16
Pagkaboway Otro ni Jesus
(Mt. 28:1–8; Lk. 24:1–12; Jn. 20:1–10)
1 Ko matapos na so Alduw sa Pagpapaingalo , binnakal sira si Maria Magdalena, si Mariang kag-igin ni Santiago sagkud si Salome sa maamot na bolong na pambutang sa guraan tanganing pag-iyan nira sadto linubungan ki Jesus mabutangan nira so awak niya. 2 Kaya mararamragun sa Domingo, inniyan tolos sira sadto linubngan ki Jesus. 3 Mantang nagdadangadang sira sadto linubungan, nag-iinongaan sira kin siisay migpaligid ko batong isinarado sadto linubngan ki Jesus?” 4 Alagad pagsilung nira sadto onaan, nabayad nirang nakaligid na so batong malakadakulu. 5 Pangala ko pagluug nira sadto linubngan ki Jesus, nakabayad sira sa lalaking hobin na nakabado sa poti. Nakaula iya sadto toong gilid ko linubngan. Kaya nakatakot sira saigo. 6 Pangala nagngabil so lalaki, “Diri kamo makatakot! Kin inaanap ninyo si Jesus na tagaNazaret na ipinako sa kros, uda na iya sadi. Bayada ngani a logar na binutangan ka awak niya. Naboway na iya otro. 7 Kaya iyanan na ninyo so manga disipolo sagkud sabiyan ninyo orog na si Pedro na maoona ng mig-iyan si Jesus sadto Galilea. Arug ko sinabi niya kaninyo kadto, mababayad ninyo iya sadto.” 8 Nangubugkubug sira sa katakotan sagkud sa sobrang kaandalan. Kaya naglowas sira sadto lubungan sagkud nagpandalagan parayo. Uda basang sira inistoryaan ko nangyari ta nakatatakot sira.
Nagpabayad si Jesus sadto manga Disipolo Niya
(Mt. 28:9-20; Lk. 24:13–49; Jn. 20:11–23; Gibo 1:6-8)
9 Kadtong pagkasaking Domingo, pagkaboway otro ni Jesus, nagpabayad iya ki Maria Magdalena. Si Maria Magdalena so babaying dating sinaniban sa pitong maraut na espirito na pinalayas ni Jesus. 10 Pangala sinabiyan niya so manga dating korokaiba ni Jesus na kadtong oras adto nangagmumundu, sabi niya kanda, “Boway si Jesus, nabayad ko iya.” 11 Alagad dawa narungug nira so sinabi niya, diri sira tinnobod.
12 Pangala pag-uban-uban nagpabayad man si Jesus na nasa ibang itsora sadto darwang disipolo mantang sira nagbabaklay paiyan sa baryo. 13 Ko mabisto nira si Jesus, binnalik sira tanganing sabyan so ibang disipolo alagad diri sira tinnobod.
14 Pangala diri nauban, nagpabayad si Jesus sadto onseng disipolo mantang nangagkakaun sira. Inungtan niya sira ta mala nira ka songkailan, ta diri sira tinnobod sadto manga nakabayad kanya na iya naboway otro. 15 Pangala sinabi niya kanda, “Omiyan kamo sa bilog na kinaban sagkud ipangadal ninyo a Maray na Bareta sa ngamin na tawo. 16 A kada usad na tomobod kanaku sagkud magpabunyag migkaagko kaligtasan. Alagad a kada usad na diri tomobod kanaku oosgaran. 17 A kada usad na nagtotobod kanaku mababaydan sa manga makangangalas na tanda arug ka kakayaan na magpalayas sa demonyo sa ngaran ko, kakayaan na magngabil sa manlain-lain na linggwayi, 18 kakayaan na diri magraan dawa makakaput sa sawa o makainom sa ilo sagkud kakayaan na magparaay sa manga nag-iilang sa paagi ka pagruun ka kamut niya sa nag-iilang.”
Pag-itaas ni Jesus sadto Langit
(Lk. 24:50–53; Gibo1:9–11)
19 Pagkasabi kadi ni Jesus sadto manga disipolo, dinara iya ko Diyos sadto langit pangala pinaula niya si Jesus sadto too niya. 20 Pangala nag-iriyanan sa manlain-lain na logar so manga disipolo. Ipinangadal nira a Maray na Bareta manungud ki Jesus. Diri sira pinabayaan ka Kagorangnan kaya kadakul nirang nagibong milagro sagkud matood na nangyari kanda so manga tanda na sinabi ka Kagorangnan.