Marcos 15

Dinara si Jesus ki Pilato

(Mt. 27:1,2,11–14; Lk. 23:1–5; Juan 18:28–38)

¹ Kinaramragan, nagtipon tolos so manga namomoon na padi, manga namomoon sa manga Judio manga paratottoro sa Layi sagkud iba pang manga kaiba sa Konseho tanganing magplano. Pinagkausaran nirang ipagapos si Jesus pangala dinara nira iya sadto ki Pilato. ² Pag-abot sadto, inonga iya ni Pilato, “Ngata, ika a Hadi ka manga Judio?” Sinnimbag si Jesus, “Amo yan sabi mo!” ³ Pangala kadakul ko inakosar kanya ko manga namomoon na padi sadto atobangan ni Pilato. ⁴ Pangala inonga otro ni Pilato si Jesus, “Ono, uda basang ika sasabiyun manungud ka manga inaakosar nira kanimo?” ⁵ Alagad diri basang sinnimbag si Jesus kaya nangalas si Pilato.

Sinintensyan sa Kagranan si Jesus

(Mt. 27:15–26; Lk. 23:13–25; Jn. 18:39-19:16)

⁶ Ko panawon na namomoon si Pilato, nakaogalian na niyang magpalowas sa usad na priso na gostong palowasun ka manga tawo kada Piyesta sa Paskowa. ⁷ Usad sa manga nakapriso kadtong panawon na adto si Barabas na kaiba sa manga nagrebelde sagkud nakaguraan ko magkaagko labanan. ⁸ Kaya nag-iriyanan so manga tawo ki Pilato sagkud inayat nira na magpalowas naman sa usad na priso para kanda sigon sa kinaogalian niya. ⁹ Kaya inonga sira ni Pilato, “Ono, gosto ninyong palowasun ko a sinasabing hadi ka manga Judio para kaninyo?” ¹⁰ Inonga adi ni Pilato ta isi kaya niyang naiibug so manga namomoon na padi ki Jesus kaya inakosaran nira adi. ¹¹ Alagad sinolsolan ko manga namomoon na padi so manga tawo na sabyun ki Pilato na si Barabas amo palowasun. ¹² Pangala inonga sira otro ni Pilato, “Ya ono ninyo gostong gibowon ko kading binabaoy ninyong hadi ka manga Judio?” ¹³ Nagkaragratan so manga tawo, “Ipako sa kros!” ¹⁴ “Ngata ta gosto ninyo iyang ipapako? Onong krimen naginibo niya?” onga ni Pilato. Alagad lalong kinnusug so kagratan nira, “Ipako sa kros!” ¹⁵ Holi ta gosto ni Pilatong mapaogma so manga tawo pinalowas niya si Barabas mantang ipinalatigo niya si Jesus sa manga Romanong soldados sagkud nagmandang ipako iya sa kros.

Ininsolto sagkud Pinasakitan si Jesus ko manga Soldados

(Mt. 27:27–31; Jn. 19:2,3)

¹⁶ Pangala dinara si Jesus ko manga Romanong soldados sadto luug ko palasyo ni Pilato na binabaoy na Pretoryo. Binaoy man nira so bilog na batalyon ko manga soldados. ¹⁷ Bilang pag-insolto, sinopongan nira si Jesus sa kolor maron na bado. Nagsalapid sira sa matodok na sanga pangala ikinorona ki Jesus. ¹⁸ Pangala painsolto iyang pinagsalodowan nira, sabay sinabi, “Maboway a hadi ka manga Judio!” ¹⁹ Pagkatapos pinagparapokpok nira sa sogkod so payo niya sagkud pinagparalostaban pangala paintremis sirang titiklod sadto atobangan niya. ²⁰ Ko magsawa na so manga soldados sa pag-insolto ki Jesus, binalyowan nira so maron na bado ko bado mismo ni Jesus. Pangala pinaagi nira iya palowas sadto syodad tanganing ipako iya.

Ipinako sa Kros si Jesus

(Mt. 27:32–44; Lk. 23:26–43; Jn. 19:17–27)

