawon na an saka sira mig-ayono.”
36 Sinabi man niya kanda sa usad na parabola: “Uda tomtabas sa bagong bado ta itatagabo sa loma’. Pagginibo mo yan, mararaut so bagong bado sagkud so itinagab'bong bago diri bombagay sa lomang bado. 37 Uda man nagbubutang sa bagong alak sa lomang bubutangana. Pag-arug kan a ginibo mo maoola so alak sagkud mararaut so butangan. 38 Sa bagong bubutangan dapat ibutang a bagong alak. 39 Sagkud uda magogostong ominom ka bagong alak kin nakainom na sa inistak na alak, ta sasabiyun an nira: 'Mas masiram so inistak'!”