Pɔlɔ anhana Timɔtɛɔ a yɔnga la ɛmɛmi
2
Mosá la éma-li bhulibhu, nenohana bende bɔmmɛmɛ Mokonga a yɔnga la bato-li bɔbhu, bongámelɛgɛ, na bonsìmɛ a yɔnga l'abɔ. 2 Bɔɔmɛmɛlɛ baamɛ na bato bɔbhu bande ba na bokama, iwa yɛu aanga belenda a bɔkɔlɔ na mbɔlɛlɛ na bɛkɛngana mosá la Mokonga na mosá la bato. 3 Indɔ yɛu a anja na am'bɔngɛla Mokonga Namisi nde masu. 4 Nga iyɛ akóndi ate bato-li bɔbhu balamɛa na bakidɛ a úbha la domi. 5 A nde bende Mokonga a nde moti, ago na Ntulanisi a meeme a bato na Mokonga a masa moti, n'iyɛ a nde nto Kilisitɔ Yesu, 6 mmbe agabhi lenda l'aɛ a lèela la bato bɔbhu malɔnga. Yɔnga ndɔ a nde ntɔndɔlisɔ nde Kilisitɔ abhísi a mbènɔ nde Mokonga amesi. 7 Ang'a indɔ yɛu Mokonga amobhísi ntɔmii-yɔnga na ntetei†, a golisa la boosobela na yɔnga la domi ang'a bande nndaga baYuda. Nnda nedhemi, nɛyɔngi nde domi.Sinde atɔlɛli nee baboo na bake batambɛ asub'a Kanisà
8 Nekóndi bende baboo bamɛmɛ a mpuɔ bhulibhu na basòmbi njaga. Atɔlɛli bageɛ bo na meema anja makanga bosubani na bóaka.
9 Ìbo yɛu, nekóndi go nte bake balɔlanɛ hɛlɛ. Babɛ na ngɔmbɛ nde atɔlɛli na inde asikisa. Baokɛ sia-moo abɔ sinde atɔlɛli nee. Kanga baɛtɔndaga na éma nde bakɔkɔtii na nɔlɔ, manengeta na ngɔmbɛ nde a na esómbi akpɛ†. 10 Mpa baangelisɛ gɔɛ bonja l'abɔ nde a ɛkɔli anja-nja, sinde atɔlɛli nee ang'a bake nde batamba na bansikisa Mokonga. 11 Mbènɔ a egolisi, abɔngi bake baɔkaneɛ na badhai na boedhidhisa. 12 Nndaga nelebei bende bake baegolisɛ baboo na ikidia l'abɔ: badhàɛ nde bosii! 13 Nga Mokonga ai antɛlɛkisi Adamu mbɛɛ, mpa na Ɛfa mbusa. 14 Ago nndag'ai nde Adamu yɛu ai bandhemi. Mpa nke yɛu ai bandhemi na ngia l'aɛ asub'a ilɔlɔ†. 15 Mpa nke alɛ alama nde a nyɛnɛla la ɛbɔti aɛ, n'aye alendi asub'a boosobela, ekóndi na bɔwɛdɛ mosá la Mokonga.