²¹ Pagngumunngumun, usad na lalaking tagaCirene na linnalabos galin sa baryo so pinirit ko manga soldados na pas-anun so kros ni Jesus. A ngaran kading lalaking adi Simon. Iya a ama nira ni Alejandro sagkud Rufo. ²² Dinara ko manga soldados si Jesus sadto logar na binabaoy na Golgota na a buut sabiyun Logar sa manga Bongo. ²³ Ko isadto na sira, tinawan ko manga soldados si Jesus sa alak na agko salak na mira, alagad diri niya adi ininom. ²⁴ Pangala ipinako nira si Jesus sadto kros. Pinagbangabanga nira so manga bado ni Jesus na pinaagi sa pag tawo o gila tanganing maisiyan kin ari mapaiiyan sa kada usad. ²⁵ Manga alas nowebe na sa ramrag nirang ipinako si Jesus. ²⁶ Sadto pamaywan ko kros, kinabitan nira sa sadit na pidasong tabla na nakasorat so inakosar kanya na so sabi, “HADI KA MGA JUDIO.” ^27-28 Agko man darwang mataban na ipinakong karungan ni Jesus. Usad sadto too niya sagkud usad sadto wala. ²⁹ Pinagparainsolto si Jesus ko manga tawong naglalabos sadto atobangan niya. Nangagtatangutangu sira sabay sabi, “Asi! Rurugmaun mo a Templo pangala itotogrok mo sa luug sana sa tolong alduw! ³⁰ Ngowan raw, ligtasan raw a sadiri mo, baba raw siton!”

³¹ Pinag-insolto man iya ko manga paratottoro sagkud ko manga namomoon na padi mantang nag-oosip-osip sira, sinabi nira, “Ilinigtas niya so iba alagad diri niya mailigtas a sadiri niya! ³² Pabayaan tang bomaba a Cristo, a hadi ka manga Judio tanganing makatobod kita kanya kin mabayad tang makababa iya.” Pinag-insolto man iya ko karungan niyang ipinako.

Pagraan ni Jesus

(Mt. 27:45–56; Lk. 23:44–49; Jn. 19:28–30)

³³ Pangala biglang nginnitngit sadto bilog na Judea ko alas dose na sa modto anggan alas tres sa apon. ³⁴ Pangala pag alas tres, kinnagrat si Jesus sa makusug, “Eloi, Eloi, lama sabacthani?” na a buut sabiyun, “Diyos ko, Diyos ko, ngata ta pinabayaan mo ako?” ³⁵ Narungug iya ko nagkapirang nakatindug na arani kanya kaya nasabi ko iba kanda, “Irungga ngani ninyo, binabaoy niya si Elias.” ³⁶ Pangala agko usad na kinnoko sa esponghang tumuk sa maalsum na alak, iginuud niya adi sa kapotol na sanga pangala dinnalagan iya paiyan ki Jesus sabay dungdung ko espongha sadto nganga ni Jesus. Pangala sinabi niya sadto manga kaiba, “Ulat ngona, bayadun ta kin tabangan iya ni Elias na makababa sa kros.” ³⁷ Kinnagrat si Jesus sa makusug pangala nagraan na. ³⁸ Kasabay kadi, biglang narapak sa darwa so kortina sadto Templo poon sa itaas pababa. ³⁹ Usad na kapitan na nakatindug sadto atobangan ni Jesus so nakabayad kin paono nagraan si Jesus. Kaya sinabi niya, “Tonay talagang igin sa Diyos a tawong adi.” ⁴⁰ Nakamasid man ko manga nangyayari sadto oroarayo sira si Maria Magdalena, si Salome sagkud si Mariang kag-igin nira ni Santiago na hobin sagkud Jose. ⁴¹ Nagin tagasonod ni Jesus a manga babaying adi ko sadto iya Galilea sagkud nagparatabang kanya. Dakul pang manga babaying tagasonod niya so sinnonod kanya sadto Jerusalem ko panawon na ipapapako na iya.

Paglubung ki Jesus

(Mt. 27:57–61; Lk. 23:50–56; Jn. 19:38–42)

⁴² Nangyari adi ngamin ko alduw sa Biyernes, alduw sa pagpriparar para sa Sabado. Kaya bago magsulnud so alduw, ⁴³ usad na lalaking a ngaran Jose na tagaArimatea so nagkusug buut na inniyan ki Pilato. Inayat niya so bangkay ni Jesus. Si Jose usad sa manga iginagalang na miyembro ko Konseho ko manga Judio na nag-uulat man ka paghahadi ka Diyos. ⁴⁴ Nangalas si Pilato ko maisiyan niyang guraan na si Jesus kaya inonga niya so kapitan kin talagang guraan na si Jesus. ⁴⁵ Pangala ko maisiyan ni Pilato sadto kapitan na guraan na talaga si Jesus, tinogotan niya si Jose na koon so bangkay. ⁴⁶ Kaya ipinababa tolos ni Jose so bangkay ni Jesus pangala pinotos adi ko binakal niyang mamalun na telang pampotos sa guraan pagkatapos ipinaluug niya sa lubungan. Pangala pinagpaligidan niya sa dakulung bato so pwertaan ko linubungan. ⁴⁷ Nakasilung kadto si Maria Magdalena sagkud si Mariang kag-igin ni Jose kaya isi nira kin sari ilinubung si Jesus.