Baloa l'inda imoti nda Pɔlɔ ang'a
Timɔtɛɔ
Nseseɔ
1
Eme Pɔlɔ, ntetei nde ma Kilisitɔ Yesu, a bokama nda Mokonga Namisi nde masu na Kilisitɔ Yesu bɔɔkɛtɛla ndasu.2 Ang'aɔ Timɔtɛɔ† nami domi-domi asub'a boosobela. Mokonga Abhasu na Kilisitɔ Yesu Mokama nde masu baopɛ boangɔ, baokuliɛ ngomi na pa l'aɔ bɔkɔlɔ!
Kɔkɔ̀ ang'a bande batambisa egolisi a mbéa
3 Sinde ai neososii nee na nega Makedonia†, otigɛ mbɛɛ masa Ɛfɛsɔ† wa, nga ba iwa bande bagolisa egolisi nde anyɛnani na domi. Nekabi nte oehanɛ badoɛ. 4 Oengodeɛ bende, badoɛ egani-egani nda bosa ndɔ na kumiaga la ina a batata abɔ†, inde nnd'a na sungia ndɔ! Indɔ abhìsa masa kɔkɔbɔka nda bosa, makanga tabela la nkási a bolamisi nda Mokonga, inde aúbhianani na boosobela. 5 Neongodea nte oesosiɛ bo, nga babɛ na ekóndi nde atoa asub'a meema anja nde aúbha sɔmbɔla la éma la domi, na asub'a boosobela makanga ebhete-bhete. 6 Bande batɔɔ, batoi a asii ndɔ, aba babungaga na ngia la asub'a mokobobo a bosa. 7 Baeyea egolisi a Tɔlati nda Mósa, mpa go na nnda baúbha yɔnga nde bayɔnga nɛngɛbɛ úbha la moo a yɔnga nde bagolisa n'ekanda ndɔ.
8 Besu beúbha, Tɔlati nda Mósa a anja, n'aye nto abhɛdi sinde atɔlɛli nee. 9 Mpa bebosela-i bende Tɔlati nndag'a nde ang'a nto a domi, a gɔɛ nde ang'a mmbe akɔ́mi yu na ang'a mojiji, ang'a bande nnda bansikisa Mokonga na bato a ilɔlɔ, ang'a bande ban'ye Mokonga na abela l'aɛ, ang'a bande baemóa babhabɔ aɔ bamabɔ, ang'a basinja, 10 ang'a basingili na ang'a baboo nde aki baɛbɛsa baboo badhabɔ, ang'a bande aki baesómbisa bato, ang'a bambembéa na ang'a bande basáeana a mbéa, na ang'a bande bakɔla ind'atɔɔ nde a dhɔlɔ na egolisi a domi. 11 Egolisi ndɔ bhulibhu a asub'a Mbinɔ Anja nde Mokonga ai amobhísisi, iyɛ Amɛnɛ a bujɛmɛ na boumu.
Pɔlɔ ansìmi Kilisitɔ
12 Nensìmi Kilisitɔ Yesu Mokama nde masu, iyɛ yɛu amopi ekanda, nga ai aɔni bende netɔisi na ab'amɔsɔmbɔla a nkási nd'aɛ. 13 Nɛngɛbɛ mosá n'ai ne nde nto a ɔtana, nto a nobisa na abha-emani. Mpa Mokonga amokulii ngomi, nga ai nɛkɔla indɔ nde makanga úbha la inde nɛkɔla na ai na nebi-mbɛ na boosobela ang'aɛ†. 14 Mokama nde masu agesi ang'ami boangɔ a boti, amopi boosobela na ekóndi nde atoi ang'a Kilisitɔ Yesu. 15 Inde yɛu a nde yɔnga la domi, na atɔlɛli bato-li bɔbhu balebeɛ: Kilisitɔ Yesu abhii a lɛɛngɔ nde nde bhia lamisa la bato a ilɔlɔ, na eme ne nde majede mmbe ma mosá-mosá angal'abɔ. 16 Mpa ang'a indɔ yɛu Mokonga amolilii: nga a nyɛnɛla la ang'ami Yesu Kilisitɔ aangelisɛ mbɛɛ bubila nd'aɛ bhulibhu. Na ìbo, indɔ abɛ mbunde ang'a bande banebea mande na dɔ̀a la ngɛbɛ a ngia la asub'a lenda la mɛyɔ. 17 Ang'a Mɔamɛ nde maa mɛyɔ, mmbe nnd'a na sungia, mmbe nnd'aanga bamɔna, Mokonga moti, abɛ na bosikɛ na boumu a mɛyɔ na mɛyɔ. Abɛ bo.
18 Timɔtɛɔ nami, neopi nkási nde lɔndisana la na sinde baúbhilili ai n'aye bayɔngi nee ang'aɔ. Yɔnga ndɔ abɛ ekanda l'aɔ a emani anja nde ongia au nde, 19 n'ɔbhɛdɛla boosobela l'aɔ na meema anja. Bato la bande batɔɔ bakɔ́mi úbha la indɔ na boosobela l'abɔ ab'aujuana bo. 20 Angal'abɔ a wa nto sunga na Imɛnɛɔ bona Alɛsandulɔ, aye neegabhi ang'a Sitani† nga bagolɛ kangana ɔtaga la Mokonga.