Baloa l'inda imoti nda Pɔlɔ ang'a
Timɔtɛɔ
Moo a yɔnga
Ketabo l'inda imoti nda Timɔtɛɔ a nde baloa. Ntetei Pɔlɔ ai aanndekei nde ngolì nde maɛ Timɔtɛɔ. Ai aandeki nde n'asaki akuɛ, a nde yɔnga la bende, bía a elemɔ a 62-64 mbusa a bɔtɛana la Kilisitɔ. Pɔlɔ ai nde nto nde maa bhi-bhi na Timɔtɛɔ, na ai ankoga nkobà ati nde ate naɛ (Filɛm 2.22, 1 Tim 1.2, 1.18).
Asub'a Nsaeɔ nda mbènɔ-mbènɔ bɛɔni baloa moti-moti, inde ntetei Pɔlɔ ai aeandekei bato nde ba asub'a kanisà ngiman'aɛ. Mpa asub'a baloa ini aga n'ankɛbɛa gɔɛ nde masa kela nto moti, n'iyu a nde: Timɔtɛɔ, Titɔ na Filɛmɔnɔ. Asub'a baloa l'inda imoti nde Pɔlɔ ai aandekei Timɔtɛɔ a au maanɔ a sinde aanga basɔlɔlia nee mpuɔ a ebhebhɔ (2.1-15), na sinde aanga bansɔmbɔla na mmbe amɛli kanisà (3.1-13), na kalea la bande bagolisa egolisi a mbéa asub'a kanisà (1.3-11, 4.1-5, 6.3-5). Indɔ aangelisi sinde Pɔlɔ akaba golisa la muluana Timɔtɛɔ asub'a nkási nda nangi-kanisà. Baloa-li atumi au asii ati anja inde atɔlɛli nɛngɛbɛ ang'asu ndiende, angelisa la mmbe amɛli kanisà asub'a nkási nde bambhísi au.
Sinde ketabo-li abuanigi nee
1. Pɔlɔ akɛngɛtisi nde na nseseɔ ang'a Timɔtɛɔ (1.1-2)
2. Ab'ankèngemisa Timɔtɛɔ a yɔnga la bande bagolisa egolisi ajede (3.3-11)
3. Pɔlɔ aga n'aangelisa sinde ansìma nee Yesu Kilisitɔ (1.12-20)
4. Ab'angolisa Timɔtɛɔ a yɔnga la mpuɔ a ebhebhɔ na sinde mmbe amɛli kanisà aang'abá nee (Hale 2-3)
5. Ab'agɔbɛlaga n'anhana Timɔtɛɔ maanɔ a bonganga, sinde aang'abhɛda nkási nd'aɛ. (Hale 4-6)